FINE’NA NA TINAITAI Is 8, 23-9, 3
Un tinaitai ginin i Lepblun i Prufeta as Isaias
Fine’na i Saina Ha disonra i tanu’ Zebulun yan i tanu’ Napthtali;
låo put lusuttimu Ha onra i chalan gi kantun tåsi,
i tanu’ gi sanlagu na båndan Hotdån, i Distritun i ti Hudihos siha.
Tåya’ minaså’pit, i hinemhum mana’suha:
sa’ tåya’ trinisti anai åntis di på’gu guaguaha disgråsia.
I taotåo siha ni ginin manmamomokat gi hinemhum
esta mali’i’ un dångkulu na inina;
Gi hilu’ atyu siha i mañåsaga gi tanu’ hinemhum
esta manina påpa’ un kåndit.
Un chuli’i’ guatu giya siha abundånsia na minaguf
yan dångkulu na alegriha,
Sa’ manmaguf siha gi me’nå-mu taiguihi gi tiempun kusetcha,
taiguihi i taotåo siha manmamaguf yanggin mana’apatti
ni sinakkin-ñiha.
Sa’ i yugu ni humohoñu’ siha,
i pingga gi apågan-ñiha,
Yan i bastun i ma’gas-ñiha
esta munhåyan Un yamak, taiguihi gi ha’ånin Midian.
I finu’ i Saina.
INEPPIN I SÅTMU Ps 27, 1. 4. 13-14
R. I SAINA I ININÅ-HU YAN SATBASION-HU.
I Saina i kandet-tu yan satbasion-hu,
i håyi para bai hu ma’a’ñågui?
I Saina fanlihing i lina’lå’-hu;
i håyi hu ma’a’ñågui.
INEPPI…..
Unu hu gågagåo i Saina;
esti hu aliligåo:
Para bai hu såga gi gima’ i Saina,
todu i ha’ånin i lina’lå’-hu,
Kosa ki siña hu atan i ginatbun i Saina
ya bai hu såga gi gima’ i Saina.
INEPPI…..
Låo hu honggi na siempri bai hu li’i’ i gineftåo i Saina
gi tanu’ i manlåla’la’.
Na’båtbaru håo ya un nangga i Saina;
na’metgut i kurason-mu, ya nangga i Saina.
INEPPI…..
SIGUNDU NA TINAITAI 1 Cor 1, 10-13. 17
Un tinaitai ginin i fine’na na Kattan San Pablo para i taotåo Corinth
Ginin i åoturidåt i Saina-ta as Jesukristo hu gågagåo hamyu todu mañe’lu-hu, para en famparehu sinangan-miyu, ya mungnga na u guaha dinibidi gi entalu’-miyu. Fandañña’ kumu unu, unu gi hanassu yan gi che’chu’. Guaha tåotåo ginin i familian Chloe sumangåni yu’ klåru, mañe’lu-hu, na manatgumementu hamyu. Maila’ ya bai hu sångan taiguini; kada unu giya hamyu ottru klåsi ha såsangan. Unu ilelek-ña, “Si Pablo hu dalalalaki”; i ottru ilelek-ña, “Si Apollos hu dalalalaki”; i ottru ilelek-ña, “Si Pedro hu dalalalaki”; yan i ottru ilelek-ña, “I Kristo hu dalalalaki.” Esta madibidi i Kristo put gurupu siha! Ada måtai si Pablo gi kilu’us put hågu? Kåo manmatakpångi hamyu kumu disipulun Pablo? Ti Ha na’hånåo yu’ i Kristo put i para bai hu fanakpångi. Ha na’hånåo yu’ put i para bai hu kuentus put i Maolik na Nutisia, ya para bai hu kuentus sin bai hu usa manåddung na palåbra, kosa ki ti u inamut i fuetsan i finatai i Kristo gi kilu’us.
I finu’ i Saina.
IBANGHELIU Mt 4, 12-23.
ÅLELUIA Mt 4, 23
R. Åleluia. SUMETMUN SI JESUS PUT I MAOLIK NA NUTISIAN I RAINU,
YA HA NA’FANHOMLU’ TODU SIHA I MANMALÅNGU.
R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Anai Ha hunguk si Jesus na mapresu si Juan, må’pus malak Galileha. Ti sumåga giya Nasaret, låo humånåo ya sumåga Capernaum, un songsung gi fi’un i Hagoin Galileha, gi tanu’ Zebulun yan Naphtali. Ha cho’gui esti para u makumpli i sinangan i prufeta as Isaias:
“Tanu’ Zebulun, yan tanu’ Naphtali, Para i tasi na direksion, gi ottru båndan Hotdan, i tanu’ i MamPagånu giya Galileha!
I taotåo ni manggaigi gi hinemhum u fanmanli’i’ un dångkulu na kåndit! U faninina un ma’lak kåndit atyu siha na tåotåo i mañåsaga gi hemhum na tånu’ finatai! ”
Desdi ennåo na tiempu Ha tutuhun si Jesus sumetmun put i finana’guen-ña: “Fanmañotsut ni isao-miyu, sa’ hihut esta i Rainun i langit!”
Anai mamomokkat si Jesus gi Hagoin Galileha, Ha li’i’ i dos chume’lu na talayeru, si Simon (ni ma’å’agang Pedro) yan i che’lu-ña as Andres ni tumalålaya gi hagoi. Ilek-ña si Jesus nu siha, “Tattiyi Yu’ ya bai Hu fa’nå’gui hamyu manalåya tåotåo.” Ya insigidas masotta i chinchulun-ñiha ya madalalaki Gui’.
Anai sigi mo’na Ha li’i’ ta’lu dos chume’lu, si Santiago yan Juan, i lalåhin Zebedee. Maniståba yan si Zebedee, i tatan-ñiha, gi hilu’ i boti ma’arerekla i chinchulun-ñiha. Ya insigidas masotta i boti yan si tatan-ñiha anai maninagang as Jesus ya madalalaki Gui’.
Ha liliku’i si Jesus todu iya Galileha, mama’nåna’gui gi sinagoga, sumesetmun put i Maolik na Nutisian i Rainu, ya Ha na’fanhomlu’ i taotåo siha ginin todu klåsin chetnut yan minalångu.
I Ibangheliun i Saina.
