FINE’NA NA TINAITAI Ex 12, 1-8, 11-14
Un tinaitai ginin i Lepblun Exodus
Ilek-ña i Saina as Moises yan Aaron giya Ihipto, “Esti na mes debidi u gaigi
gi yahululu’ gi kalendåriun-miyu; debidi en pe’lu esti kumu i finene’na na
mes gi sakkan. Sangåni interu i inetnun i taotåo Israhet: Gi diha dies på’gu na
mes debidi todu i familia siha u fanmangonni’ un patgun kinilu, unu kada
familia. Yanggin mampus dikiki’ i familia para i kinilu, debidi u dañña’ yan i
mås hihut na bisinu yanggin para u makånnu’ i kinilu ya u fanapatti sigun gi
mineggai tåotåo ni para u fañotchu. I kinilu debidi låhi ni un åñu idåt-ña yan
tai mancha. Debidi en peksai asta i mina’katotsi dihas på’gu na mes, yan debi
di en pinu’ gi me’nan i Israelitas siha antis di u homhum. Debidi u machuli’
dididi’ na håga’ ya u mapalai i kuådrun i pettan i gima’ siha anai para
u makånnu’ i kinilu. Ennåo mismu na puengi nai para u makånnu’ i mahotnu
na sensin yan pån sin libadura yan mala’it na chå’guan.
“Taiguini para kannu’-miyu: U fanmagoddi i sinturan-miyu, i
sandålias gi adding, i bastun gi kannai-miyu, ya en fañotchu taiguihi i
mambiåbiahi. Guiya esti i Påsguan i Saina. Sa’ på’gu mismu na puengi bai
Hu faloffan giya Ihipto ya bai Hu punu’ todu i primirisa gi tanu’, tåotåo yan gå’ga’
yan bai Hu sintensia todu i yi’us giya Ihipto – Guåhu, i Saina! Låo i haga’ para
måtka gi gima’ siha anai manggaigi hamyu. Yanggin hu li’i’ i haga’, bai Hu
upus ha’ hamyu: Pues taiguini na yanggin Hu añña i tanu’ Ihipto, tåya’
distrosu u fåttu giya hamyu.
“Esti na ha’åni debidi u fama’ un guput mimorias para hamyu, ya todu
i tinattin-miyu na famagu’un-miyu u masilebra ya u fambiåbiahi guatu gi Saina ya u
masilebra, para todu i tiempu.
I finu’ i Saina.
INEPPIN I SÅTMU Ps 116, 12-13. 15-16. 17-18
R. (1 Cor 10, 16) I TASAN I BENDISION-TA GUIYA I HAGA’ I KRISTO.
Taimanu apås-su ni Saina
put todu i minaolek-ña nu guåhu?
Bai hu håtsa i kopan i satbasion
ya bai hu ågang i na’an i Saina.
INEPPI…..
Guaguan gi me’nan i Saina
i finatai i mamfiet nu Guiya.
Asaina, guåhu i tentago’-mu, i patgun i tentago’-mu;
Hågu sumåtba yu’ ginin i finatai.
INEPPI…..
Bai hu fanufresi sakrifisiun agradisimentu
ya bai hu ågang i na’an i Saina.
Bai hu apåsi i Saina ni prumiså-hu
gi me’nan todu i taotåo-ña.
INEPPI…..
SIGUNDU NA TINAITAI 1 Cor 11, 23-26
Un tinaitai ginin i fine’na na Kattan San Pablo para i taotåo Corinth
Hafañe’lus:
Hu risibi ginin i Saina i fina’nå’gui ni hu nåna’i hamyu: na i Saina as Jesus, gi puengi anai matraiduti Gui’, Ha chuli’ un pidåsun pån, Ha nå’i gråsia si Yu’us, Ha ipi’, ya ilek-ña, “Guiya esti i tataotåo-hu, ni para hamyu. Che’gui esti ya en hahassu Yu’.” Gi taiguini ha’ ta’lu na manera, dispues di i sena Ha chuli’ i kopa ya ilek-ña, “Guiya esti na kopa i nuebu na kuntråtan Yu’us, ni maseyu ni hagå’-hu. Gi kada en gimin esti, che’gui ya en hahassu Yu’.” Esti kumekke’ilekña na gi kada biåhi na en kannu’ esti na pån yan en gimin ginin esti na kopa en pruklålama i finatai i Saina asta ki måttu Gui’.
