FINE’NA NA TINAITAI Acts 5, 12-16
Un tinaitai ginin i Bidan i Manapostulis
Hafañe’lus: Ginin i kannai i manapostulis, meggai na siñåt yan manna’manman na cho’chu’ manmasusedi gi entalu’ i taotåo siha. Manákumfotma na para u fanasudda’ gi Kahidan Solomon. Ni un tåotåo umatotga sumåonåo gi entalu’-ñiha, maskiseha manmagóf rispéta siha ni taotåo. Sin imbåtgu mås memeggai manmanhonggi, låhyan na famalåo’an yan lalåhi manhåhanåo guatu gi Saina. I taotåo siha manma’u’uma i malångun-ñiha para i chalan ya mana’fanå’assun siha gi hilu’ kåma yan guåfak kosaki yanggin maloffan si Pedro maseha i anineng-ña u tinampi unu pat ottru giya siha. Låhyan na tåotåo ginin i sengsung siha gi uriyan Hirusalen mandadaña’ lokkui’, manmakokoni’ i malångun-ñiha yan atyu siha i maninatburorota ni manáplacha’ na espiritu, ya todu mana’fanhomlu’.
I finu’ i Saina.
INEPPIN I SÅTMU Ps 118, 2-4. 13-15. 22-24
R. NÅ’I GRÅSIA I SAINA SA’ MÅOLIK GUI’,
YA TAIHINEKKUK I GINEFLI’E’-ÑA.
Po’lu i gima’ Israhet ya u åluk,
“I ginefli’i’ Yu’us dinidira todu i tiempu.”
Po’lu i gima’ Aaron ya u åluk,
“I ginefli’i’ Yu’us dinidira todu i tiempu.”
Po’lu atyu siha i manma’å’ñao ni Saina ya u ma’åluk,
“I ginefli’i’ Yu’us dinidira todu i tiempu.”
INEPPI…..
Dångkulu atburotu-hu ya kumekepoddung yu’,
låo måttu i Saina para u akudi yu’.
I Saina i fuetsåk-ku yan minetgot-tu,
måttu giya guåhu kumu satbadot.
I na’maguf yan a’gang na essalåo
mahunguk ginin i tento’ i manmanggånna.
INEPPI…..
I atchu’ ni marichåsa ni atyu siha i manmanhåhatsa
mama’un atchu’ ni imputtånti gi gima’.
I Saina muna’macho’gui esti;
mambunitu esti siha gi matå-ta.
I Saina fuma’tinas esti na ha’åni;
nihi ya ta fanmaguf på’gu ya ta silebra.
INEPPI…..
SIGUNDU NA TINAITAI Rv 1, 9-11. 12-13. 17-19
Un tinaitai ginin i Lepblun Rebelasion
Hafañe’lus:
Guåhu si Juan, i che’lun-miyu, ya kumu hu dalalalaki si Jesus manhihita sumungun gi pinasensia i pinadesi ni manmåfattu gi atyu siha i iyun i Raino-ña. Mapo’lu yu’ giya Patmos na isla sa’ put i hu pruklåma i finu’ Yu’us yan i minagåhit ni Ha na’matungu’ si Jesus. Gi ha’anin i Saina i Espiritu Ha maneha i lina’lå’-hu, ya hu hunguk un a’gang na bos, ni kalang kutneta sunidu-ña, kumuekuentus gi santattek-ku. Ilek-ña, “Tugi’ påpa’ håfa lini’e’-mu.” Hu bira yu’ para bai hu li’i’ håyi kumuentutusi yu’, ya hu li’i’ sietti ni oru na sa’ang fållut, ya iståba gi entalu’ esti siha una kosa na kalang figuran tåotåo, ni minagågagu anåkku’ asta i addeng-ña, yan sininturoron oru gi ha’óf-ña.
