B
FINENI’NA NA TINAITAI Is 40, 1-5. 9-11
Un tinaitai ginin i Lepblun i Prufeta as Isaias
Kunsuela i taotåo-hu, kunsuela siha,
ilek-ña i Yi’os-mu.
Kuentusi suåbi iya Hirusalen, yan sangåni gui’
na esta nahung pinadesin-ñiha,
esta manma’asi’i i isao-ñiha;
Magåhit, esta marisibi ginin i kannai i Saina
dos buettas put i isao-ñiha siha.
Un bos umå’agang:
Pripåra gi disiettu i chalan i Saina!
na’tunas un chålan gi disiettu para i Yi’os-ta!
Todu i kannat u fanmatåtni,
todu i sabåna yan i eksu’ u mana’fanákpapa’;
I bastus na tånu’ u mana’finu,
i barångka na lugåt, u fama’ un ånchu na kañåda.
Dispues nai u mana’annuk i glorian i Saina,
ya todu i taotåo siha u fanchágigu mali’i’;
sa’ esta kumuentus i pachut i Saina.
Hånåo hulu’ gi un takkilu’ na sabåna,
Sion, hågu ni chumuchuli’ i na’maguf na nutisia;
Essalåo kuåntu i siña, Hirusalen,
hågu ni chumuchuli’ i maolik na nutisia!
Cha’-mu ma’å’a’ñåo umessalåo
yan sangåni i siudå siha giya Hudah:
I Yi’us-miyu!
Estigi’ na mamamaila’ yan fuetsa,
i Saina as Yu’us.
ni manggubebetna ginin i minetgut i kannai-ña;
Ha chuchuli’ i premiu,
yan i apås-ña mofo’na gi me’nå-ña.
Ha na’fañotchu i ga’-ña kinilu kalang i pastot;
Ha rikokohi i tatnerun kinilu,
Ha hohogui gi kannai-ña,
yan Ha gigiha i nanan kinilu siha.
I finu’ i Saina.
INEPPIN I SÅTMU Ps 85, 9-10. 11-12. 13-14
R. ASAINA, NA’LI’I’ HAM NI YINE’ASE’-MU,
YAN NÅ’I HAM NI SATBASION-MU.
Bai hu ékkunguk håfa Ha pruklåma si Yu’us;
sa’ i Saina Ha pruklåma pås para i taotåo-ña,
Hihut esta i satbasion para i mamfiet;
u bula rikesa gi tano’-ta.
INEPPI….
U asudda’ i guinaiya yan i minagåhit;
u áchiku i hustisia yan i pås.
U petsan huyung i minagåhit ginin i tanu’;
ya u talakpapa’ ginin i langit i hustisia.
INEPPI….
I Saina u chuda’ påpa’ i bendision-ña;
ya u bula kusetchåñ-ña i tano’-ta.
U fofo’na i rikesa gi me’nån i Saina,
yan i satbasion gi uriyan i pinikkåt-ña.
INEPPI….
SIGUNDU NA TINAITAI 2 Pt 3, 8-14
Un tinaitai ginin i sigundu na Kattan San Pedro
Låo cha’-miyu, hafañe’lus, fanmaleleffa ni esti! Tåya’ difirensia gi me’nan i Saina i un diha yan mit åñus; parehu ha’ esti i dos para Guiya. Guaha na tåotåo siha ilik-ñiñiha na ñating si Yu’us Ha kumpli i prumiså-ña. Inlugåt di esti, mampinasinsiåsiayi hamyu, sa’ ti malagu’ na u guaha madistrosa, låo malagu’ Gui’ na u ma bira siha ginin i isao-ñiha. Låo i Ha’anin i Saina siempri måttu kalang i sakki. Guennåo na Ha’åni nai siempri u falingu i langit ni un diduk na buruka, yan todu i nina’huyung långit siempri mangkimason yan manmadistrosa, ya i tanu’ yan todu i manmacho’gui guennåo siha siempri u fanannuk.
Put i todu esti siha u fanmadistrosa gi taiguini na manera, håfa na klåsin tåotåo para humuyung-miyu? I lina’la’-miyu debidi u såntus yan dibotu as Yu’us, mientras en nanangga i Ha’ånin Yu’us ya che’gui todu i nina’siñan-miyu para u fåttu chaddik i Ha’åni anai i langit u fangkimåson yan u fanmadistrosa, ya i nina’huyung långit u fanlágu’ ni minaipi. Låo hita ta nanangga atyu i Ha prumeti si Yu’us: nuebu na långit yan nuebu na tånu’, anai para u fañåga i manunas. Intonsis, håfañe’lus, mientras en nanangga atyu na Ha’åni, che’gui kuåntu i siña para en fanggåsgas yan fanai isåo gi me’nan Yu’us para en fampås yan Guiya.
I finu’ i Saina.
IBANGHELIU Mk 1, 1-8
ÅLELUIA Lk 3, 4. 6
R. Åleluia. NA’LISTU I CHALAN I SAINA, NA’TUNÅSI GUI’ UN
CHÅLAN NI PARA U PUKÅTI;
TODU I TAOTÅO SIHA U MALI’I’ I SATBASION NI
GININ AS YU’US.
R. Åleluia.
+ Un tinaitai ginin i såntu Ibangheliu sigun i tinigi’ San Marcos
Estigi’ i Maolik na Nutisia put si Jesukrito, i Lahin Yu’us.
Matugi’ gi Lepblun i Prufeta as Isaias:
“Hu na’hånåo i tentågo’-hu mofo’na ki Hagu
para u pripåra i chalån-mu:
un tentågu’ ume’essalåo gi disiettu,
“Na’listu i chalan i Saina,
fa’tinåsi Gui’ un tunas na chålan.”
Pues taiguini na umannuk si Juan Bautista gi disiettu sumesetmun put i tinakpångin sinetsut ni ha na’fåfattu i inasi’in i isao siha. Todu i taotåo siha gi uriyan Hudeha yan i taotåo Hirusalen låhyan manhånåo huyung para as Juan. Mantinakpåpangi siha gi Sadduk Hotdån mientras
makomfisatñañaihun i isao-ñiha. Minagågagu si Juan ni pilun kameyu, yan sininturoron kueru. Apatcha’ yan miet halum tånu’ nana’-ña. Estigi’ sinangån-ña gi setmon-ña, “Para u fåttu unu dispues di guåhu ni metgotña ki guahu. Ti hu miresi dumiluk på’pa” para bai hu pula’ i geddin i sandaliås-ña. Esta hu takpångi hamyu ni hanum; låo Guiya para en fantinakpångi ni Espiritu Såntu.”
I Ibangheliun i Saina.
