I Likao Påtma A
IBANGHELIU Mt 21, 1-11
+ Un tinaitai ginin i såntu Ibangheliu sigun gi tinigi’ San Mateo
Anai manhihut si Jesus yan i mandisipulu-ña giya Hirusalen ya manmåttu giya Bethphage gi Eksu’ Ulibas, Ha tågu’ dos na disipulu-ña ilelek-ña nu siha: “Hanåo guatu gi sengsung ni en fafana’ ya insigidas siempri en sedda’ un buliku ni magogoddi, sumisiha yan i tatneru-ña. Pila’ i geddin-ñiha ya en kenni’i Yu’ mågi. Yanggin guaha tåotåo kumuentusi hamyu sangåni gui’, ‘Ha nisisita i Saina esti siha.’ Pues insigidas siempri u sotta esti siha.”
Esti masusedi para u makumpli håfa masångan ginin i Prufeta:
“Sangåni i hagan Sion,
Atan ha’ sa’ mamamaila’ giya hågu i humitdi na rai-mu
ma’u’udai gi hilu’ un buliku yan i patgon-ña.”
Pues manhånåo i mandisipulu ya macho’gui atyu i tinagu’ Jesus: makonni’ i buliku yan i patgon-ña ya matåmpi nu i magågun-ñiha, ya kumahulu’ Gui’ ya matå’chung. I dangkulu na linahyan tåotåo mahutu’ i magågun-ñiha gi chalan, mientras i pumalun tåotåo manmanutut råmas ginin i trongku ya mahutu’ gi chalån-ña. Parehu i linahyan ni manmofo’na yan i manåtatti mane’essalåo a’gang:
“Hosåna! Si Yu’us u såtba i Lahin David!
U matuna Gui’ ni mamamaila’ gi na’an i Saina!
Hosåna! Si Yu’us u såtba Gui’ ginin i yahululu’!”
Anai humålum Gui’ giya Hirusalen interu i taotåo gi siudå manatburutåo, ya manmamaisin, “Håyi esti?”
Ya sigi ha’ manmanoppi i linahyan, “Guiya esti i prufeta as Jesus ginin Nasaret giya Galileha.”
I Ibangheliun i Saina.
I Misa
FINENE’NA NA TINAITAI Is 50, 4-7
Un tinaitai ginin i Lepblun i Prufeta as Isaias
I Saina as Yu’us Ha nå’i Yu’ un måppla’ na hula’, kosa ki siña Hu tungu’ håfa taimanu Hu kuentusi i manyayas un palåbra ni siña mampinangun siha. Kada ogga’an Ha baba i talanga-hu kosa ki siña Yu’ manhunguk; ya tåya’ nai Hu kontra Gui’, tåya’ nai Hu bira Yu’ tåtti. Hu nå’i ni tatalo’-hu para atyu siha i kumastiga Yu’, i fasu-hu para atyu siha i bumo’uk i batbås-su; i matå-hu ti Hu prutehi gi trumpåda yan matu’la’i.
I Saina as Yu’us i ayudu-hu, put ennåo na ti mamåhlåo Yu’; esta Hu istapblesi i matå-hu kalang asga’, sa’ Hu tungu’ na ti Hu mana’mamåhlåo.
I finu’ i Saina.
INEPPIN I SÅTMU Ps 22, 8-9. l7-l8. l9-20. 23-24
R. YU’OS-SU, YU’OS-SU, HÅFA NA UN ABANDONA YU’?
Todu i lumi’i’ yu’ mabutleha yu’;
machichi’i yan mafa’chalik yu’; mayengyung i ilun-ñiha kontra guåhu:
“Un angokku i Saina–po’lu ya Guiya un nina’libri;
yanggin guinaiya håo, po’lu ya Guiya un sinatba.”
INEPPI…..
Låhyan na ga’lågu maridundedeha yu’;
katdumi na manailayi umagulululumi yu’.
Tatfoi inanglo’-ña i addeng-hu yan i kannai-hu
siña hu tufung todu i te’lång-hu.
INEPPI…..
Madibidi i magagu-hu entri siha;
ya manádiga para i chininå-hu.
