FINE’NA NA TINAITAI Is 2, 1-5
Un tinaitai ginin i Lepblun i Prufeta as Isaias
I lini’i’ Isaias, lahin Amos, put iya Huda yan Hirusalen. Gi manmamamaila’ siha na ha’åni, i sabånan i gima’ i Saina para u ma’istapblesi kumu i mås takkilu’ na sabåna ya u mahåtsa para u takkilo’ña ki i eksu’ siha. Todu i nasion siha para u fanmåttu guennao; meggai na tåotåo para u fanmåttu ya u masångan: “Maila’ ya ta feddus i sabånan i Saina, guatu gi gima’ i Yi’us Jacob, kosaki siña ha fa’nå’gui hit gi diriksion-ña, yan kosaki siña hit manmamokkat gi chinachalån-ña.” Sa’ ginin Sion na para u huyung i duttrina, yan i finu’ i Saina ginin Hirusalen. Para u fanhusga entri i nasion siha, yan para u sintensia i linahyan tåotåo. Para u fanma’atcha i ispådan-ñiha para u fanmafa’alådu yan para u fanmafa’ramentan mambåtbas i lansan-ñiha; tåya’ nasion para u håtsa i ispåda kontra i ottru, ya ti u fanmafa’nå’gui para u gera ta’lu. Maila’, O Gima’ Jacob, nihi ya ta fanmamokkat gi ininan i Saina.
I finu’ i Saina.
INEPPIN I SÅTMU Ps 122, 1-2. 3-4. 4-5. 6-7. 8-9
R. MUMAGUF YU’ ANAI HU HUNGUK SIHA MA’ÅLUK:
NIHI TA FANHÅNÅO PARA I GIMA’ I SAINA
Maguf yu’ anai ilik-ñiha nu guåhu,
“Nihi ta fanhånåo para i gima’ i Saina.”
Ya på’gu esta manotohgi ham gi halum
i trangkan Hirusalen.
INEPPI…..
I siudån Hirusalen, mahåtsa kumu siudå,
makollat uriyå-ña.
Manmåfattu mågi guini i taotåo,
i taotåo i Saina,
INEPPI…..
Sigun gi manmatågu’ i taotåo Israhet,
para u manå’i gråsia i na’an i Saina.
Guini nai manlistu i ta’chung i hues,
i tronun i familian David.
INEPPI…..
Fanmanåyuyut para pås giya Hirusalen;
“Todus atyu siha i gumuaiya Håo u fanggefsaga!
U guaha pås gi halum i kellat Hirusalen,
yan rikesa siha gi palåsyun-miyu.”
INEPPI….
Para i familia yan i manatungu’ bai hu åluk,
“Pås giya hamyu.”
Para i gima’ i Saina, i Yi’os-ta, hu tåyuyut,
“Puedi i bendision u gaigi giya hamyu.”
INEPPI…..
SIGUNDU NA TINAITAI Rom 13, 11-14
Un tinaitai ginin i Kattan San Pablo para i taotåo Roma
Hafañe’lus:
Debidi en che’gui esti sa’ en tingu’ ha’ na esta måttu i ora para en fanmakmåta ginin i maigu’-miyu. I tiempu anai para ta fanmasåtba esta mås hihut ki anai på’gu ha’ manmanhonggi hit. Esta kana’ ha’ hohokkuk i puengi, ya esta para u manana ha’. Maila’ ya båsta hit chumo’gui atyu i che’chu’ halum homhum, ya ta åtmas hit para ta fanmumu gi manana. Maila’ ya ta kundukta måolik i lina’lå’-ta taiguihi i taotåo siha ni manlåla’la’ gi mina’lak i ha’åni–mungnga butlachirihas, mungnga imuralidåt pat kuchinåda, mungnga plaitu pat hinesguan. Låo chili’ i atmas i Saina as Jesukristo. Båsta mana’satisfetchu i naturåt na lina’la’ yan disehu siha.
I finu’ i Saina.
IBANGHELIU Mt 24, 37-44
ÅLELUIA Ps 85, 8
R. Åleluia. ASAINA, FA’NU’I HAM NI YINE’ASE’-MU,
YAN NÅ’I HAM NI SATBASION. R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Ilek-ña si Jesus nu i mandisipulu-ña:
“I finattun i Lahin i Taotåo siempri Ha ripiti håfa masusedi gi tiempun Noah. Atyu siha na ha’åni åntis di i dilubiu, i taotåo siha mañochotchu yan manggígimin, maná’asagua yan mana’faná’asagua, asta atyu mismu na ha’åni anai humålum si Noah gi åtka. Ti maninistotba astaki måttu i dilubiu ya mandinistrosa siha. Taiguennåo ha’ lokkui’ siempri gi finattun i Lahin i Taotåo. Dos tåotåo u gaigi gi gualu’; unu u makonni’ ya i ottru u mapo’lu ha’. Dos na palåo’an u fanggugulik trigu; unu u makonni’ yan i ottru u mapo’lu ha’. Pues na’fanlistu hamyu. Ti siña en tingu’ håfa na ha’åni para fattoñ-ña i Saina. Na’fansiguru hamyu ni esti: yanggin ha tungu’ i gai gima’ håfa na ora nai para u fåttu i sakki siempri ha pulan ya ti u sedi na u mahåtmi i gimå’-ña. Hamyu lokkui’ debidi en fampriparåo parehu. I Lahin i Taotåo u fåttu gi ora anai ti en tingu’.”
I Ibangheliun i Saina.
