FINE’NA NA TINAITAI Is 49, 1-6
Un tinaitai ginin i Lepblun i Prufeta as Isaias
Hunguk yu’, O kantun tåsi,
fanekkunguk, O tåotåo ni manchågu’,
Desdi i mafañagu-hu Ha ågang yu’ i Saina,
desdi i tiyan nanå-hu Ha nå’i yu’ ni na’ån-hu .
Ha fa’tinas yu’ kumu malåktus na såpbli.
yan Ha na’attuk yu’ gi anineng i kannai-ña.
Ha fa’tinas yu’ kumu låmlam na fletcha,
gi linaolåo-ña Ha na’attuk yu’.
Ilek-ña i Saina nu guåhu: Hågu, Israhet, i setbintek-ku,
ginin hagu na mama’nunu’i yu’ ni gloriå-hu.
Maseha hinassok-ku na taibali che’cho’-hu,
ya hu gåsta fuetsåk-ku dibåtdi, sin prubetchu,
Låo gaigi gi Saina i premiu-hu,
gaigi gi Yi’os-su i apås-hu.
Pues kumuentus i Saina
ni fumotma yu’ kumu setbinten-ña ginin i tiyan,
kosaki u makonni’ si Jacob tåtti para Guiya,
ya u mana’danña’ si Israhet yan Guiya.
Ya guåhu bai hu huyung kumu dichosu gi me’nan i Saina
yan i Yi’os-su Guiya på’gu i minetgot-hu.
Ilek-ña gof dikiki’ håo para setbintek-ku,
para un håtsa hulu’ i rasan Jacob
yan para un nana’lu i tetehnan na tåotåo Israhet;
bai Hu fa’kåndit håo para todu i nasion siha
kosaki i satbasion-hu u hagu’ i puntan tånu’.
I finu’ i Saina.
INEPPIN I SATMU Ps 139, 1-3, 13-14, 14-15
INEPPI: HU TUNA HÅO, SA’ GÅTBU MAFA’TINÅS-HU.
O Asaina, esta Un eksamina yu’, pues Un tungu’ yu’:
Un tungu’ ha’ kåo matåta’chung yu’ pat tumotohgi yu’;
desdi i chagu’ Un tungu’ ha’ håfa hinasosok-ku.
Un lili’i’ i hinanåo-hu kuntodu yanggin dumiskånsa yu’;
Un sen tungu’ todu i bidåda-hu.
INEPPI
Hågu fuma’tinas yu’ interamenti;
Un fotma yu’ gi halum tiyan nanå-hu.
Hu tuna Håo, sa’ Un fa’tinas yu’ kabålis;
mambunitu todu i fina’tinås-mu!
INEPPI
Un tungu’ ha’ yu’ kabålis;
Un sen li’i’ måolik i te’lång-hu siha,
Anai mafa’titinas yu’ sikretu,
mafotma yu’ gi fondun tånu’.
INEPPI
SIGUNDU NA TINAITAI Acts 13, 22-26
Un tinaitai ginin i Bidan i Manapostulis
Ilek-ña si Pablo guihi na ha’åni:
“I Saina,Ha kåhat hulu’ si David kumu rai; ya put guiya na manhula si Yu’us: ‘Hu sodda’ na si David, i lahin Jesse, guiya i malago’-hu na klåsi ni para u chine’gui todu i malago’-hu na para u cho’gui.’ “Sigun gi prumeså-ña esta si Yu’us Ha na’fåttu si Jesus i satbadot Israhet ginin i disendensian esti na låhi. Åntis di u tutuhun si Jesus i che’cho’-ña, ha setmuni si Juan todu i taotåo Israhet na debidi u mabira siha ginin i isao-ñiha ya u fanmatakpångi. Anai esta hihihut i uttimun i che’cho’-ña si Juan, ha såsangan, ‘Håyi hinassun-mimiyu yu’? Ti guåhu atyu i en nanangga. Låo ispiha atyu i para u fåttu dispues di guåhu. Ti diknu yu’ para bai hu pula’ i sandålias gi addeng-ña.’
“Hafañe’lus, hamyu ni famagu’un i familian Abrahan yan hamyu ni pumalu ni umo’onra i Yi’us-måmi, para hita na mana’hånåo esti na mensåhin satbasion.”
I finu’ i Saina.
IBANGHELIU Lk 1, 57-66, 80
ÅLELUIA Lk 1, 76
- Åleluia. YA HÅGU, PATGON-HU, UN MA’ÅGANG PRUFETAN I MÅS TAKKILU’;
SA’ HÅGU UN FOFO’NA GI ME’NAN I SAINA PARA UN PRIPÅRA UN
TUNAS NA CHÅLAN PARA GUIYA.
- Åleluia
+ Un tinaitai ginin i såntu Ibangheliu sigun i tinigi’ San Lukas
Anai måttu i tiempu para u fañågu si Isabel, mañågu gui’ un påtgun låhi. Anai mahunguk ni bisinu-ña yan parintes-ña na ha ekstendi i Saina i mina’ase’-ña nu guiya, manchámmaguf siha.
Anai manetnun gi mina’otchu dihas para u macho’gui i setkumsisiu gi patgun, manmalagu’ na u mafa’na’an gui’ ni na’an tatå-ña as Zacarias. Umentalu’ i nana guini ya ilek-ña, “Åhi’, i patgun u mafa’na’an Juan.” Ilik-ñiha nu guiya, “Tåya’ gi parintes-mu gai na’an ni ennåo.” Pues maseñas i tata ya mafaisin gui’ håfa na nå’an malago’-ña para u ma’ågang. Sumeñas si Zacarias ya mamaisin para u manå’i gui’ påppit månggi’ ya ha tugi’ påpa’ esti siha na palåbra, “I na’ån-ña si Juan.” Nina’fanmanman todu ni esti. Guennåo na mumentu mababa i pachot-ña ya måppla’ i hila’-ña, ya ha tutuhun kumuentus ni matunan Yu’us. Måttu un dångkulun mina’å’ñao gi todu i uriyan-ñiha; matutuhun masångan put esti na sinisedi gi todu i eksu’ siha giya Hudeha. Todu i humunguk mapo’lu esti siha gi kurason-ñiha, ya ilik-ñiha, “Håfa para humuyongña esti na påtgun?” yan “Kåo ti gaigi i kannai Yu’us gi hilo’-ña?”.
Dumångkulu i patgun ya tumo’a gi espiritu. Sumåga gi halum tånu’ asta atyu na ha’åni anai umannuk gi pupbliku giya Israhet.
I Ibangheliun i Saina.
