FINENE’NA NA TINAITAI Acts 4, 32-35
Un tinaitai ginin i Bidan i Manapostulis
Manun kurason yan un hinassu i kumunidåt i manmanhonggi. Tåya’ giya siha umapudedera gui’ ni håfa na kosas kumu iyon-ña; inlugåt interu i kosas makunsidedera kumu iyun todu. Manestigu i manapostulis kun fuetsa put i resureksion i Saina as Jesus, ya manmanå’i siha dångkulu na rispetu ni todu i taotåo; tåya’ lokkui’ ni unu giya siha gái nisisidåt sa’ todu atyu siha i manggái tanu’ osino manggái gima’ mabendi ya manå’i i manapostulis. dispues manmapåtti sigun gi nisisidat-ñiha.
I finu’ i Saina.
INEPPIN I SÅTMU Ps 118, 2-4. 13-15. 22-24
R. (1) NÅ’I GRÅSIA I SAINA SA’ MÅOLIK GUI’,
TAIHINEKKUK I GINEFLI’E’-ÑA.
Po’lu i gima’ Israhet ya u åluk,
“I ginefli’i’ Yu’us dinidira todu i tiempu.”
Po’lu i gima’ Aaron ya u åluk,
“I ginefli’i’ Yu’us dinidira todu i tiempu.”
Po’lu atyu siha i manma’åñåo ni Saina ya u ma’åluk,
“I ginefli’i’ Yu’us dinidira todu i tiempu.”
INEPPI…..
Dångkulu atburotu-hu ya kumekepoddung yu’,
låo måttu i Saina para u akudi yu’.
I Saina i fuetsåk-ku yan i minetgot-tu,
måttu giya guåhu kumu satbadot.
I ná’maguf yan a’gang na essalåo
mahunguk ginin i tento’ i manmanggånna:
INEPPI…..
I atchu’ ni marichåsa ni atyu siha i manmanhåhatsa
mama’un åtchu’ ni imputtånti gi gima’.
I Saina muna’macho’gui esti;
mambunitu esti siha gi matå-ta.
I Saina fuma’tinas esti na ha’åni;
nihi ya ta fanmaguf på’gu ya ta silebra.
INEPPI…..
SIGUNDU NA TINAITAI 1 Jn 5, 1-6
Un tinaitai ginin i fine’na na kattan San Juan
Mangginifli’e’-hu:
Maseha håyi ni ha honggi na si Jesus Guiya i Misihas patgun Yu’us Gui’; ya maseha håyi ni ha gofli’i’ i Tata ha gofli’i’ i patgon-ña lokkui’. Taiguini para tungo’-ta na ta gofli’i’ i famagu’un Yu’us: yanggin ta gofli’i’ si Yu’us yan ta o’osgi i tinago’-ña siha. I ginefli’i’ as Yu’us kumeke’ilek-ña na ta o’osgi i tinago’-ña siha. Ya esti siha na tinagu’ ti mapput para hita, sa’ kada patgun Yu’us kapås gui’ para u gånna i tanu’. Ya ta gånna i batida kontra i tanu’ ginin i hiningget-ta. Håyi siña gumånna i tanu’? Atyu ha’ na tåotåo i ha honggi na si Jesus Guiya i Lahin Yu’us.
Guiya si Jesukristo atyu i måttu yan i hanum i matakpangeñ-ña yan i haga’ i finatai-ña. Åhi’ ti måttu yan i hanum ha’, låo kuntodu i hanum yan i haga’. Ya i Espiritu mismu tumistigu na magåhit esti, sa’ i Espiritu Guiya i minagåhit.
I finu’ i Saina.
IBANGHELIU Jn 20, 19-31
ÅLELUIA Jn 20, 29
R. Åleluia. TOMÁS, MANHONGGI HÅO GIYA GUÅHU SA’ PUT I UN LI’I’ YU’,
ILEK-ÑA I SAINA;
MANMAGUF ATYU SIHA I TI LUMI’I’ YU’,
LÅO MANMANHONGGI HA’! R. Åleluia.
+ Un tinaitai ginin i såntu Ibangheliu sigun i tinigi’ San Juan
Gi pupuengin atyu i primet na ha’åni gi simåna, maseha manmakandålu ni mandisipulu i pettan atyu na lugåt anai maniståba siha, put i manma’å’ñåo-ñiha ni ManHudihos, måttu si Jesus ya tumohgi gi me’nan-ñiha. Ilek-ña, “I pås u gaigi giya hamyu.” Anai munhåyan Ha sångan esti, mamfina’nu’i siha ni kannai-ña yan i kalaguåk-ña. Manmaguf i mandisipulu anai ma li’i’ i Saina.
Ilek-ña ta’lu, “I pås u gaigi giya hamyu. “Taimanu ha’ na Ha na’hånåo Yu’ si Tåta, taiguennåo ha’ na Guåhu bai Hu na’fanhånåo hamyu.” Pues manhinagungi siha ya ilek-ña “Risibi i Espiritu Såntu. Yanggin en asi’i i isao tåotåo, u fanma’asi’i siha; yanggin ti en asi’i, ti u fanma’asi’i siha.”
Humuyung na si Tomás (ni ma’å’agang “Dinga'”) unu gi Dossi taigui anai måttu si Jesus. Sigi masangåni gui’ ni pumalu na mandisipulu, “In li’i’ i Saina.” Låo manoppi gui’, “Ni nungka na bai honggi ennåo, solu hu li’i’ i matkan luluk gi kannai-ña, ya bai na’hålum i kalulot-tu gi diniluk luluk yan i kannai-hu gi kalaguåk-ña.”
Un simåna maloffan, maniståba ta’lu i mandisipulu gi kuåttu, ya på’gu na biåhi iståba si Tomás. Maseha manmakandådalu i petta siha, måttu si Jesus ya tumohgi gi entalu’-ñiha. Ilek-ña, “I pås u gaigi giya hamyu”; pues ilek-ña as Tomás, “Maila’ ya un rikunosi i kannai-hu ni kalulot-mu. Na’hålum i kannai-mu gi kalaguåk-ku. Cha’-mu mumahehettuk ti manhonggi, låo fanhonggi!” Manoppi si Tomás ya ilek-ña, “Saina-hu yan Yu’os-su!” Dispues ilek-ña si Jesus nu guiya: “Manhonggi håo sa’ put i un li’i’ Yu’. Mandichosu atyu siha i ti lumi’i’ Yu’ låo manmanhonggi.”
Ha cho’gui si Jesus meggai ottru na siñåt siha gi me’nan i mandisipulu-ña, ni ti manmatugi’ påpa’ guini na lepblu. Låo esti siha manmatugi’ para en faninayuda humonggi na si Jesus Guiya i Misihas, i Lahin Yu’us, kosa ki ginin esti na hinenggi en fanggái lina’la’ gi na’ån-ña.
I Ibangheliun i Saina.
