FINE’NA NA TINAITAI Is 63, 16b-17. 19b; 64: 2-7
Un tinaitai ginin i Lepblun i Prufeta as Isaias
Hågu, Asaina, i tatan-måmi,
mafa’na’an Håo nana’librin-måmi para todu i tiempu.
Håfa na Un sedi ham manabak, O Asaina, ginin i chalån-mu,
ya Un na’fanmahettuk i kurason-måmi ya ti manma’åñåo ham esta nu Hågu?
Bira Håo mågi put i tentago’-mu siha,
put i irensiåm-mu siha na tåotåo.
I ya Un titik i langit ya Un fåttu påpa’,
mientras lilinåo i sabåna gi me’nå-mu,
Anai Un na’fåttu manna’ma’ñåo na cho’chu’ ni ti siña in angokku numangga,
atyu na klåsi i tåya’ nai mahunguk gi antigu na tiempu.
Tåya’ talanga esta humunguk, ni tåya’ åttaduk esta lumi’i’ ottru Yu’us fuera di Hågu
ni chumocho’gui esti siha na fina’tinas para atyu siha
na tåotåo i numanangga Gui’.
Puedi ha’ Un sodda’ ham in cheche’gui i manunas,
ya in hahassu Håo gi bidan-måmami siha!
Atan ha’ sa’ lalålu’ Håo, ya hami mani’isåo;
todu ham manhuyung manaplacha’ na tåotåo,
todu i manmåolik na che’chu’-måmi kalang påo hebbu na talåpus;
Manmalåyu ham kalang hågun siha,
ya i isao-måmi ha kåtga ham kalang i manglu’.
Tåya’ ni unu umågang i na’ån-mu,
ni unu malagu’ tumoktuk Håo;
Sa’ Un na’attuk i matå-mu ginin hami
ya Un abandona ham put i isao-måmi.
Låo Hågu, O Asaina, i tatan-måmi;
hami i fachi’ ya Hågu i fafa’tinas;
todu ham fina’tinas i kannai-mu siha.
I finu’ i Saina.
INEPPIN I SÅTMU Ps 80, 2-3. 15-16. 18-19
R. (4) ASAINA, BIRA HAM GUATU GIYA HÅGU,
NA’LI’I’ HAM NI MATÅ-MU YA IN FANMASÅTBA.
O Pastot Israhet, ékkunguk,
ginin i tronu-mu gi hilu’ i kerubin na’annuk Håo.
Yalibåo i fuetsåm-mu,
fåttu ya Un såtba ham.
INEPPI…..
Bira Håo ta’lu, Asainan i ihetsitu siha;
talakpapa’ ginin i langit ya Un li’i’;
Atendi esti na tinanum,
yan prutehi håfa tinanom-ña i agapa’-mu.
i lahin i taotåo ni Hågu mismu muna’metgut.
INEPPI…..
Puedi i ayudu-mu u gaigi gi taotåo gi agapa’-mu,
sumisiha yan i lahin i taotåo ni Hågu mismu muna’metgut.
Pues ennåo na ni nungka ta’lu nai in fañuha giya Hagu;
nå’i ham nuebu na lina’la’, ya bai in agang i na’ån-mu.
INEPPI…..
SIGUNDU NA TINAITAI 1 Cor 1, 3-9
Un tinaitai ginin i fine’na na Kattan San Pablo para i taotåo ‘Corinth’
Hafañelus:
Puedi si Yu’us Tatå-ta yan i Saina as Jesukristo en fannina’i ni gråsia yan pås.
Hu nåna’i gråsia todu i tiempu i Yi’os-su para hamyu sa’ put i gråsia ni mannina’i
hamyu ginin i Kristo Jesus. Ginin i man unun-miyu yan i Kristo nina’fanriku hamyu
gi todu i kosas, kun todu gi kuentus yan gi tiningu’. Esta manhåli’ giya hamyu i mensåhi
put i Kristo ya ti mahñåo manmanå’i hamyu un bendision, mientras en nanangga para en
li’i’ i Saina-ta as Jesukristo. Guiya siempri en faninayuda para en famfitmi asta i uttimu,
kosa ki en fansinedda’ sin måncha gi Ha’ånin i Saina-ta as Jesukristo. Guiya si Yu’us para
u ma’angokku, si Yu’us ni umågang hamyu para en fandañña’ yan i Lahi-ña, as
Jesukristo i Saina-ta.
I finu’ i Saina.
IBANGHELIU Mk 13, 33-37
ÅLELUIA Ps 85, 8
R. Åleluia. FA’NU’I HAM, ASAINA, NI GUINAIYAM-MU;
YAN NÅ’I HAM NI SATBASION-MU.
R. Åleluia.
+ Un tinaitai ginin i såntu Ibangheliu sigun i tinigi’ San Marcos
Ilek-ña si Jesus nu i mandisipulu-ña:
“Todu i tiempu gof atan! Cha’-miyu fanmamaigu’! Ti en tingu’ ngai’an i ma’apunta na tiempu nai para u fåttu. Parehu ha’ yan un tåotåo ni bumiåbiahi gi ottru tånu’. Ha dingu i gimå’-ña ya ha na’faningkatgåo i tentago’-ña, kada unu konsu che’cho’-ña; ya ha otdin i taotåo gi trångka para u gef pulan. Atan i uriyan-miyu! Ti en tingu’ ngai’an nai para u fåttu i ma’gas i gima’, kåo gi lemlim tåotåo, kåo tatalu’ puengi, kåo chatanmak, pat gi dinekku’ i atdao. Cha’-miyu sesedi na u fåttu gotpi ya en fangginacha’ manmamaigu’. Håfa Hu sangåni hamyu, Hu såsangan para todu: “Na’fanlistu hamyu!”
I Ibangheliun i Saina.