Låo Hågu, Asaina, mungnga chumågu’ giya guåhu;
Hågu ayudu-hu, chaddik mågi ya Un akudi yu’.
INEPPI…..
Pues bai hu pruklåma i na’ån-mu gi taotåo siha;
bai hu tuna Håo gi halum i inetnun:
“Hamyu ni manma’å’ñåo nu i Saina, tina Gui’!
Todu i rasan Jacob, enra Gui’;
todu i famagu’un Israhet ribirensia Gui’!
INEPPI…..
SIGUNDU NA TINAITAI Phil 2, 6-11
Un tinaitai ginin i Kattan San Pablo para i taotåo Philippi
Todu i tiempu gagaigi i naturåt Yu’us giya Guiya,
låo ti Ha kunsidera na put ginin i fuetsån-ña parehu Gui’ yan Yu’us.
Inlugåt, Ha basihan maisa Gui’
ya Ha chuli’ i naturåt un isklåbu,
ya mafañågu Gui’ gi pinarehun i taotåo.
Tåotåo na eståo matungo’ña, ya put esti na Ha na’humitdi Gui’,
ubidenti Ha aksepta kun todu i finatai, i finatai gi kilu’us!
Ya put esti, na nina’takkilu’ Gui’ as Yu’us
ya nina’i Gui’ ni na’an, ni takkilo’ña ki todu i na’an siha,
kosa ki gi na’án Jesus todu tommu u fandimu
gi langit, yan gi tanu’,yan gi papa’ i tanu’,
yan todu hula’ mapruklåma ginin i glorian Yu’us Tåta:
SI JESUKRISTO SAINA GUI’!
I finu’ i Saina.
IBANGHELIU Mt 26, l4–27, 66osino 27, 11-54
Bitsikulu åntis di i Ibangheliu Phil 2, 8-9
Umosgun si Jesus put hita achukka’ asta i finatai ya måtai Gui’ gi kilu’us.
Put ennåo na nina’takkilu’ Gui’ as Yu’us, ya nina’i Gui’ un nå’an na takkilo’ña ki todu i guaha na nå’an siha.
I Pinadesin i Saina-ta as Jesukristo sigun gi tinigi’ San Mateo
Unu gi dossi na mandisipulu, atyu i ma’å’agang Judas Iskarioti, humånåo para i manmå’gas mamåli’ ya ilek-ña, “Håfa para en na’i yu’ yanggin hu intrega hamyu as Jesus?” Pues matufung trenta pidåsun salåppi’ ya manå’i gui’. Desdi ennåo ha tutuhun si Judas umispiha i aputtunidåt ni para u traiduti si Jesus.
Gi finene’na na ha’åni gi Giput i Pån Sin Libadura manmåttu i mandisipulu guatu gi as Jesus ya mafaisin Gui’. “Månu nai malagu’ Håo nai para in pripåra i senan Påsgua para Hågu?”
Ilek-ña nu siha, “Fanhånåo para esti na tåotåo gi siudå ya en sangåni gui’: ‘Ilek-ña i ma’estru, esta hihihut i Orå-hu; Guåhu yan i mandisipulu-hu para in silebra i Påsgua gi gimå’-mu.’ “
Macho’gui ni mandisipulu taimanu ha’ i mantinagu’ siha as Jesus ya mapripåra i senan Påsgua.
Anai puengi manmatå’chung påpa’ si Jesus yan i dossi na mandisipulu para u fañotchu. Durånti i sena ilek-ña, “Åmen bai Hu sangåni hamyu, unu giya hamyu para u traiduti Yu’.”
Nina’fanggof atburutåo i mandisipulu, ya matutuhun mafaisin Gui’, unu in unu, “Siguru na ti guåhu kumeke’ilek-mu, Asaina?”
Manoppi si Jesus, “Atyu i tumotchi gi plåtu i na’-ña pån yan Guåhu, guiya para u traiduti Yu’. I Lahin i taotåo siempri u måtai taimanu i ilek-ña i Eskritura låo na’ma’si’ atyu na tåotåo i para u trinaiduti i Lahin i Taotåo! Måolekña ha’ para ennåo na tåotåo yanggin ti mafañågu gui’!”
