FINENI’NA NA TINAITAI Ex 20, 1-17
Un tinaitai ginin i Lepblun Exodus
Dispues si Yu’us Ha prisenta esti siha na tinagu’:
“Guåhu, i Saina, Guåhu Yu’us-miyu, i kumonni’ hamyu ginin i tanu’ Ihiptu, i lugåt anai manisklåbu hamyu. Mungnga na u guaha yu’us-miyu fuera di Guåhu. Mungnga na u guaha mama’tinas buttu para hamyu gi fotman maseha håyi guihi hulu’ gi langit osino guini påpa’ gi tanu’ osino gi halum hånum gi papa’ i tanu’; mungnga na u guaha mañaluda gi me’nan-ñiha patsino u fanmanadora. Sa’ Guåhu, i Saina, i Yi’us-miyu, ti bai sedi para en adora ottru yu’us, Hu kastitiga i famagu’un put i isao tatan-ñiha ni chumatli’i Yu’, påpa’ asta i mina’tres yan mina’kuåttru na hinerasion; låo Hu na’fåfattu mina’åsi’ påpa’ asta i mina’mit na hinerasion, gi famagu’un atyu siha i gumofli’i’ yu’ yan makukumpli i tinago’-hu.
Mungnga na u guaha umusa i na’an i Saina, i Yi’us-miyu, sin nisisidåt. Sa’ i Saina ti u letki kumastiga håyi ni umusa i na’ån-ña sin nisisidåt.
Gof adahi ya en kimpli i ‘sabbath’ na ha’åni. Sais dihas para en fanmacho’chu’ yan para en che’gui i che’chu’-miyu, låo i mina’sietti dihas i ‘sabbath’ i Saina, i Yi’us-miyu. Tåya’ cho’chu’ para u macho’gui ni hamyu, osino i famagu’on-miyu, pat sino i lalåhi pat famalåo’an na isklåbun-miyu, osino i ga’ga’, pat sino i taotåo hiyung ni mañåsaga yan hamyu. Sais dihas dinira i Saina para u fa’tinas i langit yan i tanu’, i tasi yan i manggaigi guennåo; låo gi mina’sietti dihas dumiskånsa. Put ennåo na i Saina Ha bendisi i ‘sabbath’ na ha’åni yan Ha na’såntus.
Onra si tatå-mu yan si nanå-mu, ya u anåkku’ i lina’la’-miyu gi tanu’ ni i Saina, i Yi’us-miyu, manninana’i hamyu. Cha’-mu famumunu’. Cha’-mu umadutteteriu. Cha’-mu fañåñakki. Cha’-mu fañeknanani mandagi gi tiguång-mu. Cha’-mu malalagu’ ni iyun i tiguång-mu. Cha’-mu malalagu’ ni ásaguan i tiguång-mu, pat sino i isklabu-ña låhi pat palåo’an, osino i ga’-ña toru pat buliku, pat maseha håfa na guinaha-ña.”
I finu’ i Saina.
INEPPIN I SÅTMU Ps 19, 8. 9. 10. 11
R. (Jn 6, 68c) ASAINA, GAIGI GIYA HÅGU I FINIHU’ I
TAIHINEKKUK NA LINA’LA’.
Sen måolik i lai i Saina,
Ha na’freresku i anti!
Angokkuyun i tinagu’ i Saina,
Ha nåna’i tinemtum i mansensiyu.
INEPPI…..
Manunas i tinagu’ i Saina ,
ha na’mamaguf i kurason.
Klåru i minandan i Saina,
Ha na’lele’an i áttaduk.
INEPPI…..
Gåsgas i mina’å’ñåo gi Saina,
ya mesngun para todu i tiempu.
I etdin i Saina manmagåhit,
manunas interamenti.
INEPPI…..
Mås mangguaguan siha ki i oru,
ki i munton i mås gåsgas na oru,
Mamesña ki i anibat pat i miet
osino i tihu’ ginin i chenchun.
INEPPI…..
SIGUNDU NA TINAITAI 1 Cor 1, 22-25
Un tinaitai ginin i Kattan San Pablo para i taotåo Corinth
Hafañe’lus:
I ManHudihos siha manmalagu’ manmanli’i’ milågru para prueba, ya i ‘Greek’ siha manmanaliligåo tinemtum. Para hita, ta pruklålama i maklåba na Kristo, un minsåhi esti na na’massa’ para i ManHudihos siha yan babarihas para i MamPagånu; låo para atyu siha i maninagang as Yu’us, kuntodu i ManHudihos yan i MamPagånu, esti na minsåhi era i Kristo, Guiya i minetgut yan i tinemtum Yu’us. Atyu i siña ta åluk na babarihas para si Yu’us, mås takkilu’ na tinemtum ennåo ki i tinemtum tåotåo, ya atyu i siña ta åluk na niñaba’ gi as Yu’us, mås metgut ennåo ki i minetgut i taotåo.
I finu’ i Saina.
IBANGHELIU Jn 2, 13-25
(Todu) U matuna Håo, Asaina Jesukristo, Rai i taihinekkuk na gloria!
(Tetcha) Put i Ha gof guaiya si Yu’us i tanu’, Ha nå’i hit ni uniku na Lahi-ña,
kosa ki todu i manmanhonggi giya Guiya u fanggai taihinekkuk na lina’la’.
+ Un tinaitai ginin i såntu Ibangheliu sigun i tinigi’ San Juan
Anai humihihut i giput Påsguan i ManHudihos, humånåo hulu’ si Jesus para Hirusalen. Ha sodda’ i taotåo siha gi templu manmambebendi nubiyu, kinilu, yan påharu, ya i pumalu siha manmatåtachung manmanulalaika salåppi’. Mama’tinas kuåtta ni tali ya Ha dulalak huyung ginin i templu i taotåo siha, i kinilu yan kuntodu i nubiyu’, ya Ha na’fanåtlibis i lamasan atyu siha i manmanulalaika salåppi’, ya Ha chalapun i sensiyun-ñiha. Ha sangåni atyu siha i manmambebendi påharu: “Fanhuyung ginin esti! Båsta mafa’metkåo i gima’ Tatå-hu!” I mandisipulu-ña mahassu i finu’ i Eskritura: “Ha sosonggi Yu’ i dibusion-hu para i gimå’-mu.”
Put esti na manmanoppi i ManHudihos siha, “Håfa na siñåt siña Un fa’nu’i ham na ma’åoturisa Håo para Un cho’gui esti siha?”
Manoppi si Jesus, “Bai Hu yulang esti na templu, ya bai Hu håtsa ta’lu gi mina’tres dihas.”
Manmanoppi siha, “Dinira esti na templu kuarentaisais åñus para u mahåtsa, ya Hågu para Un håtsa gi tres dihas?”
Gi magåhit kumuekuentus Gui’ put i templun i tataotåo-ña. Asta ki mana’lå’la’ ta’lu si Jesus ginin i finatai nai mahassu ni mandisipulu-ña na Ha sångan esti, ya manmanhonggi gi Eskritura yan i palåbras ni Ha sångan.
Anai iståba Gui’ giya Hirusalen durånti i giput Påsgua, meggai manmanhonggi gi na’ån-ña sa’ mali’i’ i siñåt siha ni Ha cho’cho’gui. Låo mantiningu’ todu siha as Jesus ya ti maninangokku nu Guiya. Ti Ha nisisita ottru tåotåo para u sinangåni put siha, sa’ Ha gof tungu’ håfa gaigi gi kurason-ñiha.
I Ibangheliun i Saina.
