FINENE’NA NA TINAITAI Ex 3, 1-8. 13-15
Un tinaitai ginin i Lepblun Exodus
Un diha anai iståba si Moises na ha adadahi i kinilu yan i chiba ni ga’ i suegron-ña as Jethro, påli’ Midihan, ha krusa i disiettu yan i ga’ga’ ya måttu giya Sinai, i sagrådu na sabåna. Guihi nai finatoigui gui’ ni anghit i Saina kalang mañila’ ni kokokoyung ginin i entalu’ un trongku. Ha li’i’ si Moises na mañiñila’ i trongku låo ti kimasoson. Måttu gi hinasson-ña, “Na’manman esti. Sa’ håfa na ti kimasoson i trongku? Bai hu latguatu ya bai li’i’.”
Anai lini’i’ si Moises ni Saina na lumalatguatu, inagang gui’ ginin i halum trongku ya ilek-ña, Moises! Moises!” Manoppi gui’, “Hunggan, estigui’ yu’.”
Ilek-ña si Yu’us, “Cha’mu lalatmagi. Pula’ i sandaliås-mu, sa’ tumotohgi håo gi hilu’ sagrådu na odda’. Guåhu Yu’us i mañaina-mu, i Yi’us Abrahan, Isaac, yan Jacob.” Pues ha tåmpi matå-ña si Moises, sa’ ma’å’ñåo gui’ umatan si Yu’us.
Dispues ilek-ña i Saina, “Esta hu li’i’ na mampus kruet manmatråtan-ñiñiha i taotåo-hu giya Ihipto; hu hunguk i inagang-ñiha para u fanmariskåta ginin i mannaná’facho’chu’ isklåbu. Hu tungu’ todu i pinadesin-ñiñiha, ya put ennåo na måttu yu’ påpa’ para bai Hu riskåta siha ginin i taotåo Ihipto ya para bai Hu konni’ siha ginin Ihipto para guatu gi un ånchu na tånu’, un tånu’ ni riku yan måolik eddå’-ña.
Låo manoppi si Moises, “Yanggin humånåo yu’ guatu gi Israilitas ya ilek-ku nu siha, ‘I Yi’us i mañainan-miyu muna’hånåo yu’ para hamyu,’ siempri mafaisin yu’, ‘Håyi na’ån-ña?’ Pues håfa para bai hu sangåni siha?”
Ilek-ña si Yu’us, “Guåhu si Guåhu.” Debidi un sangåni siha: “Atyu i ma’å’agang si Guåhu muna’hånåo yu’ para hamyu.”
Sangåni i Israilitas na Guåhu, i Saina, i Yi’us i mañainan-miyu, i Yi’us Abrahan, Isaac, yan Jacob, muna’hånåo håo guatu para siha.
Guiya esti na’ån-hu para todu i tiempu; guiya esti para u ma’ågang Yu’ ni todu i manmamamaila’ na hinerasion siha.
I finu’ i Saina.
INEPPIN I SÅTMU Ps 103, 1-2. 3-4. 6-7. 8. 11
R. I SAINA KARIÑOSU YAN YO’ASI’.
Anti-hu, tuna i Saina;
interu i tataotåo-hu, bendisi i santus na na’ån-ña.
Anti-hu, tuna i Saina;
cha’-mu maleleffa ni todu i minaolek-ña.
INEPPI…..
Ha asisi’i todu i isåo-mu,
Ha na’hohomlu’ todu i chetnot-mu,
Ha na’lilibri i lina’lå’-mu ginin i naftan,
Ha bendidisi håo ni fiet na guinaiya yan mina’åsi’.
INEPPI…..
I Saina Ha na’siguguru i hustisia,
yan i diretchun todu atyu siha i manmahohoñu’
Ha na’tungu’ si Moises ni fina’pos-ña,
yan i famagu’un Israhet ni mandångkulu na bidå-ña siha.
INEPPI…..
Yo’asi’ yan su’åbi i Saina,
ti chaddik lalålu’, misin Gui’ mina’åsi’.
Sa’ taimanu ha’ na takkilu’ i langit gi hilu’ i tanu’,
taiguennåo ha’ na takkilu’ i kariñu-ña para i mamfiet.
