Un tinaitai ginin i Lepblun i Prufeta as Malakias Mal 3, 1-4
I todu Ha na’siña na Saina ilekña, “Bai na’hånåo i tentago’-hu para u pripåra un chålan para Guåhu. Atyu nai i Saina ni un ispipiha gotpi ha’ u fåttu gi Templon-ña. I tentago’-ña ni un malagugu’i lumi’i’ u fåttu para u pruklåma i kuntratå-hu.”
Låo håyi para u siningun atyu na ha’åni yanggin måttu? Håyi para u lå’la’ yanggin umannuk Gui’? Siempri parehu Gui’ yan i fetti na habbun, kalang i guafi ni ha kukula i liluk. Guiya para u fåttu para u fanhusga taiguihi i numana’gasgas yan mangungula plåta. Taimanu ha’ i plateru ni ha kukula i plåta yan i oru, taiguennåo ha’ i tentågu’ i Saina para u kula i mamåli’, kosa ki u machuli’ guatu gi Saina i mandinanchi na inifresi. Ennåo nai siempri nina’maguf Gui’ ni inifresin i taotao Huda yan Hirusalen taimanu ha’ gi manmaloffan na tiempu.
I finu’ i Saina.
INEPPIN I SÅTMU Ps 24, 7. 8. 9. 10
R. (8) HÅYI ESTI I TAKKILU’ NA RAI? GUIYA I SAINA!
Baba atbettu i trångka;
baba i antigu na potta siha,
ya u hålum i takkilu’ na rai.
INEPPI…
Håyi esti i takkilu’ na rai?
Guiya i Saina, metgut gi gera,
i Saina, metgut gi batida.
INEPPI…
Baba atbettu i trångka;
baba i antigu na potta siha,
ya u hålum i takkilu’ na rai.
INEPPI…
Håyi esti i takkilu’ na rai?
I manggånna na Saina—
Guiya i takkilu’ na rai.
INEPPI…
SIGUNDU NA TINAITAI Heb 2, 14-18
Un tinaitai ginin i Katta para i ManHibrehu
Put atyu siha i Ha ågang famagu’un, era tåotåo esti siha ni guaha sensin-ñiha yan haga’-ñiha, Guiya lokkui’ si Jesus parehu yan siha yan sumåonåo Gui’ gi naturat-ñiha. Ha cho’gui esti kosa ki ginin i finatai-ña u dinistrosa i aniti, ni guaha fuetsån-ña ni finatai, ya ginin esti nai u na’fanlibri atyu siha i manisklåbu todu i lina’la’-ñiha put i mina’å’ñao-ñiha ni finatai. Klåru na ti i manånghit Ha ayuda. Inlugåt, Ha ayuda i disindensian Abrahan. Esti kumeke’ilekña na debidi u parehu Gui’ yan i mañe’lu-ña gi todu manera, para ki siña Gui’ humuyung fiet yan gái ma’asi’ na Takkilu’ na Påli’ gi sitbision-ña as Yu’us, ya ginin ennåo na u fanma’asi’i ni isao-ñiha i taotåo siha. Ya på’gu nai siña Ha ayuda atyu siha na tåotåo i manmatetenta, sa’ Guiya esta munhåyan matenta yan mamadesi.
I finu’ i Saina.
IBANGHELIU Lk 2, 22-40
R. Åleluia. UN KÅNDIT PARA U ININA I CHALÅN-MU PARA I TI MANHUDIHOS
YAN PARA U FANINENRA I TAOTÅO-MU MANISRAILITAS.
+ Un tinaitai ginin i såntu Ibangheliu sigun i tinigi’ San Lucas
Måttu i tiempu anai si Jose yan si Maria debidi u makumpli i tinagu’ Moises na sirimonias ni para u mana’fanggåsgas siha. Put ennåo na makonni’ i patgun guatu giya Hirusalen para u maprisenta Gui’ gi Saina. Estigui’ matugi’ gi Lai i Saina: “Todu i primirisa na låhi debidi u makunsågra para i Saina.” Manhånåo lokkui’ put i para u ma’ufresi sakrifisiu sigun gi lai i Saina: “Un påt paluman åpu osino un petchun paluman nossa’.”
Iståba na sumåsaga giya Hirusalen un tåotåo ni na’ån-ña si Simeon. Måolik esti na tåotåo ya gai ma’a’ñåo as Yu’us, ya ha nanangga i mana’librin Israhet. Inina ni Espiritu Såntu ya sinangåni gui’ na ti u tañña’ i finatai asta ki ha li’i’ i nina’hånåo i Saina na Misihas. Inina gui’ ta’lu ni Espiritu Såntu ya humånåo para i Templu. Anai måttu i patgun as Jesus gi Templu kinekenni’ ni mañaina-ña para u makumpli i tinagu’ i Lai, hineggui i patgun as Simeon, ya ha nå’i gråsia si Yu’us:
“O Asaina, på’gu sa’ esta Un kumpli i prumeså-mu,
siña Un konni’ måhgugung i tentago’-mu.
I matå-hu mismu lumi’i’ i nana’libri ginin Hagu,
ni Un pripåra gi me’nan todu i taotåo:
Un kåndit para u inina i chalån-mu para i MamPagånu
yan para u faninenra i taotåo-mu ManIsrailitas.”
Nina’manman i tatan i patgun yan si nanå-ña ni sinangan Simeon put i patgun. Mambinendisi as Simeon ya ilek-ña as Maria i nana, “Inatyik esti na påtgun as Yu’us para i pineddung yan kinahulu’ meggai giya Israhet; u fama’un siñåt Gui’ ginin as Yu’us ni meggai na tåotåo u kinentra, ya Guiya u nina’fanannuk todu i sikretu na hinassu. Ya i piniti-mu kalang un kalåktus na såpbli, u yinamak i kurason-mu.” Iståba guennåo un prufeta ni na’ån-ña si Anna, hagan Phanuel, ni ginin i rasan Asher. Åmku’ esti na palåo’an. Dispues di sietti åñus na umasaguan-ña bumi’uda asta otchentaikuåttru åñus idåt-ña. Nungka nai ha dingu i templu; ha adodora si Yu’us ha’åni yan puengi, umayuyunat yan manånayuyut. Måttu guatu guennåo mismu na mumentu, ha nå’i gråsia si Yu’us ya kumuentus put i patgun para todu atyu siha i numanangga i mana’librin Hirusalen.
Anai munhåyan i dos makumpli todu siha i tinagu’ i Saina, mana’lu tåtti para Nasaret giya Galileha anai gaigi i gima’-ñiha. Dumångkulu yan mumetgut i patgun; tumomtum Gui’, ya binendisi Gui’ as Yu’us.
I Ibangheliun i Saina.
