FINE’NA NA TINAITAI Gn 9, 8-15
Un tinaitai ginin i Lepblun Genesis
Ilek-ña si Yu’us as Noah yan i lalahi-ña siha ni mañisiha: “Atan ha’, sa’ Hu istapblelesi i kuntratå-hu para hamyu yan i tinattin-miyu dispues di hamyu yan kuntodu para i manlåla’la’ na fina’tinas siha ni iståba manhahamyu: todu i påharu siha, yan todu i klåsin gå’ga’ siha ni manmånsu yan manmachålik ni iståba manhahamyu ni manhuyung ginin i åtka. Bai Hu istapblesi i kuntratå-hu yan hamyu, na ni nungka ta’lu na u fandinistrosa ni hanum i dilubiu todu i fina’tinas na tåtaotåo; ti u fåttu ta’lu ottru dilubiu para u yinamak i tanu’.” Ha aomenta si Yu’us ya ilek-ña: “I siñåt ni Hu nåna’i para todu i manmamamaila’ na tiempu, put i kuntratå-hu yan hamyu yan todu i manlåla’l’a na fina’tinas ni manhahamyu: bai Hu pega i isa gi mapagåhis para u annuk kumu un siñåt put i kuntratå-hu yan i tanu’. Yanggin Hu na’fåttu i mapagåhis gi hilu’ i tanu’, ya umannuk i isa gi mapagåhis, Guåhu bai Hu hahassu i kuntråta ni Hu fa’tinas yan hamyu yan todu i manlåla’la’ na kosas, kosaki ti u ta’lu i hanum mama’dilúbiu para u distrosa i manlåla’la’ na kosas.”
I finu’ i Saina.
INEPPIN I SÅTMU Ps 25, 4-5. 6-7. 8-9
- (10) I BIDÅDA-MU, O ASAINA, GINEFLI’I’ YAN MINAGÅHIT
PARA ATYU SIHA I GUMÅGUATDIA I KUNTRATÅ-MU.
Na’tungu’ yu’ ni chalån-mu, Asaina;
fa’nå’gui yu’ ni pinekkåt-mu.
Pipit yu’ gi minagahet-mu yan fa’nå’gui yu’,
sa’ Hågu Yu’us yan satbadot-tu.
INEPPI…..
Hahassu i mina’ase’-mu yan i guinaiyam-mu, O Asaina;
ni Un få’nu’i yu’ desdi åntis na tiempu.
Båsta mahassu i isao gi pinatgon-hu;
låo hahassu yu’ solu gi guinaiyam-mu.
INEPPI…..
Måolik yan tunas i Saina,
Ha fa’nunu’i i mani’isåo ni chalan,
Ha pipipit i manhumitdi gi dinanchi na chålan,
yan Ha fa’nåna’gui i manhumitdi ni chalån-ña.
INEPPI…..
SIGUNDU NA TINAITAI 1 Pt 3, 18-22
Un tinaitai ginin i fine’na na Kattan San Pedro
Mangginifli’e’-hu:
I Kristo måtai put isao un biåhi para todu, un måolik na tåotåo put i mani’isåo, put i para en fangkinenni’ guatu gi as Yu’us. Mapunu’ Gui’ gi tataotåo, låo mana’lå’la’ gi espirituhåt, ya gi espirituhåt na lina’lå’-ña humånåo ya sumetmun para i manmapreresu na espiritu siha. Esti siha na espiritu atyu i ti umosgi si Yu’us anai Ha nanangga kun pinasensia gi tiempun Noah anai ha fa’titinas i åtka. Atyu i unus kuåntu na tåotåo gi halum i åtka–otchu put todu–mansinatba siha ni hanum, ni ha siknififika i baotismu, ni mansinasatba hamyu på’gu. Åhi’ ti guiya esti i mafa’gåsin i edda’ gi tataotåo, låo i prumesa ni mafa’tinas para si Yu’us gi un måolik na kunsensia. Guiya esti sumåsatba hamyu ginin i resureksion Jesukristo, ni esta humånåo para i langit ya gaigi gi agapa’ Yu’us, Ha gubebetna todu i manånghit yan todu i linangitan na åoturidåt yan pudet.
I finu’ i Saina.
IBANGHELIU Mk 1, 12-15
- (todu) Umatuna Håo, Asaina Jesukristo, Rai i taihinekkuk na gloria!
- (Tetcha) Ti ginin i pån ha’ na låla’la’ i taotåo,
sinoki ginin kada finihu’ ni humuhuyung ginin i pachut Yu’us.
+ Un tinaitai ginin i såntu Ibangheliu sigun i tinigi’ San Marcos
Insigidas, nina’hånåo si Jesus ni Espiritu guatu para i disiettu, ya sumåga gi disiettu kuarenta dihas, ya tinenta Gui’ guennåo as Satanås. Mañisiha yan i manmachålik na gå’ga’, låo i manånghit siha manmåttu ya masetbi Gui’.
Dispues di ma’aresta si Juan, humånåo si Jesus para Galileha Ha pruklålama i Maolik na Nutisian Yu’us. Ilek-ña, “Måttu esta i tiempu, ya esta hihut i Rainun Yu’us! Tulaika i lina’la’-miyu yan fanmanhonggi gi Maolik na Nutisia!”
I Ibangheliun i Saina.
