A
FINENE’NA NA TINAITAI Gn 12, 1-4a
Un tinaitai ginin i Lepblun Genesis
Ilek-ña i Saina as Abram:
“Huyung ya un hånåo ginin i tanu’ i mamparintes-mu yan ginin i gima’ tatå-mu para guatu gi un tånu’ ni para bai Hu fa’nu’i håo. Bai Hu na’huyung ginin hagu un dångkulu na nasion, ya bai Hu bendisi håo; bai Hu na’takkilu’ i na’ån-mu kosa ki siña u fanetcha bendision. Bai Hu bendisi atyu siha i bumendisi håo, bai Hu matdisi atyu siha i mumatdisi håo. Todu i kumunidåt i tanu’ u masodda’ i bendision giya hågu.”
Må’pus si Abram taimanu i tinago’-ña i Saina nu guiya.
I finu’ i Saina.
INEPPIN I SÅTMU Ps 33, 4-5. 18-19. 20. 22
R. (22) ASAINA, NA’FÅTTU I MINA’ASE’-MU GIYA HAMI,
YÅ KI MANMANANGOKKU HAM GIYA HÅGU.
Sa’ tunas i finu’ i Saina;
ya todu i che’cho’-ña siha angokkuyun.
I Saina Ha guaiya i hustisia yan tininas
yan Ha na’bula i tanu’ ni minaolek-ña
INEPPI…..
Atan ha’ sa’ gaigi i matan i Saina gi rumibirerensia Gui’,
hilu’ atyu siha i manmanangokku nu i yine’ase’-ña,
Para u nina’fanlibri siha ginin i finatai,
ya u famprinitehi siha achukka’ tiempun ha’ilas.
INEPPI…..
I anti-ta ha nanangga i Saina,
Guiya ni ayudantet-ta yan pruteksion-ta.
Puedi u gaigi giya hami i yine’ase’-mu, Asaina;
hami ni pumopo’lu i inangokkun-måmi giya Hågu.
INEPPI…..
SIGUNDU NA TINAITAI 2 Tm 1, 8b-10
Un tinaitai ginin i sigundu na Kattan San Pablo para si Timothy
Mangginifli’e’-hu:
Kåtga i pattem-mu pinadesi put i Maolik na Nutisia, sa’ ninana’i håo as Yu’us minetgut
put esti.
Esta Ha såtba hit yan Ha ågang hit para tåotåo-ña, åhi’, ti put i guaha bidå-ta, låo put i minalago’-ña yan i grasiå-ña. Ha nå’i hit ni esti na gråsia put i Kristo Jesus åntis di i tutuhun i tiempu, låo på’gu esta manmasangåni hit put i finattun i Satbadot-ta i Kristo Jesus. Esta Ha na’påra i nina’siñan i finatai yan Ha na’matungu’ ginin i ibangheliu i taihinekkuk na lina’la’.
I finu’ i Saina.
IBANGHELIU Mt 17, 1-9
(Todus) U matuna Håo, Asaina Jesukristo, Rai i taihinekkuk na gloria!
(Tetcha) Mahunguk i bos i Tata ginin i ma’lak na mapagåhis:
Guiya esti i Hu guaiya na Lahi-hu, ekkunguk Gui’.
+ Un tinaitai ginin i såntu Ibangheliu sigun gi tinigi’ San Mateo
Ha konni’ si Jesus si Pedro, yan i dos chume’lu as Juan yan Santiago, hulu’ gi un takkilu’ na oksu’ sabåna mañisiha ha’ na maisa. Mientras ma’a’atan Gui’, matulaika figurå-ña: muma’lak i matå-ña taiguihi i atdao, ya umå’paka’ i magagu-ña kalang kåndit. Dispues, i tres na mandisipulu mali’i’ si Moises yan Elias manguekuentus yan si Jesus. Intonsis kumuentus si Pedro ya ilek-ña as Jesus, “Asaina, mansuetti sa’ manggaigi hit guini; yanggin malagu’ Håo, bai hu fanhåtsa tres na palapåla guini, unu para Hågu, unu para si Moises, yan unu para si Elias.” Mientras kumuekuentus, mantinampi siha ni un låmlam na mapagåhis ya un bos ginin i mapagåhis ilek-ña: “Guiya esti i Hu gufli’i’ na Lahi-hu, i muna’mamaguf Yu’–ekkunguk Gui’!” Anai mahunguk i bos ni mandisipulu nina’fansen ma’å’ñåo siha ya manoppup påpa’ gi edda’. Malak guatu si Jesus giya siha ya mampinatcha. Ilek-ña, “Fangahulu’, Cha’-miyu fanma’å’a’ñåo!” Pues anai manalakhilu’ tåya’ ottru lini’i’-ñiha fuera di si Jesus.
Anai manotutunuk ginin i eksu’ sabåna maninetdin siha as Jesus, “Cha’-miyu fane’e’sangani ni håyi put esti i lini’i’-miyu asta ki mana’lå’la’ ta’lu i Lahin i Taotåo ginin i finatai.”
I Ibangheliun I Saina.
