FINENE’NA NA TINAITAI Jer 33, 14-16
Un tinaitai ginin i Lepblun i Prufeta as Jeremiah
Ilek-ña i Saina, manmamamaila’ i tiempu anai para bai Hu kumpli i prumesa ni hu fa’tinas yan i familian Israhet yan Hudah. Atyu siha na ha’åni yan tiempu bai Hu na’dokku’ un hustu na sinisu para si David; Guiya para u chine’gui håfa siha manunas yan hustu para i tanu’. Guennåo siha na tiempu siempri såfu si Hudah yan asiguråo iya Hirusalen; estigui’ siempri para u mafa’na’an Gui’: “I Saina Guiya hustisiåt-ta.”
I finu’ i Saina.
INEPPIN I SÅTMU Ps 25, 4-5. 8-9. 10. 14
R. BAI HU HÅTSA HULU’ I ANTI-HU GIYA HÅGU, O ASAINA.
Na’tungu’ yu’ ni chalån-mu, Asaina;
fa’nå’gui yu’ ni pinekkåt-mu.
Pipit yu’ gi minagahet-mu yan fa’nå’gui yu’,
sa’ Hågu Yu’us yan satbadot-tu.
Hågu hu nanangga todu i diha.
INEPPI…..
Måolik yan tunas i Saina,
Ha fa’nunu’i i mani’isåo ni chalan,
Ha pipipit i manhumitdi gi dinanchi na chålan,
yan Ha fa’nåna’gui i manhumitdi ni chalån-ña.
INEPPI…..
Puru ha’ mina’åsi’ yan ti matulalaika i chalan i Saina
para atyu i kumukumpli i kuntratå-ña yan i tinago’-ña.
Amigun i Saina atyu siha i muma’añåñagui’ Gui’;
ya i kuntratå-ña para leksion-ñiha.
INEPPI…..
SIGUNDU NA TINAITAI 1 Thes 3, 12-4, 2
Un tinaitai ginin i Kattan San Pablo para i taotåo Thessalonica
Hafañe’lus:
Puedi i Saina u åomenta i ginefli’i’-miyu unu yan ottru yan para todu i taotåo siha ya u chámetgut yan i ginefli’i’-måmi nu hamyu. Gi taiguini na siempri Ha na’fanmetgut hamyu, ya siempri mamprifektu hamyu yan mañåntus gi me’nan i Yi’os-ta yan Tåta yanggin måttu i Saina as Jesus yan todu atyu siha i mananghet-ña.
Put lusuttimu, mañe’lu-hu, hamyu en tingu’ ginin hami taimanu para lina’la’-miyu put i para en na’maguf si Yu’us. Hunggan magåhit, taiguini lina’la’-miyu. Ya på’gu in fafaisin yan in sesehyu’ hamyu gi na’an i Saina as Jesus para en che’gui mås. En tingu’ ha’ i fina’nå’gui ni in na’i hamyu ginin i aoturidåt i Saina as Jesus.
I finu’ i Saina.
IBANGHELIU Lk 21, 25-28. 34-36
ÅLELUIA Ps 85, 8
R. Åleluia. ASAINA, NA’LI’I’ HAM NI MINA’ASE’-MU,
YAN NÅ’I HAM NI SATBASION-MU.
R. Åleluia.
+ Un tinaitai ginin i såntu Ibangheliu sigun i tinigi’ San Lucas
Ilek-ña si Jesus ni mandisipulu-ña:
“U annuk siñåt gi atdao, gi pilan yan gi puti’un. Nasion siha manchachathinassu guini gi tanu’, ya nina’fanatburutåtåo ilun-ñiha put i burukan i tasi yan i napu. Guaha tåotåo siha u fanmåtai put i mina’å’ñåo-ñiha ni para u fanmasusedi guini gi tanu’. I nina’siñan i langit siha u fanmayengyung. Dispues di esti, u mali’i’ ni taotåo siha i Lahin i Taotåo mamamaila’ gi hilu’ i mapagåhis yan dångkulun fuetsa yan gloria. Yanggin matutuhun manmasusedi esti siha, fanohgi tunas yan na’fanngaha’ i ilun-miyu, sa’ esta hihut i mana’librin-miyu.
“Gef adahi hamyu na u fambinila espiritun-miyu ni minaguf tånu’, yan butlacherihas yan kosas tånu’ siha. Esti na na’ma’ñåo ha’åni siempri manhinigif hamyu kalang ókkudu. Esti i Hu såsangan na ha’åni u fåttu gi hilu’ todu i mañåsaga gi hilu’ tånu’. Pues gef adahi hamyu. Fanmanåyuyut sessu ya en fanmanå’i minetgut para en faniskåpa ginin i para u fanmasusedi, yan en fanohgi fitmi gi me’nan i Lahin i Taotåo.”
I Ibangheliun i Saina.