Kumuentus si Judas, i traidot, ya mamaisin, “Ma’estru, siguru na ti guåhu kumeke’ilek-mu?”
Manoppi si Jesus, “Yanggin ennåo sinangån-mu.”
Mientras mañotchuchu, Ha chuli’ si Jesus i pån, mannå’i gråsia, Ha ipi’ i pån, ya Ha nå’i i mandisipulu-ña. Ilek-ña “Chili’ ya en kannu’, Guiya esti i tataotåo-hu.”
Dispues Ha chuli’ i kålis, Ha nå’i gråsia si Yu’us ya mannina’i siha. Ilek-ña, “Fanggimin ni esti, todus hamyu, sa’ Guiya esti i hagå’-hu, ni para u sineyu i kuntråtan Yu’us, machuda’ i hagå’-hu put i linahyan para ma’asi’in i isao siha. Bai Hu sangåni hamyu, na ti bai Hu gimin ta’lu ni esti na binu asta ki gumimin Yu’ yan hamyu nu i nuebu na binu gi Rainun Tatå-hu.”
Dispues mangånta un himnu ya manhuyung ya manhånåo para i Eksu’ Ulibas.
Pues ilek-ña si Jesus nu siha, “På’gu mismu na puengi todus hamyu para en fanmalågu ya para en dingu Yu’, sa’ ilek-ña i Eskritura, ‘Si Yu’us para u punu’ i pastot ya i inetnun kinilu u machalapun.’ Låo dispues di mana’lå’la’ Yu’ ta’lu bai Hu hånåo para Galileha, mofo’na ki hamyu.”
Kumuentus si Pedro ya ilek-ña as Jesus, “Ni ngai’an nai bai hu dingu Håo, achukka’ todu esti siha un diningu!”
Ilek-ña si Jesus as Pedro, “Hahassu esti! Åmen, åntis di u o’o’ i gåyu på’gu na puengi siempri esta tres biåhi un sångan na ti un tungu’ Yu’.”
Manoppi si Pedro, “Ni ngai’an nai bai hu sångan na ti hu tungu’ Håo, achukka’ para bai hu måtai yan Hågu!”
Ya taiguennåo ha’ sinangan-ñiha i ottru mandisipulu siha.
Dispues humånåo si Jesus yan i mandisipulu-ña para un lugåt ni mafa’nana’an Gethsemane, ya ilek-ña nu siha, “Fanmatå’chung guini ya bai Hu hånåo guatu guihi ya bai Hu fanåyuyut.” Ha konni’ si Pedro, yan i dos lahin Zebedee. Puminiti yan muma’å’ñåo Gui’, ya ilek-ña nu siha, “Gof dångkulu i piniti ni gaigi gi kurason-hu ya kana’ ha’ ha yayammak Yu’. Fañåga guini ya en fambela yan Guåhu.”
Sumuha dididi’ ginin siha, Ha yuti’ñaihun Gui’ ya umoppop påpa’ gi edda’ ya manåyuyut, “Tatå-hu, yanggin siña, na’suha esti na kålis pinadesi giya Guåhu! Låo åhi’ ti i malago’-hu, sino ki i malago’-mu.”
Dispues Ha bira Gui’ tåtti para i tres na mandisipulu ya mansinedda’ siha manmamaigu’; ya ilek-ña as Pedro, “Sa’ håfa na ti siña hamyu na tres mambela una ora yan Guåhu? Fambela yan fanmanåyuyut, kosa ki ti en fambasnak gi tentasion. I espiritu malagu’ ha’, låo ñaba’ i sensin.”
Sumuha ta’lu sigundu biåhi ya humånåo manåyuyut, “Tatå-hu, yanggin ti siña mana’suha esti na kålis pinadesi ya debi ha’ di bai Hu gimin, pues u macho’gui i minalago’-mu.” Ha bira Gui’ tåtti ta’lu ya Ha sodda’ i mandisipulu manmamaigu’; ti siña mababa i matan-ñiha.
