FINE’NE’NA NA TINAITAI Jon 3, 1-5. 10
Un tinaitai ginin i Lepblun i Prufeta as Jonas
Måttu i finu’ i Saina gi as Jonas ilelek-ña: “Hånåo para Nineveh, i dangkulu na siudå, ya un anunsia guennåo i nutisia ni para bai Hu sangåni håo.” Ha na’listu gui’ si Jonas ya humånåo para Nineveh, sigun gi tinagu’ i Saina. Un gof dångkulu na siudå esti iya Nineveh; dinidira tres dihas para u mahanågui desdi un punta asta i ottru. Ha tutuhun si Jonas i hinanåo-ña gi siudå ya un diha ha’ trabiha pinekkåt-ña ha anununsia taiguini, “Kuarenta dihas tetehnan ya siempri mayamak iya Nineveh,” ya manmanhonggi i taotåo Nineveh; mapruklåma umayunat ya interu siha, i manakkilu’ yan i manakpapa’, manminagågu magågun pinitensia.
Anai Ha li’i’ si Yu’us ginin i aksion-ñiha na mabira siha ginin i tailayi na bidan-ñiha, mañotsut Gui’ put i kastigu ni Ha planuyi para u cho’gui nu siha; Ha na’måhñåo.
I finu’ i Saina.
INEPPIN I SÅTMU Ps 25, 4-5. 6-7. 8-9
R. (4) FA’NÅ’GUI YU’ NI CHALÅN-MU, O ASAINA.
Na’tungu’ yu’ ni chalån-mu, O Asaina;
fa’nå’gui yu’ ni pinekkåt-mu.
Pipit yu’ gi minagahet-mu yan fa’nå’gui yu’,
sa’ Hågu Yu’us, i satbadot-tu.
INEPPI…..
Hahassu i mina’ase’-mu yan i guinaiyam-mu, O Asaina;
ni Un fa’nu’i yu’ desdi åntis na tiempu.
Båsta mahassu i isao gi pinatgon-hu;
låo hahassu yu’ solu gi guinaiyam-mu.
INEPPI…..
Måolik yan tunas i Saina,
Ha fa’nunu’i i mani’isåo ni chalan,
Ha pipipit i manhumitdi gi dinanchi na chålan,
yan Ha fa’nåna’gui i manhumitdi ni chalån-ña.
INEPPI…..
SIGUNDU NA TINAITAI 1 Cor 7, 29-31
Un tinaitai ginin i fine’na na Kattan San Pablo para i taotåo ‘Corinth’
Mañe’lu-hu, estigui’ kumeke’ilek-ku, esta kakadada’ i tiempu, ya desdi på’gu para mo’na atyu siha i mangasåo na lalåhi debidi u fanlå’la’ kalang ti manassagua siha; atyu siha i mangåkati, kalang ti mampiniti; atyu siha i mañåchalik, kalang ti manmaguf; atyu siha i manmamåhan, kalang ti iyun-ñiha i finahan-ñiha; atyu siha i maninikukupa ni kosas tånu’, kalang ti mampus maninikukukupa siha. Ti u anåkku’ tiempon-ña esti na tånu’.
I finu’ i Saina.
IBANGHELIU Mk 1, 14-20
ÅLELUIA Mk 1, 15
R. Åleluia. MÅTTU ESTA I TIEMPU, YA ESTA HIHUT I RAINUN YU’US!
TULAIKA I LINA’LA’-MIYU YAN FANMANHONGGI GI MAOLIK NA NUTISIA!
Åleluia.
+ Un tinaitai ginin i såntu Ibangheliu sigun i tinigi’ San Marcos
Dispues di ma’aresta si Juan, humånåo si Jesus para Galileha Ha pruklålama i Maolik na Nutisian Yu’us. Ilek-ña, “Måttu esta i tiempu, ya esta hihut i Rainun Yu’us! Tulaika i lina’la’-miyu yan fanmanhonggi gi Maolik na Nutisia!”
Mientras mamomokkat gi Tasin Galileha, Ha li’i’ si Simon yan i che’lu-ña as Andres mayoyotti i chinchulun-ñiha gi tasi; era peskadot siha. Ilek-ña si Jesus nu siha, “Tattiyi Yu’; ya bai Hu fa’peskadot tåotåo hamyu.” Insigidas ma’abandona i chinchulun-ñiha ya mañåonåo tumattiyi Gui’. Sigi mo’na dididi’, Ha li’i’ si Santiago, i lahin Zebedee, yan i che’lu-ña as Juan. Siha lokkui’ iståba gi botin-ñiha ma’arerekla i chinchulun-ñiha. Maninagang siha guennåo mismu na lugåt. Madingu si tatan-ñiha as Zebedee, ni iståba gi boti yan i hotnaleru-ña siha, ya sumåonåo i dos gi inetnun Jesus.
I Ibangheliun i Saina.
