B
FINENI’NA NA TINAITAI Is 61, 1-2a. 10-11
Un tinaitai ginin i Lepblun i Prufeta as Isaias
I espiritun i Saina as Yu’us gaigi giya guåhu,
sa’ esta i Saina Ha olius yu’;
I Saina Ha na’fåttu yu’ para bai chuli’i na’maguf na nutisia para i manakpapa’,
yan para bai na’fan homlu’ i manggai pininiti
Para bai pruklåma libettåt para i manmapreresu
yan para u fanmasotta i presuneru siha,
Para bai anunsia un åñu na gråsia ginin i Saina
yan un ha’ånin satbasion ginin i Yi’os-ta.
Sumen maguf yu’ gi Saina,
gaigi gi Yi’os-su i minaguf i anti-hu;
sa’ Ha na’minagågu yu’ ni magagun satbasion,
yan Ha balutan yu’ ni chininan hustisia,
kalang i nobiu ni makåtsa ni kuronå-ña,
kalang i nobia ni ma’adotna ni alahås-ña siha.
Taimanu ha’ na i tanu’ ha na’fandodokku’ i tinanum siha,
yan i hatdin ha na’fanlala’chuk hulu’,
Pues taiguennao ha’ lokkui’ i Saina as Yu’us Ha na’lala’chuk
hulu’ i hustisia yan tinina
gi me’nan todu i nasion siha.
I finu’ i Saina.
INEPPIN I SÅTMU (Ps) Lk 1, 46-48. 49-50. 53-54
R. (Is 61: 10b) MUMAGUF I ANTI-HU GI YI’OS-SU.
I kurason-hu ha tutuna i tinakkilu’ i Saina,
I anti-hu mañodda’ minaguf gi as Yu’us i satbadot-tu.
Ha hassu yu’, i humitdi na tentago’-ña,
ya desdi på’gu todu i taotåo u ma’ågang yu’ dichosa.
INEPPI….
Si Yu’us, i todu Ha na’siña mandångkulu siha fina’tinås-ña para guåhu,
ya såntus i Na’ån’-ña;
Ha ma’asisi’i todu siha i muma’añåñagui Gui’,
desdi un kinahulu’ tåotåo asta ottru.
INEPPI….
.
Ha na’fanhåhaspuk i manñålang ni manmåolik siha na kosas,
ya i manriku Ha rititira sin håfa.
Ha kumpli i prumeså-ña ni mañaina-ta,
måttu Gui’ para u ayuda i tentago’-ña as Israhet.
INEPPI….
SIGUNDU NA TINAITAI 1 Th 5, 16-24
Un tinaitai ginin i fine’na na Kattan San Pablo para i taotåo ‘Thessalonica’
Hafañe’lus:
Na’fanmaguf hamyu todu i tiempu, fanmanåyuyut sessu, fanmannå’i agradesimentu gi todu manera. Estigi’ malago’-ña si Yu’us ginin hamyu gi lina’la’-miyu mandadañña’ yan i Kristo as Jesus. Cha’-miyu suheheta i Espiritu Såntu; Cha’-miyu dispreresia i rigålun prufesiha. Fanhassu åntis di un cho’gui una kosa: ya un go’ti håfa måolik ya un suhåyi todu i tailayi.
Puedi si Yu’us ni Ha nåna’i hit pås u na’fañåntus hamyu gi todu manera ya u na’såfu i lina’la’-miyu–i espiritu, i anti, yan i tataotåo–u libri ginin todu i tailayi gi finattun i Saina-ta as Jesukristo. Si Yu’us ni umågang hamyu Guiya para u cho’gui esti, sa’ fiet Gui’.
I finu’ i Saina.
IBANGHELIU Jn 1, 6-8. 19-28
ÅLELUIA Is 61. 1
R. Åleluia. I ESPIRITUN I SAINA GAIGI GI HILO’-HU;
HA NA’HÅNÅO YU’ PARA BAI CHULI’I I MAMOPBLI
NI MAOLIK NA NUTISIA.
R. Åleluia.
+ Un tinaitai ginin i såntu Ibangheliu sigun i tinigi’ San Juan
Iståba un tåotåo ni nina’hånåo as Yu’us ya i na’ån-ña si Juan, måttu kumu tistigu para u tistiguyi i inina, kosa ki ginin guiya todu i taotåo siha u fanmanhonggi låo hokkuk ha’ ni para u tistiguyi i inina, sa’ ti guiya mismu i inina.
I testimoñun Juan anai mana’hånåo i mamåli’ Hudihos yan ‘Levites’ ginin Hirusalen para u mafaisin gui’ “Håyi håo?” Klåru ineppen-ña, “Ti guåhu i Misihas.”
Mafaisin gui’ ta’lu, “Pues håyi håo? Si Elias?” Manoppi gui’, “Åhi’, ti si Elias yu’.” “Kåo hågu i prufeta?” Manoppi gui’, “Åhi’.” Put lusuttimu, ilik-ñiha nu guiya: “Sangåni ham håyi håo kosa ki bai in sangåni atyu i tumågu’ ham put hågu. Håfa para un sångan put hågu?” Manoppi gui’ ya ha sångan håfa sinangån-ña i prufeta as Isaias: “Guåhu i un bos gi disiettu, ume’essalåo: Na’tunas i chalan i Saina!” Atyu siha i mana’fanhånåo ni MamFarisehu makuntinuha mafaisin gui’ mås: “Yanggin ti hågu i Misihas, ni ti si Elias, osino i prufeta, sa’ håfa na manakpåpangi håo?” Manoppi si Juan ya ilek-ña: “Manakpåpangi yu’ ni hanum. Låo guaha gi entalu’-miyu ni ti en tingu’– atyu i para u fåttu dispues di guåhu–ni ti hu miresi pumulå’i ni geddin sandaliås-ña.” Måsusedi esti giya Bitaniha, gi ottru båndan Hotdån, anai manakpåpangi si Juan.
I Ibangheliun i Saina.