INEPPI…..
SIGUNDU NA TINAITAI 1 Cor 10, 1-6. 10-12
Un tinaitai ginin i fine’na na Kattan San Pablo para i taotåo Corinth
Mañe’lu-hu, malagu’ yu’ na en hahassu håfa masusedi ni mañaina-ta ni dumalalaki si Moises. Todu siha maniståba gi papa’ i pruteksion i mapagåhis, yan todu siha mansåfu manmaloffan gi Tasin Agaga’. Gi halum i mapagåhis yan gi halum i tasi manmatakpångi siha kumu mandisipulun Moises. Todu siha mañotchu ni etmismu espirituåt na pån yan manggimin ni etmismu espirituåt na gimin. Manggimin siha ginin i espirituåt na åtchu’ ni mañisiha
manhånåo; ya atyu na åtchu’ era Guiya i Kristo mismu. Låo ni esti ti nina’maguf si Yu’us ni lamayot påtti giya siha, ya put esti na manmachalapun gi disiettu i manmåtai na tataotåo-ñiha.
Todu esti siha ihemplu para hita, para u na’fanmanhahassu hit na ti para ta malagu’i i manailayi, taimanu i bidan-ñiha. Mungnga hit manggonggung, taimanu bidan unus kuåntu giya siha–ya mandinistrosa siha ni Anghit i Finatai. Todu esti siha manmasusedi nu siha kuentan ihemplu para ottru tåotåo siha, ya manmatugi’ påpa’ para u ta adahi hit. Manlåla’la’ hit gi tiempu ni esta para u fåttu uttimon-ña. Maseha håyi ni hinasson-ña na tumotohgi gui’ fitmi debidi u gof adahi gui’ ya mungnga na u basnak.
I finu’ i Saina.
IBANGHELIU Lk 13, 1-9
R. (todu) U matuna Håo, Asaina Jesukristo, Rai i taihinekkuk na gloria!
V. (tetcha) Ilek-ña i Saina, fanmañotsut, esta måttu i rainun i langit.
+ Un tinaitai ginin i såntu Ibangheliu sigun i tinigi’ San Lucas
Atyu na tiempu, maniståba guennåo unus kuåntu na tåotåo ni sumangåni si Jesus put atyu siha na tåotåo Galileha na si Pilåto ha meskla i haga’-ñiha yan i sakrifisiun-ñiha. Gi ineppen-ña ilek-ña, “Kåo hinassun-miyu na esti siha na tåotåo Galileha i mås mandångkulu na mani’isåo giya Galileha sa’ put i mapadesi esti? Åhi’! Låo bai Hu sangåni hamyu, na en famparehu uttimun-miyu yanggin ti en na’fanunas i lina’la’-miyu. Patsino hassu fan atyu i disi’otchu ni mampininu’ anai basnak i torin Siloam. Kåo gaigi gi hinassun-miyu na mås siha manggái isåo ki atyu siha i mañåsaga giya Hirusalen? Siguru Yu’ na åhi’! Låo bai Hu sangåni hamyu, na todu hamyu siempri en fanaiguennåo uttimun-miyu solu en tutuhun ruminueba i lina’la’-miyu.”
Ha sångan si Jesus esti na fina’akumparasion: “Un tåotåo ni gai trongku figus ni låla’la’ gi gualo’-ña, humuyung para u fanispiha tinekcha’ låo ti mañodda’ ni unu. Ilek-ña nu i hatdineru, ‘Atan ha’! Esta tres åñus di måfåttu Yu’ manispipiha tinekcha’ guini na trongku låo tåya’ sinedda’-hu. Utut påpa’. Put håfa na para u na’basusula ha’ i tånu’?’ Gi ineppen-ña ilek-ña i taotåo, ‘Siñot, sotta ha’ fan ta’lu un åñu ya bai hu guåssan uriyå-ña yan bai hu abunuyi, sa’ siña ha’ buenti manokcha’. Låo yanggin ti manokcha’, pues siempri u ma’utut påpa’.’ “
I Ibangheliun i Saina.