Sumuha ta’lu tetset biåhi ya humånåo manåyuyut, Ha såsangan etmismu palåbra siha. Dispues Ha bira Gui’ tåtti gi mandisipulu ya ilek-ña, “Asta på’gu ha’ manmamaigu’ yan mandiskåkansa hamyu? Atan ha’! Måttu esta i ora anai para u ma’intreganñaihun i Lahin i Taotåo guatu gi nina’siñan i mani’isåo na tåotåo. Fangahulu’! Nihi ta fanhånåo. Atan ha’, sa’ estigui’ i taotåo ni para u traiduti Yu’!”
Kumuekuentus ha’ Gui’ trabiha anai si Judas, unu gui’ gi dossi na mandisipulu, måttu. Mañisiha yan un dångkulun linahyan tåotåo manmañuñuli’ såpbli yan galuti, nina’fanhånåo ni manmå’gas mamåli’ yan i manåmku’ na ManHudihos. I traidot ha nå’i un siñåt i linahyan: “Atyu i hu chiku Guiya i malagu’-miyu. Aresta Gui’!”
Anai måttu si Judas tunanas guatu as Jesus ya ilek-ña, “Pås para Hågu, Ma’estru,” ya ha chiku Gui’.
Manoppi si Jesus, “Amigu, såhyåo chumo’gui esti!”
Pues manmalak guatu giya Guiya, ma’aresta si Jesus, ya mago’tin måolik Gui’. Unu gi atyu siha i mangga’chochong-ña si Jesus ha laknus i sapblen-ña ya ha tåga’ i isklåbun i Mås Må’gas na Påli’ ya ha utut i talanga-ña. Pues ilek-ña si Jesus nu guiya, “Na’ta’lu tåtti i sapblem-mu gi bainan-ña, sa’ todu i manmanggogo’ti såpbli u fanmåtai ginin i sapbli. Kåo ti un tungu’ na siña ha’ Hu ågang si Tatå-hu para u ayuda Yu’ ya siña insigidas Ha na’hanågui Yu’ dossi na tropan sindålun manånghit? Låo yanggin taiguini, håfa taimanu para u makumpli i Eskritura ni ilek-ña na debidi taiguini u masusedi?”
Pues Ha kuentusi si Jesus i linahyan, “Kåo debidi en fanmåttu manmañuñuli’ såpbli yan galuti para en kenni’ Yu’, kalang mohun kriminåt Yu’? Kada diha matåta’chung ya mama’nåna’gui gi Templu, ya ti en aresta Yu’. Låo todu esti siha manmasusedi para u makumpli atyu i tinigi’ i prufeta siha gi Eskritura.”
Intonsis todu i mandisipulu madingu Gui’ ya manmalågu.
Atyu siha i umaresta si Jesus makonni’ Gui’ para i gima’ Caiaphas, i Mås Mågas Påli’, anai iståba na mane’etnun i manma’estrun i Lai yan i manåmku’. Tinattitiyi Gui’ as Pedro gi lachagu’ ha’ na distånsia, asta i kabiseran i gima’ i Mås Må’gas Påli’. Humålum gi kabisera ya matå’chung påpa’ yan i guåtdia siha para u li’i’ håfa para uttimonña si Jesus. I manmå’gas mamåli’ yan interu i Konsiliu machagi makésodda’ dinagi na ibidensia kontra si Jesus, para u mana’mapunu’ Gui’. Låo ti manmañodda’ ni unu, maseha meggai mangahulu’ ya masångan dinagi kontra Guiya. Put lusuttimu malak mo’na dos na låhi ya ilik-ñiha, “Esti na tåotåo ilek-ña, ‘Siña ha’ Hu yulang påpa’ i Templun Yu’us ya bai Hu kåhat ta’lu tåtti gi tres dihas.’ “
Tumohgi i Mås Må’gas Påli’ ya ilek-ña, “Kåo tåya’ ineppem-mu para esti siha na finaila’ kontra Hågu?”
Låo mamatkilu ha’ si Jesus. Pues kinuentusi Gui’ ta’lu ni Mås Må’gas Påli’, “Gi na’an i lala’la’ na Yu’us, bai hu na’fanhula Håo på’gu: sangåni ham kåo Hågu i Misihas, i Lahin Yu’us.”
