A
FINENE’NA NA TINAITAI Gn 2, 7-9; 3, 1-7
Un tinaitai ginin i Lepblun Genesis
Intonsis i Saina as Yu’us Ha chuli’ dididi’ odda’ ginin i tanu’ ya Ha fotma i taotåo ginin ennao; Ha hagungi ni mannåna’i lina’la’ na hinagung hålum gi gui’eng-ña ya ha tutuhun i taotåo lumå’la’.
Pues i Saina as Yu’us Ha tånum un hatdin giya Edén, gi sanhaya, ya Ha po’lu guihi i taotåo ni Ha fa’tinas. Ha na’fandokku’ todu klåsin mambunitu na trongku guennåo ya manmanokcha’ manmåolik na fruta. Gi talu’ gi hatdin tumatachu i trongku ni mannåna’i lina’la’ yan i trongku ni mannåna’i tiningu’ håfa måolik yan håfa båba.
I kulepbla i mås menhålum gi ga’ga’ siha ni Ha fa’tinas i Saina as Yu’us. I kulepbla ha faisin i palåo’an, “Kåo magåhit na mansinangåni hamyu as Yu’us na ti siña en kannu’ i fruta ginin ni unu na trongku gi hatdin? Manoppi i palåo’an, “Siña ha’ in kannu’ i fruta ginin maseha månu na trongku gi hatdin, fuera di i trongku gi talu’. Ha sangåni ham si Yu’us na cha’-måmi kumåkannu’ i frutan atyu na trongku ni sikera para in patcha; yanggin in che’gui esti, siempri måtai ham.” Manoppi i kulepbla, “Ti magåhit ennåo; ti para en matai. Ha sångan si Yu’us ennåo sa’ Ha tungu’ na yanggin en kannu’ ennåo, siempri parehu hamyu yan si Yu’us en tingu’ håfa måolik yan håfa båba. I palåo’an ha li’i’ na bunitu i trongku yan måolik para makånnu’ i tinekchå’-ña, ya ilek-ña na måolik yanggin tumomtum gui’. Intonsis ha tifi’ dididi’ fruta ya ha kånnu’. Dispues ha nå’i dididi’ i asaguå-ña, ya guiya lokkui’ ha kånnu’. Gigun ha’ makånnu’, mababa matan-ñiha ya marialisa na kesnuda siha; pues måmfuk i dos hagun figus ya matåmpi siha.
I finu’ i Saina.
INEPPIN I SÅTMU Ps 51, 3-4., 5-6, 12-13, 14, 17
R. (3) GAI MA’ASI’ NU HAMI, O ASAINA, SA’ MANISÅO HAM.
Gai ma’asi’ nu guåhu, O Yu’us, gi minaolek-mu;
gi dangkulun kariñu-mu funas i linachi-hu siha.
Fa’gåsi yu’ ginin i isåo-hu;
na’gåsgas yu’ ginin i linachi-hu.
INEPPI…..
Sa’ hu tungu’ i baban bidå-hu;
todu i tiempu gagaigi i isåo-hu gi me’nå-hu.
Kontra Hågu ha’ hu isagui;
hu cho’gui gi me’nå-mu atyu i Un po’lu na tailayi.
INEPPI…..
Fa’tinas un gåsgas na kurason giya guåhu, Yu’us;
rinueba giya guåhu un fitmi na espiritu.
Cha’-mu yu’ dudulalak ginin i me’nå-mu,
patsino Un åmut yu’ ni santus na espiritu-mu.
INEPPI…..
Na’maguf yu’ ta’lu gi satbasion-mu;
susteni giya guåhu un ubidenti na espiritu.
Asaina, baba i labios-su;
i pachot-tu u pruklåma i matunå-mu.
INEPPI…..
SIGUNDU NA TINAITAI Rom 5, 12-19
Un tinaitai ginin i Kattan San Pablo para i taotåo Roma
Hafañe’lus:
Ginin un låhi na måttu i isao gi tanu’, ya i isåo-ña ha na’fåttu i finatai. Put esti na machalapun i finatai gi todu i taotåo siha sa’ put todu manisao. Esta guaha isao gi tanu’ åntis di u mana’huyung i Lai; låo anai tåya’ lai tåya’ isao ma’apunta påpa’. Låo desdi i tiempun Adan asta i tiempun Moises manhåli’ i isao gi todu i taotåo siha, achukka’ atyu siha na tåotåo i ti manisao parehu yan si Adan anai ti ha osgi i tinagu’ Yu’us.
