FINE’NA NA TINAITAI Acts 3, 13-15. 17-19
Un tinaitai ginin i Bidan i Manapostulis
Ilek-ña si Pedro nu i linahyan tåotåo: I Yi’us Abrahan, Isaac, yan Jacob, i Yi’us i tatå-ta siha, ha na’matuna si Jesus i Sitbenten-ña, ni en intrega yan en disonra gi me’nan Pilato anai esta listu si Pilato para u sinetta. En disonra, si Jesus ni Såntus yan Tunas, ya inlugåt mås manmalagu’ hamyu na en fanmasuttåyi ni peknu’. En pinu’ i muna’huyung i lina’la’. Låo kinahat Gui’ as Yu’us ginin i finatai, ya hami i tistigu-ña siha.
“Låo hu tungu’ ha’ mañe’lu-hu, na en che’gui esti gi maniknuråntin-miyu, taimanu ha’ bidan-ñiha i manma’gas-miyu. Taiguini na Ha kumpli si Yu’us atyu siha i Ha anunsia gi hagas na tiempu ginin todu i prufeta siha: na i Misihas u maså’pit. Put ennåo na tulaika i lina’la’-miyu! Bira hamyu guatu gi as Yu’us, kosaki u fanmafunas i isao-miyu!
I finu’ i Saina.
INEPPIN I SÅTMU Ps 4, 2. 4. 7-8. 9
R. (7) ASAINA, NA’FANINA I MATÅ-MU GIYA HAMI.
Oppi yu’ yanggin manåyuyut yu’, Yu’us nana’librek-ku.
Anai gai prublema yu’, Un babayi yu’ chålan;
na’ma’åsi’ Håo nu guåhu; ékkunguk i tinayuyot-tu.
INEPPI…..
Tungu’ na i Saina na’manman bidåda-ña para i mamfiet;
Ha huhunguk i Saina yanggin hu ågang Gui’.
INEPPI…..
O Asaina, sedi i ininan i matå-mu ya u fanina giya hami!
Un po’luyi minaguf gi kurason-hu.
INEPPI…..
Bai hu åssun påpa’ gi pås ya bai hu maigu’,
sa’ Hågu ha’, Asaina, umadadahi yu’.
INEPPI…..
SIGUNDU NA TINAITAI 1 Jn 2, 1-5a
Un tinaitai ginin i fine’na na Kattan San Juan
Famagu’on-hu, hu tugigi’i’ hamyu ni esti, kosaki mungnga manisao; låo yanggin guaha umisao, gaigi unu ni gumagågagui hit gi Tata kuentåt-ta–si Jesukristo, Guiya ni tinas. Ya ginin i Kristo mismu na manma’asi’i hit ni isåo-ta, ya ti i isåo-ta ha’, låo kuntodu i isao i pumalu. Yanggin ta osgi i tinagu’ Yu’us siha, ennåo na mansiguru hit na ta tungu’ Gui’. Atyu siha i umåluk na “Hu tungu’ Gui'” låo ti ma’o’osgi i tinago’-ña siha, pues mandåkun, ya i minagåhit taigui gi entri siha. Låo maseha håyi ni umosgi i fino’-ña, guiya muna’prifektu i ginefli’i’ Yu’us giya guiya.
I finu’ i Saina.
IBANGHELIU Lk 24, 35-48
ÅLELUIA Lk 24, 32
R. Åleluia. ASAINA JESUS, NA’KLÅRU I FINO’-MU GIYA HAMI,
NA’HÅNUN I KURASON-MÅMI NI GINEFLI’I’
YANGGIN UN KUENTUSI HAM.
R. Åleluia.
+ Un tinaitai ginin i såntu Ibangheliu sigun i tinigi’ San Lucas
Pues maninisplikåyi siha ni esti i dos håfa masusedi gi chalan, yan håfa taimanu na marikuknisa i Saina anai Ha ipi’ i pån.
Mientras manguekuentus ha’ siha put todu esti, si Jesus mismu tumohgi gi entalu’-ñiha, ya ilek-ña nu siha, “Pås giya hamyu.” Gi linihan-ñiha yan mina’å’ñao-ñiha, hinassun-ñiha na manmanli’i’ siha fafá’ñagui. Ilek-ña nu siha, “Sa’ håfa na manatburutåo hamyu? Håfa na humålum ennåo siha na hinassu gi sanhalum-miyu? Atan i kannai-hu yan i addeng-hu siha; sen magahit na Guåhu ha’. Patcha Yu’ ya en li’i’, sa’ tåya’ sensen-ña yan te’lång-ña i fafa’ñagui, tåtkumu Guåhu.” Gigun Ha sångan esti Ha fanu’i siha ni kannai-ña yan addeng-ña siha. Trabiha mandududa ha’ siha put i minaguf-ñiha yan i minanman-ñiha, pues ilek-ña nu siha, “Kåo guaha na’-miyu?” Manå’i Gui’ un pidåsun guihan ni måsa, ya Ha chuli’ ya Ha kånnu’ gi me’nan-ñiha.
Pues ilek-ña nu siha, “Hahassu i sinangån-hu nu hamyu anai manhihita ha’: todu i manmatugi’ put Guåhu gi lai Moises yan gi mamprufeta yan i såtmu, na debidi u fanmakumpli.” Dispues Ha baba hinassun-ñiha para u ma kumprendi i Eskritura. Ilek-ña nu siha, “Taiguini matugi’ na i Misihas debidi u famadesi yan u lå’la’ ginin i finatai gi mina’tres dihas. Gi na’ån-ña, u masetmunñaihun gi todu nasion siha desdi Hirusalen i pinitensia para inasi’in i isåo siha. Hamyu tistigu put esti siha.
I Ibangheliun i Saina.