Ineppi gui’ as Jesus, “Taiguennåo ilek-mu. Låo bai Hu sangåni todus hamyu: desdi på’gu para mo’na siempri en li’i’ i Lahin i Taotåo matåta’chung gi agapa’ na båndan i Todu Ha Na’siña, ya mamamaila’ gi hilu’ i mapagåhis i langit!”
Guini nai ha titik magagu-ña i Mås Må’gas Påli’ ya ilek-ña, “Ha chatfinu’i si Yu’us! Ti ta nisisita mås tistigu! Guiya mismu nai en hinguk i tailayin fino’-ña! Håfa hinassun-miyu?”
Manmanoppi siha, “Umisao Gui’, ya debidi u måtai.”
Dispues mato’la’i matå-ña yan ma’anña Gui’; ya atyu siha i pumatmåda Gui’ ilik-ñiha, “Fama’prufeta para hami, Misihas! Sangåni ham håyi gumaluti Håo!”
Iståba na matåta’chung si Pedro gi sanhiyung gi kabisera, anai måttu guatu giya guiya i muchåchan i Mås Må’gas Påli’ ya ilek-ña, “Hågu lokkui’ humahamyu yan si Jesus i taotåo Galileha.”
Låo ha puni gi me’nan todu. “Ti hu tungu’ håfa ilelek-mu,” i ineppen-ña, ya humånåo huyung para i intrådan i kabisera. Lini’i’ gui’ ni ottru na muchåcha ya ilek-ña ni lalåhi siha gi uriyå-ña, “Iståba na sumisiha esti na tåotåo yan si Jesus tåotåo Nasaret.”
Ha puni ta’lu si Pedro, ya ilek-ña, “Bai hu fanhula na ti hu tungu’ ennåo na tåotåo!”
Un råtu dispues, i lalåhi ni manotohgi guennåo manmåttu guatu gi as Pedro. Ilik-ñiha, “Hunggan, unu håo gi entri siha. A’annuk ha’ ginin i kuentos-mu!”
Manhula si Pedro, ilelek-ña, “Si Yu’us u kastiga yu’ yanggin ti hu såsangan i minagåhit! Ti hu tungu’ ennåo na tåotåo!”
Insigidas umo’o’ i gåyu, ya ha hassu si Pedro håfa sinangån-ña si Jesus nu guiya, “Åntis di u o’o’ i gåyu, siempri esta tres biåhi di un sångan na ti un tungu’ Yu’.” Humånåo huyung ya duru kumåti.
Gi chatanmak, todu i manmå’gas mamåli’ yan i manåmku’ gi sengsung manetnun para u mahassuyi håfa taimanu nai para u mapunu’ si Jesus. Pues magoddi Gui’ ni kadena, mana’hånåo ya ma’intrega Gui’ guatu gi maga’låhi as Pilåto.
Atyu nai si Judas i trumaiduti si Jesus anai ha li’i’ na munhåyan masentensia para u mapunu’, mañotsut, ya ha na’na’lu i trenta pidåsun salåppi’ guatu gi manmå’gas mamåli’ yan manåmku’ ya ilek-ña, “Umisåo yu’, sa’ hu traiduti i tai’isao na tåotåo.”
Låo manmanoppi siha ilik-ñiñiha, “Na håfa ennåo para hami? Hågu la’mun.”
Pues ha dåggåo i salåppi’ gi halum Templu, ya må’pus. Humånåo huyung ya ha ñaka’ gui’.
Låo i manmå’gas mamåli’ mahokka i salåppi’ ya ilik-ñiha. “Ti dinanchi na u mapo’lu esti gi limosnan i Templu, sa’ apas håga’ esti.” Ya dispues di manakonsutta, ma usa i salåppi’ ya mafåhan i fanggualu’an i mama’titinas nå’yan mamafak siha, ya mafa’simenteyu para i istrangheru siha. Ennåo mina’ asta på’gu na ha’åni mafa’nana’an ennåo na guålu’, “Guålu’ Håga'”.
Para u makumpli i ha sångan i Prufeta as Jeremias, “Machuli’ i trenta na pidåsun salåppi’, balin isklåbu-presiu ni mapo’lu ni Israelitas, ya ma’usa i salåppi’ para u mafåhan i gualu’ taimanu ha’ i tinago’-ña i Saina nu guåhu.”