Si Adan figuran atyu i para u fåttu. Låo ti parehu i dos, sa’ i geftåo na rigålun Yu’us ti parehu yan i isao Adan. Hunggan magåhit na bula manmåtai na tåotåo put i isao atyu na låhi. Låo mås takkilu’ i gråsian Yu’us, yan i geftåo na rigalu-ña para i lahyan na tåotåo ginin i grasian atyu na låhi, era si Jesukristo. Ya guaha difirensia ginin i rigålun Yu’us yan i isao atyu na låhi. Dispues di atyu na isao, måttu i sintensian “Hunggan Umisåo”; låo dispues di meggai na isao, måttu i ti mamiresi na rigålun “Åhi’ Ti Umisåo!” Hunggan magåhit na ginin i isao un tåotåo ha tutuhun manmånda i finatai sa’ put atyu na tåotåo. Låo kuåntu mås tinakkilo’-ña i risuttan i bidan atyu na tåotåo, era si Jesukristo! Todu i rumisibi i abundånsia na rigålun Yu’us yan i mana’fanunas gi me’nan Yu’us u fanmanggubetna gi lina’la’ i Kristo. Pues put ennåo na taimanu ha’ na put atyu na isao kumundena todu i taotåo, pues gi taiguennåo ha’ lokkui’ na ginin che’chu’ atyu i tinas na tåotåo muna’fanlibri todu i taotåo ya mannina’i siha lina’la’. Yan taimanu ha’ na todu tåotåo nina’fanisåo ginin i ti manosgin un tåotåo, pues taiguennåo ha’ lokkui’ siempri mana’fanunas siha gi me’nan Yu’us ginin i ubidentin un låhi.
I finu’ i Saina.
SECOND READING: Ro 5: 12, 17-19
Shorter Form
SIGUNDU NA TINAITAI
Un tinaitai ginin i Kattan San Pablo para i taotåo Roma
Hafañe’lus:
Ginin un låhi na måttu i isao gi tanu’, ya i isåo-ña ha na’fåttu i finatai. Put esti na machalapun i finatai gi todu i taotåo siha sa’ put todu manisao.
Hunggan magåhit na ginin i isao un tåotåo ha tutuhun manmånda i finatai sa’ put atyu na tåotåo. Låo kuåntu mås tinakkilo’-ña i risuttan i bidan tyu na tåotåo, era si Jesukristo! Todu i rumisibi i abundånsia na rigålun Yu’us yan i mana’fanunas gi me’nan Yu’us u fanmanggubetna gi lina’la’ i Kristo. Pues put ennåo na taimanu ha’ na put atyu na isao kumundena todu i taotåo, puesgi taiguennåo ha’ lokkui’ na ginin che’chu’ atyu i tinas na tåotåo muna’fanlibri todu i taotåo ya mannina’i siha lina’la’. Yan taimanu ha’ na todu tåotåo nina’fanisåo ginin i ti manosgin un tåotåo, pues taiguennåo ha’ lokkui’ siempri mana’fanunas siha gi me’nan Yu’us ginin i ubidentin un låhi.
I finu’ i Saina.
IBANGHELIU Mt 4, 1-11
R. (Todus) Umatuna Håo, Asaina Jesukristo, Rai i taihinekkuk na gloria!
V. (Tetcha) Ti ginin i pån ha’ na låla’la’ i taotåo
sino ki ginin kada finihu’ ni humuhuyung ginin i pachut Yu’us.
+ Un tinaitai ginin i såntu Ibangheliu sigun gi tinigi’ San Mateo
Guihi na tiempu i Espiritu Ha konni’ si Jesus guatu gi halum tånu’ para u tinenta ni aniti. Dispues di kuarenta dihas yan puengi guennao sin nengkánnu’ ñålang Gui’. Måttu i aniti ya ilek-ña nu Guiya, “Yanggin magåhit na Lahin Yu’us Håo, tågu’ esti siha na åtchu’ ya u fanmama’pan”, Manoppi si Jesus, “Ilek-ña i eskritura: ‘Ti pån ha’ siña muna’lå’la’ i taotåo, låo todu sinangan ni humuyung ginin i pachut Yu’us.’ “
Intonsis i aniti ha konni’ si Jesus guatu gi Santus na Siudå, ya pine’lu Gui’ gi mås takkilu’ na puntan i Templu, ya ilek-ña nu Guiya. “Yanggin magåhit na Lahin Yu’us Håo, yuti’ Håo påpa’; sa’ ilek-ña i eskritura: ‘Si Yu’us Ha otdin i mananghet-ña put Hågu: Siha un chinahlåo ni kannai-ñiha, kosa ki mungnga na u matompu’ i addeng-mu kontra i atchu’.’ “
Manoppi si Jesus, “Ilek-ña lokkui’ i eskritura:
‘Cha’-mu tetenta i Saina i Yi’os-mu.’ “
Dispues kinenni’ si Jesus ni aniti hulu’ gi takkilu’ na oksu’ ya fina’nu’i Gui’ ni todu i rainun i tanu’ yan i mina’lak-ñiha. Ilek-ña i aniti, “Todu esti siha bai hu nå’i Håo yanggin dumimu Håo påpa’ ya Un adora yu’.”
Manoppi si Jesus, “Suha, Satanås! Ilek-ña i eskritura:
‘Adora i Saina i Yi’os-mu
yan Guiya ha’ na maisa un setbi!’ “
Pues nai diningu Gui’ ni aniti; ya manmåttu i manånghit siha para u ma’ayuda si Jesus.
I Ibangheliun i Saina.