Anai hu li’i’ Gui’, poddung yu’ påpa’ gi addeng-ña kalang un måtai na tåotåo. Ha patcha yu’ ni agapa’ na kannai-ña ya ilek-ña, “Cha’-mu ma’å’a’ñåo! Guåhu i fine’na yan i uttimu. Guåhu atyu i låla’la’! Ginin måtai Yu’, låo låla’la’ Yu’ på’gu para todu i tiempu. Guaha åoturidåt-tu ni finatai yan i tanu’ i finatai. Intonsis, tugi’ påpa’ i un li’i’ siha na sinisedi, atyu siha i manmasusesedi på’gu yan atyu siha i para u fanmasusedi dispues.
I finu’ i Saina.
IBANGHELIU Jn 20, 19-31
ÅLELUIA Jn 20, 19-20
R. Åleluia. MANHONGGI HÅO GIYA GUÅHU, TOMAS, SA’ PUT I
UN LI’I’ YU’;
MANMAGUF ATYU SIHA I TI LUMI’I’ YU’, LÅO
MANMANHONGGI HA’! R. Åleluia.
+ Un tinaitai ginin i såntu Ibangheliu sigun i tinigi’ San Juan
Gi pupuengin atyu i primet na ha’åni gi simåna, maseha manmakandålu ni mandisipulu i pettan atyu na lugåt anai maniståba siha, put i manma’å’ñåo-ñiha ni ManHudihos, måttu si Jesus ya tumohgi gi me’nan-ñiha. Ilek-ña, “I pås u gaigi giya hamyu.” Anai munhåyan Ha sångan esti, mamfina’nu’i siha ni kannai-ña yan i kalaguåk-ña. Manmaguf i mandisipulu anai mali’i’ i Saina. Ilek-ña ta’lu, “I pås u gaigi giya hamyu. “Taimanu ha’ na Ha na’hånåo Yu’ si Tåta, taiguennåo ha’ na Guåhu bai Hu na’fanhånåo hamyu.” Pues manhinagungi siha ya ilek-ña: “Risibi i Espiritu Såntu. Yanggin en asi’i i isao tåotåo, u fanma’asi’i siha; yanggin ti en asi’i, ti u fanma’asi’i siha.”
Humuyung na si Tomás (ni ma’å’agang “Dinga”) unu gi Dossi taigui anai måttu si Jesus. Sigi masångani gui’ ni pumalu na mandisipulu, “In li’i’ i Saina.” Låo manoppi gui’, “Ni nungka na bai hu honggi ennåo, solu hu li’i’ i matkan luluk gi kannai-ña, ya bai na’hålum i kalulot-tu gi diniluk luluk yan i kannai-hu gi kalaguåk-ña.”
Un simåna maloffan, maniståba ta’lu i mandisipulu gi kuåttu, ya på’gu na biåhi iståba si Tomás. Maseha manmakandådalu i petta siha, måttu si Jesus ya tumohgi gi entalu’-ñiha. Ilek-ña, “I pås u gaigi giya hamyu”; pues ilek-ña as Tomás, “Maila’ ya un rikunosi i kannai-hu ni kalulot-mu. Na’hålum i kannai-mu gi kalaguåk-ku. Cha’-mu mumahehettuk ti manhonggi, låo fanhonggi!”
Manoppi si Tomás ya ilek-ña, “Saina-hu yan Yu’os-su!” Dispues ilek-ña si Jesus nu guiya:
“Manhonggi håo sa’ put i un li’i’ Yu’.
Mandichosu atyu siha i ti lumi’i’ Yu’ låo manmanhonggi.”
Ha cho’gui si Jesus meggai ottru na siñåt siha gi me’nan i mandisipulu-ña, ni ti manmatugi’ påpa’ guini na lepblu. Låo esti siha manmatugi’ para en faninayuda humonggi na si Jesus Guiya i Misihas, i Lahin Yu’us, kosaki ginin esti na hinenggi en fanggái lina’la’ gi na’ån-ña.
I Ibangheliun i Saina.