Makonni’ si Jesus para i me’nan i maga’låhi, ya finaisin Gui’ ni maga’låhi, “Kåo Hågu i Rai i ManHudihos?”
Manoppi si Jesus, “Hågu sumångan.” Ya anai mafa’aila’ nu i manmå’gas mamåli’ yan manåmku’, tåya’ fino’-ña.
Pues ilek-ña si Pilato nu Guiya, “Kåo siguru na un huhunguk i mineggai finaila’-ñiha nu Hågu?”Låo tåya’ ineppen-ña, ni håfa na finihu’. Nina’sen manman i maga’låhi.
Ya gi ha’ånin i ma’gas na guput, kustumbrin i maga’låhi na u na’libri unu gi presuneru, sigun i minalagu’ i taotåo. Atyu na tiempu guaha un presuneru sen matungu’ ni na’ån-ña si Baråbas. Pues put i esta manetnun i taotåo, ilek-ña si Pilåto nu siha, “Håyi malagu’-miyu para bai hu na’libri, si Baråbas, osino si Jesus i mafa’na’an i Kristo?” Ha tungu’ na put embidiu na makonni’ guatu si Jesus.
Anai matåta’chung gi siyå-ña i maga’låhi, nina’fattuyi ni asaguå-ña mensåhi: “Cha’-mu ume’entalu’ nu ennåo na tunas tåotåo, sa’ ginin mangguifi yu’ put Guiya, ya ha na’chathinassu yu’.”
Mientras tåntu i manmå’gas mamåli’ yan i manåmku’ mana’fanmalagu’ i taotåo siha na u magågåo si Baråbas, ya u mana’mapunu’ si Jesus. Pues anai ha faisin siha i maga’låhi, “Håyi malagu’-miyu gi entri i dos bai hu na’libri?”
Manmanoppi siha, “Si Baråbas.”
Ilek-ña Si Pilåto nu siha, “Håfa yu’ bai hu cho’gui as Jesus, ni mafa’nana’an i Kristo?”
Manmanoppi siha, “U ma’atåni gi kilu’us.”
Låo Ilek-ña, “Håfa na tailayi fina’tinås-ña?”
Ya mås manla’a’gang manessalåo: “U ma’atåni gi kilu’us.”
Ya anai ha ri’alisa si Pilato na tåya’ minaolik siña ha cho’gui sino ki lumadangkulu i yinaoyåo; mañuli’ hånum, ha fa’gåsi i kannai-ña gi me’nan-ñiha ya ilek-ña, “Tåya’ isåo-hu nu i haga’ esti na tunas tåotåo, hamyu la’mun.”
Manmanoppi interu i linahyan, “Po’lu ya hami yan i famagu’un-måmi in fanrispunsåpbli ni finatai-ña!”
Pues ha sottåyi siha as Baråbas; ha na’masåolak si Jesus fine’na ya ha intrega Gui’ guatu para u ma’atåni gi kilu’us.
Atyu nai i sindålun i maga’låhi makonni’ si Jesus guatu gi sumanhalum, ya manetnun todu i sindålu siha. Ma pula’ i magagu-ña, ya matåmpi Gui’ ni agaga’ na magågu. Ya anai manmåmfuk kuronan låktus, mapo’lu gi ilu-ña, ya mapo’lu håyun pi’åo gi agapa’ na kannai-ña. Ya matutuhun mabutleha Gui’ mandidimu gi me’nå-ña ilik-ñiñiha, “In saluda Håo, Rai i ManHudihos.” Ma to’la’i ya machuli’ i pi’åo ya madåkkut i ilu-ña. Anai munhåyan mabutleha, mapula’ i agaga’ na magågu, ya mana’minagågu Gui’ nu i magagu-ña, ya makonni’ Gui’ guatu para u ma’atåni gi kilu’us.
Gi kinekiyung-ñiha masodda’ un låhi, tåotåo Sirenehu, ni mafa’nana’an Simon, ya mana’uma
nu i kilu’us Jesus.
