FINENI’NA NA TINAITAI Nm 21, 4b-9
Un tinaitai ginin i Lepblun Numiru siha
Anai hokkuk pasensian-ñiha put i biåhi, manlalålu’ i taotåo siha as Yu’us yan Moises, “Sa’ håfa na un konni’ ham hulu’ ginin Ihiptu para in fanmåtai guini na disiettu, anai tåya’ nengkanu’ yan hånum? Mano’sun ham ni esti na churan boka!” Put i para u kastiga siha, i Saina ha na’hånåo i ‘saraph’ na kulepbla siha, ni ma’åkka’ i taotåo siha ya meggai manmåtai. Dispues manmåttu i taotåo siha gi as Moises ya ilik-ñiha, “Manisåo ham put i manlalålu’ ham ni Saina yan hågu. Fanåyuyut gi Saina ya u konni’ i kulepbla ginin hami.” Intonsis manåyuyut si Moises para i taotåo siha, ya ilek-ña i Saina as Moises, “Fama’tinas un ‘saraph’ ya un po’lu gi hilu’ un pålu, ya yanggin guaha inakka’ ya ha atan ennåo, siempri homlu’.” Taiguennåo na mama’tinas si Moises un kulepblan bronsi ya ha po’lu gi hilu’ un pålu, ya kada biåhi na guaha inakka’ ni kulepbla ya ha atan i kulepblan bronsi, humomlu’.
I finu’ i Saina.
INEPPIN I SÅTMU Ps 78,1b-2.34-35.36-37.38
R. CHA’MIYU FANMALELEFFA NI BIDAN I SAINA.
Tåotåo-hu, ékkunguk i fina’na’guek-ku;
ékkunguk i palåbra siha ginin i pachot-tu
Bai hu baba i pachot-tu gi fina’akumparasion,
bai hu sångan i antigu siha na liksion.
INEPPI….
Anai mampininu’ siha, Guiya mafalåggui;
ya manmamaisin put si Yu’us ta’lu.
Mahassu na si Yu’us pruteksion-ñiha,
i Mås Takkilu’ na Yu’us, i muna’fanlibri siha.
INEPPI….
Låo madagi Gui’ ni pachut-ñiha,
mafa’baba Gui’ ni hila’-ñiha.
Ti fitmi i kurason-ñiha giya Guiya;
yan ti mamfiet siha gi kuntratå-ña.
INEPPI….
Låo put i yo’asi’ Gui’, Ha asi’i siha ni isao-ñiha;
ya ti Ha distrosa siha.
Sessu Ha na’måhñåo i lalalo’-ña,
ya ti Ha sedi na u diskita i binibu-ña.
INEPPI….
SIGUNDU NA TINAITAI Phil 2, 6-11
Un tinaitai ginin i Kattan San Pablo para i taotåo Philippi
Hafañe’lus:
Todu i tiempu gagaigi i naturan Yu’us giya Guiya,
låo ti Ha kunsidera na put ginin i fuetsån-ña parehu Gui’ yan Yu’us.
Inlugåt, Ha basihan maisa Gui’
ya Ha chuli’ i naturan un isklåbu,
ya mafañågu Gui’ gi pinarehun i taotåo.
Tåotåo na eståo matungo’-ña, ya put esti na Ha na’humitdi Gui’,
ubidenti Ha aksepta kun todu i finatai, i finatai gi kilu’us!
Ya put esti,na nina’takkilu’ Gui’ as Yu’us
ya nina’i Gui’ ni na’an, ni takkilo’ña ki todu i na’an siha,
kosa ki gi na’án Jesus todu tommu u fandimu
gi langit, yan gi tånu’, yan gi papa’ i tanu’,
yan todu hula’ mapruklåma ginin i glorian Yu’us Tåta:
SI JESUKRISTO SAINA GUI’!
I finu’ i Saina.
IBANGHELIU Jn 3, 13-17
ÅLELUIA
R. Åleluia. IN ADORA HÅO, O KRISTO, YAN IN TINA HÅO,
SA’ PUT I KILU’OS-MU UN NA’LIBRI I TANU’.
R. Åleluia.
+ Un tinaitai ginin i såntu Ibangheliu sigun gi tinigi’ San Juan
Ilek-ña si Jesus as Nicodemus:
“Ni nungka nai guaha malak i langit
fuera di atyu i måttu ginin i langit— i Lahin i Taotåo [ni gaigi gi langit].
Taimanu ha’ anai si Moises ha kåhat hulu’ i bronsi na buttun kulepbla gi haligi gi disiettu,
taiguennåo ha’ lokkui’ i Lahin i Taotåo debidi u makåhat hulu’,
kosa ki todu atyu siha i manmanhonggi u fanlå’la’ taihinekkuk.”
Sa’ put Ha sen gu’aiya si Yu’us i tanu’ na Ha intrega i uniku na Lahi-ña,
kosa ki atyu i manhonggi giya Guiya ti u måtai,
inlugåt para u lå’la’ taihinekkuk.
Ti Ha na’hånåo si Yu’us i Lahi-ña para i tanu’ para u kundena i tanu’,
sino ki para u masåtba ginin Guiya.
I Ibangheliun i Saina.