I finu’ i Saina.
IBANGHELIU Jn 13, 1-15
Betsikulu åntis di i Ibangheliu Jn 13, 34
Bai Hu nå’i hamyu un nuebu na tinagu’:
Fanagofli’i’ unu yan ottru, taimanu ha’ i ginifli’e’-hu nu hamyu.
+ Un tinaitai ginin i såntu Ibangheliu sigun gi tinigi’ San Juan
Antis di i giput Påsgua, esta Ha tungu’ si Jesus na esta måttu i ora anai para u hånåo ginin esti na tånu’ para guatu gi as Tåta. Ha guaiya i taotåo-ña siha guini gi tanu’, ya malagu’ na u na’mali’i’ i guinaiyan-ña nu siha asta i uttimu. Esta i aniti ha kumbensi si Judas, lahin Simon Iskarioti, para u intrega si Jesus; intonsis, durånti i sena, Ha sen tungu’ si Jesus na ginin as Yu’us Gui’ yan para u hånåo tåtti as Yu’us, i Tata ni esta Ha intrega todu guatu giya Guiya— kahulu’ ginin i sena, ha pula’ i sanhiyung na magagu-ña. Mañuli’ un tu’åya ya Ha goddi gi sinturå-ña. Ha nå’yi hånum un palanggåna ya Ha tutuhun fuma’gåsi i adding i mandisipulu-ña ya Ha såsaosåo ni tu’åya gi sinturå-ña. Intonsis måttu gi as Simon Pedro, ni ilek-ña nu Guiya, “Para Hågu, Asaina, para un fa’gåsi i addeng-hu?” Manoppi si Jesus, “Siña ha’ na ti un tungu’ håfa Hu chocho’gui på’gu, låo siempri un kumprendi dispues!” Manoppi si Pedro, “Ni ngai’an nai Un fa’gåsi i addeng-hu!” Manoppi si Jesus, “Yanggin ti Hu fa’gåsi i addeng-mu pues tåya’ pattem-mu gi irensiåk-ku.” Ilek-ña si Simon Pedro nu Guiya, “Asaina, pues ti i addeng-hu ha’ para un fa’gåsi! Fa’gåsi lokkui’ i kannai-hu yan i ilu-hu!” Sinangåni gui’ as Jesus: “I taotåo ni esta munhåyan umo’mak ti nisisåriu na u fa’gåsi gui’ (fuera di i addeng-ña); esta gui’ sen gasgas, taimanu ha’ hamyu; låo ti todu.” (I rason na ilek-ña “Ti todu manggåsgas,” sa’ put i Ha tungu’ håyi para u trinaiduti Gui’.)
Dispues di Ha fa’gåsi i adding-ñiha, chuminina ta’lu si Jesus ni magagu-ña sanhiyung ya tuma’lu tåtti gi sagå-ña gi lamasa. Mansinangåni siha: “Kåo en kumprendi håfa esti i på’gu ha’ munhåhayan Hu cho’gui nu hamyu? En a’agang Yu’ Ma’estru yan Saina, ya hunggan mandinanchi hamyu, sa’ ennåo Yu’. Låo yanggin Hu fa’gåsi adding-miyu—Guåhu ni Ma’estru yan Saina, pues hamyu debidi en fanafa’gasi adding-miyu. Hu cho’gui esti para bai Hu nå’i hamyu un ihemplu; taimanu ha’ i bidå-hu, debidi en che’gui.
I Ibangheliun i Saina.
