FINENE’NA NA TINAITAI Is 35, 1-6a,10
Un tinaitai ginin i Lepblun i Prufeta as Isaias
I disiettu yan i manånglu’ na tånu’ u fanmaguf; i kansådu na tånu’ u maguf yan u famfloris. Para u famfloris abundånsia, ya u fanmaguf mangånta. Para u fanmanå’i ni glorian Lebanon i ginatbun Catmelo yan Sharon; Para u mali’i’ i glorian i Saina i ginatbun i Yi’os-ta. Na’fanmetgut i kannai ni manyayas, na’famfitmi i temmu siha ni manñaba’, sangåni todu atyu siha i manluluhan kurason-ñiha: Na’fanmatatnga hamyu, mungnga manma’åñåo! Sa’ i Yi’us-miyu, måttu yan i benggånsa; måttu para en fansinatba nu i yini’usan na åpas. Pues i matan i mambåtchit siempri u fanmababa, i talangan i manangnga siempri u fangklåru; pues i mange’yåo siempri u fana’yuk taiguihi i binådu, ya i hila’ i manudu u fangånta.
Atyu siha i Ha na’fanlibri i Saina para u fanhånåo tåtti ya u fanhålum giya Sion mangåkanta, manmakurona ni taihinekkuk na minaguf; para u fanasudda’ kun gustu yan minaguf, ya i trinisti yan i kati siha para u falingu.
I finu’ i Saina.
INEPPIN I SÅTMU Ps 146, 6-7. 8-9. 9-10
R. (Is 35, 4) ASAINA, MAILA’ YA UN NA’FANLIBRI HAM.
I Saina tåya’ nai malingu hininggeñ-ña,
Ha nåna’i hustisia i manmapetsisigi,
yan nengkannu’ para i manñålang.
I Saina Ha sosotta i manmapreresu;
INEPPI…..
I Saina muna’fanmanlili’i’ i mambåtchit.
I Saina Ha håhatsa hulu’ atyu siha i manetekkun påpa’;
i Saina Ha guaiya i manunas.
I SainaHa prutetehi i manistrangheru,
INEPPI…..
Ha susteteni i manai saina yan i mambi’uda,
låo Ha kokontra i kinalamtin i manailayi.
I Saina u fanggubetna para todu i tiempu,
i Yi’os-mu, Sion, para todu i hinerasion!
INEPPI…..
SIGUNDU NA TINAITAI Jas 5, 7-10
Un tinaitai ginin i Kattan Santiago
Intonsis, hafañe’lus, na’fampasensia hamyu asta ki måttu i Saina. Ripåra ha’ taimanu pasensiån-ña i lancheru mientras ha nanangga i gualo’-ña para u prudusi i kusetcha. Pasensia ha nanangga para u hålum i tiempun manenghing yan i tiempun uchan. Hamyu lokkui’ debidi en fampasensia. Cha’-miyu fanhinahalang, sa’ esta hihut i finattun i Saina. Hafañe’lus, mungnga mangeha unu kontra ottru, kosa ki ti en fanhinisga as Yu’us. Esta hihut i Hues, listu para u annuk. Mañe’lu-hu, hahassu i prufeta ni kumuentus gi na’an i Saina. Dalalaki siha kuentan ihemplu ni pasensia masungun anai manmamadedesi siha.
I finu’ i Saina.
IBANGHELIU Mt 11, 2-11
ÅLELUIA Is 61, 1
R. Åleluia. GAIGI I ESPIRITUN I SAINA GIYA GUÅHU;
GUIYA MUNA’HÅNÅO YU’ PARA BAI HU CHULI’I’ I
MAMOPBLI NI MAOLIK NA NUTISIA. R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Iståba si Juan gi tribunåt anai ha hunguk i bidåda-ña siha i Kristo pues ha faisin unu gi mandisipulu-ña para u mafaisin Gui’. “Kåo Hågu atyu i para u fåttu pat para in fanmannangga ottru?” Manineppi siha as Jesus, “Fanhånåo tåtti ya en sangåni si Juan håfa hininguk-miyu yan lini’i’-miyu: manmanli’i’ ta’lu i mambåtchit, manmamokkat ta’lu i mange’yao, manhomlu’ i nasarinu, manmanhunguk i manangnga, manlå’la’ ta’lu i manmåtai, yan manmasetmuni i mamopbli ni Maolik na Nutisia. U matuna i taotåo ni ti mañodda’ dinida giya Guåhu.”
Gigun manhånåo i manmatågu’, Ha tutuhun si Jesus kumuentusi i linahyan tåotåo put si Juan: “Håfa en hanågui guatu gi halum tånu’ para en li’i’? Un råmas håyu ni yineyengyung nu i manglu’? Låo håfa en hanågui para en li’i’? Un tåotåo ni minagågagu chininan finu? I taotåo siha ni taiguennåo magagun-ñiñiha mañåsaga gi palåsyun rai. Låo håfa en hanågui para en li’i’, un prufeta? Un prufeta magåhit, låo mås ki ennåo! Put esti na tåotåo mina’ilek-ña i Iskretura:
Bai Hu na’fofo’na ki Hagu i tentago’-hu
para u pripåra kun tiempu i chalån-mu.
“Åmen, bai Hu asigura hamyu, takkilo’ña si Juan Bautista ki ni håyi ni esta lumå’la’ guini gi tanu’. Låo atyu i mås takpapa’ mafañagu-ña gi Rainun i langit takkilo’ña ki guiya.”
I Ibangheliun i Saina.
