FINE’NE’NA NA TINAITAI Gen 22, 1-2. 9a. 10-13. 15-18
Un tinaitai ginin i Lepblun Genesis
Chinagi si Abrahan as Yu’us. Ha ågang gui’ ya ilek-ña, “Abrahan!” Manoppi si Abrahan, “Listu yu’!” Dispues ilek-ña si Yu’us: “Konni’ i uniku na lahi-mu ni un guaiya ya en hanåo para iya Moriah na tånu’. Guennåo nai un ufresi gui’ kumu masosonggi na inifresi gi hilu’ un oksu’ ni para bai tanchu’i’ håo.
Anai måttu siha gi lugåt ni mansinangåni as Yu’us, mama’tinas si Abrahan un åttat ya ha arekla i hayu gi sanhilu’. Dispues ha istira i kannai-ña ya ha chuli’ i se’si’ para u punu’ i lahi-ña. Låo inagang gui’ ni tentågu’ i Saina ginin i langit, “Abrahan, Abrahan!” Manoppi si Abrahan, “Estgui’ yu’, Asaina”. Manoppi i tentågu’, “Cha’-mu na’fåfattu i kannai-mu gi patgun. Cha’-mu cheche’gui ni håfa giya guiya. På’gu nai Hu tungu’ na dångkulu dibusion-mu as Yu’us, sa’ ti un chatagui Yu’ ni un guaiya na lahi-mu mismu.” Anai ha atan si Abrahan i uriyå-ña, ha li’i’ un låhi na kinilu ni gågaddun kanghilong-ña gi råmas. Intonsis humånåo ya ha konni’ i kinilu ya ha songgi kumu masosonggi na inifresi inlugåt di i lahi-ña.
Inagang ta’lu si Abrahan ni tentågu’ i Saina ginin i langit ya ilek-ña: “Ilek-ña i Saina, bai fanhula giya guåhu mismu, na yåki taiguennåo bidå-mu na ti un chatagui Yu’ ni un guaiya na lahi-mu, bai Hu na’misin i bendision-hu nu hågu ya bai Hu na’låhyan i disendensiåm-mu kalang i istreyas gi langit yan i inai gi kantun tåsi; i disendensiåm-mu u magånna i trångkan i inimigun-ñiha siha, ya todu i nasion siha gi tanu’ u masodda’ bendision gi disendensiåm-mu—todu esti siha sa’ put i un osgi i tinago’-hu.”
I finu’ i Saina.
INEPPIN I SÅTMU Ps 116, 10. 15. 16-17. 18-19
R. (Ps 116, 9) BAI HU FAMOKKAT GI ME’NAN I SAINA,
GI TANU’ I MANLÅLA’LA’.
Ti pumåra yu’ manhonggi, achukka’ anai ilek-ku,
“Mampus bula pinadesi-hu!”
Guaguan gi me’nan i Saina
i finatai i mamfiet nu Guiya.
INEPPI…..
Asaina, guåhu i tentago’-mu,
i tentago’-mu, i patgun i tentago’-mu;
Hågu sumåtba yu’ ginin i finatai.
Bai hu fanufresi sakrifisiun agradesimentu
ya bai hu ågang i na’an i Saina.
INEPPI…..
Bai hu apåsi i Saina ni prumiså-hu
gi me’nan todu i taotåo-ña.
Gi santuåriu gi Templom-mu Asaina,
giya Hirusalen.
INEPPI…..
SIGUNDU NA TINAITAI Rom 8, 31b-34
Un tinaitai ginin i Kattan San Pablo para i taotåo Roma
Hafañe’lus:
Yanggin manhihita yan si Yu’us, håyi siña kumontra hit? Siguru na ti u kontra hit si Yu’us sa’ Guiya ti Ha chatagui hit ni mismu Lahi-ña, låo Ha ufresi Gui’ para hita todus! Ombris Ha nå’i hit ni Lahi-ña–pues kåo ti para U nå’i hit ni todu i malago’-ta?
Håyi para u akusa i inatyik Yu’us na tåotåo siha? Si Yu’us mismu Ha diklåra na ti manisåo siha! Pues håyi para u fangkinindena siha? Ti i Kristo Jesus ni måtai, osino lumå’la’ ta’lu ginin i finatai ya gaigi Gui’ på’gu gi agapa’ na bandan Yu’us, manånayuyut Gui’ put hita!
I finu’ i Saina.
IBANGHELIU Mk 9, 2-10
(Todus) U matuna Håo, Asaina Jesukristo, Rai i taihinekkuk na gloria!
(Tetcha) Mahunguk i bos i Tata ginin i ma’lak na mapagåhis:
Estigui’ i Hu guaiya na Lahi-hu; ekkunguk Gui’.
+ Un tinaitai ginin i såntu Ibangheliu sigun i tinigi’ San Marcos
Ha konni’ si Jesus si Pedro, si Santiago yan si Juan mañisiha ha’ ya manhånåo hulu’ gi un takkilu’ na oksu’. Matulaika figurå-ña gi me’nan-ñiha, ya i magagu-ña låmlam a’pakå’ña–mås ki håfa na klåsin fina’gåsi. Umannuk si Elias sumisiha yan si Moises; mangumbetsasiosion yan si Jesus. Intonsis si Pedro ha kuentusi si Jesus, “Ma’estru, i na minaolik na manggaigi hit guini. Nihi ya ta fanmanhåtsa palapåla guini na lugåt, unu para Hågu, unu para si Moises, yan unu para si Elias.” Ti ha gof tungu’ håfa ha såsangan, sa’ interu siha nina’fansen luhan. Måttu un mapagåhis ya mantinampi siha, ya un bos ginin i mapagåhis ilek-ña, “Guiya esti i Lahi-hu, i Hu gofli’i’. Ekkunguk Gui’.” Gigun ma’atan i uriyan-ñiha tåya’ lini’i’-ñiha–si Jesus ha’.
Anai manototunnuk ginin i eksu’, Ha gof ingkåtga siha na cha’-ñiha fane’esangåni ni håyi håfa lini’i’-ñiha asta ki lumå’la’ ta’lu i Lahin i Taotåo ginin i finatai. Makumpli esti na sinangån-ña, mientras sigi ha’ di madiskuti håfa kumeke’ilekña, “lina’la’ ta’lu ginin i finatai”. I Ibangheliun i Saina.
