FINE’NA NA TINAITAI Wis 3, 1-9
Un tinaitai ginin i Lepblun Tinemtum
I antin i manunas manggaigi gi kannai Yu’us,
ya tåya’ pinadesi siña pumatcha siha.
Gi matan i maniknurånti, kalang manmåtai siha;
ya ilik-ñiha na put minalångu i finatai-ñiha
yan i manadispattåt-ta para todu i taihinekkuk na tiempu.
Låo manggaigi siha på’gu gi pås.
Sa’ yanggin manmakastiga siha gi me’nan tåotåo,
put ennao na i inangokkun-ñiha u bula ni ti manmamatai;
Dångkulu bendision-ñiha sa’ manmakastiga siha dididi’,
sa’ manchinagi siha as Yu’us
ya manmasodda’ na mandiknu siha yan Yu’us.
Manmachagi siha kalang i oru gi halum guåfi,
ya mankinenni’ siha as Yu’us kalang sakrifisiu na inifresi.
Gi ha’ånin i manmabisitan-ñiha siempri u fanma’lak,
ya u fampetsan huyung kalang chispas gi entalu’ i tessun;
Siha u mahusga i nasion siha yan u fanmanggubetna tåotåo siha,
ya i Saina Guiya para Rai-ñiha para todu i tiempu.
Todu i manmanangokku nu Guiya u makumprendi i minagåhit,
ya i manmanhonggi u fañåga yan Guiya gi ginefli’i’:
Sa’ i gråsia yan i mina’åsi’ gagaigi gi mañantos-ña,
ya gaigi i inadahi-ña gi inayek-ña.
I finu’ i Saina.
INEPPIN I SÅTMU Ps 23, 1-3.3-4.5-6
INEPPI: I SAINA I PASTOT-TU, TÅYA’ U FÅTTA GIYA GUÅHU.
I Saina i pastot-tu; tåya’ u fåtta giya guåhu.
Ha na’diskåkansa yu’ gi betdi na paståhi;
Ha kokonni’ yu’ guatu gi fi’un i mannåna’i diskånsu na hånum;
Ha na’tata’lu tåtti i fuetsåk-ku.
INEPPI…..
Ha gigiha yu’ gi dinanchi na chålan
put i na’ån-ña.
Achukka’ mamomokkat yu’ gi hemhum na kañåda
tåya’ tailayi ma’añåo-hu sa’ gaigi Håo gi fi’on-hu;
Un gogo’ti i galuti-mu yan i baston-mu
ni numåna’i yu’ ånimu.
INEPPI…..
Un plånta i lamasa gi me’nå-hu
gi me’nan i maninimigu-hu;
Un olius låña i ilu-hu;
ya i taså-hu esta machuchuda’.
INEPPI…..
I minaolik ha’ yan i mina’åsi’ tumattitiyi yu’
todu i lina’lå’-hu;
Ya bai hu såga gi gima’ i Saina
gi manmamamaila’ siha na såkkan.
INEPPI…..
SIGUNDU NA TINAITAI Rom 5, 5-11
Un tinaitai ginin i Kattan San Pablo para i taotåo Roma
Hafañe’lus:
Esti na ninangga ti u na’fandisganåo hit, sa’ esta ha chuda’ huyung si Yu’us i ginifli’e’-ña para hålum gi kurason-ta ginin i Espiritu Såntu, ni manmanå’i hit kumu rigålun Yu’us para hita. Gi ma’apunta na tiempu, anai maniståtaba ha’ hit manai nina’siña, måtai i Kristo put hita ni manai yi’us na tåotåo. Håssan na guaha tåotåo ha nå’inñaihun i ha’ani-ña put un tunas na tåotåo, låo put un tunas na tåotåo guaha ha’ siña umatotga måtai. Ginin esti na asunto na Ha prueba i ginefli’e’-ña si Yu’us nu hita–sa’ mientras maniståtaba ha’ hit gi isao måtai i Kristo put hita! Ginin i finatai-ña na mana’fanunas hit gi me’nan Yu’us; intonsis, mås mansiguru hit på’gu na para u ta fanmasåtba put i Kristo ginin i linalålu’ Yu’us. Maniståba maninimigun Yu’us hit, låo Ha na’fanaffá’måolik hit yan Guiya ginin i finatai i Lahi-ña. Ya på’gu sa’ put i manamigun Yu’us hit siguru na u ta fanmasåtba ginin i lina’lå’-ña. Ya ti ennao ha’; sinoki manmammaguf hit put i bidå-ña si Yu’us ginin i Saina-ta as Jesukristo, ni Guiya numa’fanamigun Yu’us hit.
I finu’ i Saina.
IBANGHELIU Jn 6, 37-40
ÅLELUIA Jn 6, 40
Åleluia: ILEK-ÑA I SAINA, ESTIGUI’ I MINALAGU’ TATÅ-HU,
NA TODU ATYU SIHA I UMATAN I LAHI-ÑA YA MANHONGGI
GIYA GUIYA U LÅ’LA’ TAIHINEKKUK.
+ Un tinaitai ginin i såntu Ibangheliu sigun i tinigi’ San Juan
Ilek-ña si Jesus nu i linahyan:
“Todu i Ha nå’i Yu’ si Tåta u fanmåttu giya Guåhu;
ya tåya’ ni unu ni måttu giya Guåhu bai Hu richåsa,
sa’ ti para i malago’-hu para bai Hu cho’gui
na måttu Yu’ påpa’ ginin i langit,
låo para bai Hu cho’gui i minalagu’ i muna’hånåo Yu’.
Estigui’ i minalagu’ i muna’hånåo Yu’
na ni unu ni Ha nå’i Yu’ bai Hu na’falingu;
inlugåt, para bai Hu kåhat gui’ hulu’ gi uttimu na ha’åni.
Sen magahit na estigui’ i minalagu’ Tatå-hu,
na todu atyu siha i umatan i Lahi-ña
ya manhonggi giya Guiya u lå’la’ taihinekkuk.
Guiya bai Hu kåhat hulu’ gi uttimu na ha’åni.”
I Ibangheliun i Saina.
