FINE’NA NA TINAITAI Is 11. 1-10
Un tinaitai ginin i Lepblun i Prufeta as Isaias
Atyu na ha’åni u dokku’ un sinisu ginin i hali’ Jesse
ya ginin i hale’-ña un sinisu para u famfloris.
I espiritun i Saina para u såga giya Guiya:
i espiritun tinemtum yan kinemprendi,
I espiritun kunsehu yan minetgut,
i espiritun tiningu’ yan mina’åñåo ni Saina,
ya i minagof-ña u gaigi gi mina’åñåo i Saina.
Ti ginin i lini’e’-ña na para u fanhusga
osino ti ginin i hiningok-ña na para u fandisidi.
Inlugåt, para u husga i pepbli kun hustisia,
yan para u disidi kun diretchu i manna’masi’ gi tanu’.
Para u sakudi i malamåña ni balas i pachot-ña
ya i hinagung i labios-ña para u punu’ i manailayi.
I hustisia para godden-ña gi sinturå-ña
ya i finiet-ña para sinturon-ña gi atayo’-ña.
Pues i lobu para kumbitin i kinilu,
yan i tigiri para u åssun påpa’ yan i patgun kinilu;
Para u siha lumiliku’ i tatnerun guaka yan i patgun lion,
ya i dikiki’ na påtgun para u dirihi siha.
Para u bisinu i guaka yan i osu,
ya i famagu’un-ñiha u fandañña’ yanggin mandiskånsa.
i lion para u boka sakåti taiguihi i nubiyu.
I neni para u hugåndu gi chenchun kulepbla,
ya i patgun para u po’lu i kannai-ña gi halum i chenchun saligåo.
Para u tåya’ nina’låmin pat minayamak gi todu i santus na sabanå-hu;
sa’ put i tanu’ ni para u mana’bula nu i tiningu’ i Saina,
taiguihi i hanum ni ha tåtampi i tasi.
Guennåo na ha’åni,
I hali’ Jesse,
u la’chuk hulu’ kalang un siñåt para todu i nasion siha.
Para u ma’aligåo ni ti ManHudihos
sa’ i sagå-ña gloriosu.
I finu’ i Saina.
INEPPIN I SÅTMU Ps 72, 1-2. 7-8. 12-13. 17
R. (7) U LÅ’LA’ I HUSTISIA GI TIEMPOÑ-ÑA,
YAN I KABÅLIS NA PÅS PARA TODU I TIEMPU.
O Yu’us, fa’nå’gui i rai manhusga taiguihi yanggin manhusga Håo;
yan i lahi-ña nå’i ni hustisia ginin Hagu;
Kosa ki u gubetna i taotåo-mu kun hustisia,
yan i manmamadedesi ni manunas na disision,
INEPPI…..
U måmta’ i rikesa gi tiempoñ-ña,
meggai na rikesa, asta ki ti u fanina i pilan.
U fanggubetna desdi un tåsi asta ottru tåsi,
yan desdi i sadduk asta i puntan tånu’.
INEPPI…..
Sa’ Guiya u na’fanlibri i mamopbli yanggin mangåti,
i manmamadedesi ni tåya’ para u faninakudi siha.
Guiya u gai ma’asi’ ni manakpapa’ yan i mamopbli
ya Guiya u na’fanlibri i lina’la’ i manåya’.
INEPPI…..
U matuna i na’åñ-ña todu i tiempu;
mientras gagaigi i atdåo u gagaigi i na’åñ-ña.
Giya Guiya nai u fanmabendisi todu i taotåo i tanu’;
todu i nasion siha u mapruklåma i minagof-ña.
INEPPI…..
SIGUNDU NA TINAITAI Rom 15, 4-9
Un tinaitai ginin i Kattan San Pablo para i taotåo Roma
Hafañe’lus:
Todu i manmatugi’ gi iskritura manmatugi’ para u fa’nå’gui hit, kosa ki u ta fanmanangokku ginin i pinasensia yan put i ha abibiba hit i Iskritura. Ya puedi si Yu’us, ni ginin Guiguiya mågi i pinasensia yan Guiya umabibiba hit, en faninayuda para u famparehu hinassun-miyu put i en dalalalaki i ihemplun i Kristo Jesus, kosa ki todus hamyu ni mandadaña’ siña en tina gi un bos i Yi’os yan Tatan i Saina-ta as Jesukristo.
Intonsis, fana’aksepta unu yan ottru, para i glorian Yu’us, taimanu ha’ na esta maninaksepta hamyu ni Kristo. Hu sangångani hamyu na i Kristo ha cho’gui setbisiu gi lina’lå’-ña put para u na’mali’i’ i ManHudihos na fiet si Yu’us, para u kumpli i prumiså-ña para i mañainan-ñiha, yan para u fansiña i MamPagånu lokkui’ u matuna si Yu’us put i mina’ase’-ña. Taimanu ha’ ilek-ña i iskritura,
“Intonsis bai hu tuna Håo entri i MamPagånu ,
bai hu kånta tinina para Hågu.”
I finu’ i Saina.
IBANGHELIU Mt 3, 1-12
ÅLELUIA Lk 3, 4. 6
R. Åleluia. PRIPÅRA I CHALAN I SAINA, NA’FANUNAS I
CHALÅN-ÑA SIHA:
TODU I TAOTÅO U MALI’I’ I SATBASION YU’US. R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Anai måttu si Juan Bautista kumu sisetmun gi disiettun Hudeha, taiguini sinangån-ña: “Fanmañotsut! Esta hihihut i rainun Yu’us.” Put Guiya na i prufeta as Isaias kumuentus ya ilek-ña,
“Un bos gi disiettu ume’essalåo:
Pripåra i chalan i Saina,
na’fanunas i chalån-ña siha.”
Minagågu si Juan ni chinina ni mafa’tinas ginin i pilun kameyu yan sininturoron kueru. Apatcha’ yan miet halum tånu’ nana’-ña. Manmåttu guatu gi as Juan tåotåo siha ginin Hirusalen, ginin todu i distritun Hudeha, yan ginin todu i bånda ni manhihut gi Sadduk Hotdån. Mantinakpåpangi siha gi Sadduk Hotdån mientras makomfisatñañaihun i isao-ñiha.
Anai ha li’i’ si Juan na meggai na MamFarisehu yan Sadducee manhåhanåo mo’na para u fanmatakpångi, ilek-ña nu siha: “Kalang hamyu inetnun saligåo! Håyi hamyu umabisa para en suhåyi i kastigun Yu’us ni mamamaila’? Che’gui esti siha ya u annuk na magåhit na manmañotsut hamyu. Ya cha’-miyu pepe’lu na yanggin en sangan na Si Abrahan gaigi kumu tatan-måmi. Bai hu sangåni hamyu na siña si Yu’us numa’dokku’ tinatti para si Abrahan ginin esti na åtchu’ siha. Listu i gachai para u utut påpa’ i trongku gi hali’. Kada trongku ni ti manonokcha’ u ma’utut ya u madåggåo guatu gi guafi. Hånum takpangengek-ku nu hamyu put i para en na’annuk na manmañotsut hamyu låo atyu i para u fåttu dispues di guåhu mås minina’siña ki guahu. Ni ti hu miresi para hu katgåyi Gui’ ni sandaliås-ña. Guiya para en fantinakpångi ni Espiritu Såntu yan i guafi. Ha gogo’ti gi kannai-ña i ge’ha para ki siña u na’gåsgas i sagan manggugan, ya u na’dañña’ i kine’ku’ trigu gi dipositu låo i lassas u masonggi gi taihinekkuk na guåfi.”
I Ibangheliun i Saina.