Anai manmåttu gi lugåt ni mafa’nana’an Golgota, i na’an kumeke’ilek-ña i Lugåt i Kalabera ya mana’gimin Gui’ binu ni mana’dañña’ yan lala’it. Gigun Ha tamtam Ha rinunsia.
Anai ma’atåni Gui’ gi kilu’us manmadiga para manmapåttinñaihun i magagu-ña ya manmatå’chung para u mapulan Gui’. Mapo’lu gi hilu’ i ilu-ña i mafa’aila’-ña: “Si Jesus esti, i Rai i ManHudihos.” Atyu nai, maklåba dos kriminåt, unu gi agapa’-ña, ya i ottru gi akagguen-ña.
I taotåo siha ni manmaloloffan machatfinunu’i Gui’, ya anai manggogonggung ilik-ñiha, “Dalai lokkui’, Hågu para Un yulang i Templu ya Un håtsa hulu’ ta’lu gi tres dihas, na’librin maisa Håo. Yanggin Hågu i Lahin Yu’us, tunuk guennåo gi kilu’us.”
I manmå’gas mamåli’, i manma’estrun i Lai yan i manåmku’ i taotåo mandadañña’ lokkui’ ilik-ñiñiha, “Ha na’fanlibri i pumalun tåotåo, ya ti siña Ha na’librin maisa Gui’. Ya ilek-ña na Guiya i Rai i ManHudihos. Po’lu ya u tunuk ginin i kilu’us, ya ta fanmanhonggi nu Guiya. Ha angokku si Yu’us, po’lu ya si Yu’us u nina’libri Gui’ yanggin malagu’. Sa’ ilek-ña, ‘Guåhu Lahin Yu’us Yu’.’ “
Gi mismu na manera mabutleha Gui’ ni i dos kriminåt ni ga’chong-ña gi kilu’us.
Gi talu’åni, homhum todu i tanu’, put tres oras. Ya gi oran alas tres, umessalåo si Jesus a’gagang, “Eli, Eli, lama sabachthani?” Kumeke’ilekña, “Yu’os-su, Yu’os-su, sa’ håfa na Un dingu Yu’?”
I taotåo siha ni manggaigi guihi ma’åluk, “Ha å’agang si Elias!” Insigidas unu giya siha mañuli’ ispongha, mana’sinimai binakli, ya masa’hang gi pi’åo, ya mana’gimin.
Låo i palu masåsangan, “Po’lu, ya ta li’i’ kåo u fåttu si Elias!”
Umågang ta’lu si Jesus ni a’gagang na bos ya måtai.
Fandimu påpa’ un råtu
Atyugui’ na i kuttina gi templu matitik talu’ desdi i yahululu’ asta i yapåpapa’. Mayengyung i tanu’, ya i atchu’ siha manmayamak; i naftan siha manmababa, ya meggai na tataotåo i mañåntus ni manmåtai mangahulu’. Manhuyung ginin i naftan, ya dispues di lumå’la’ ta’lu si Jesus, manhålum gi santus na siudå ya meggai na tåotåo lumi’i’ siha.
I ma’gas i sientu na sindålu yan i mangga’chong-ña ni pumupulan si Jesus, anai masienti i linao yan mali’i’ i palu siha na sinisedi nina’fanggof ma’å’ñao ilik-ñiñiha, “Magåhit ha’, na Guiya, i Lahin Yu’us.”
Ya maniståba meggai na famalåo’an, manmana’atan gi un distånsia, siha ni umisgaihun si Jesus ginin Galileha, para u ma’ayuda gi nisisidåt-ña. Gi entalu’-ñiha iståba si Maria Magdalena, yan Maria i nanan Santiago yan Jose i disipulu, yan i asaguan Zebedee.
Anai lumalahomhum, måttu un riku na tåotåo ginin Arimateha ni mafa’nana’an Jose. Guiya lokkui’ unu gi disipulu-ña, malak as Pilato, ya ha gågåo i tataotåo Jesus. Atyu nai si Pilato manågu’ na u masotta i tataotåo. Pues ha konni’ i tataotåo, ha balutan ni un såbanas gåsgas, ya ha po’lu gi nuebu na naftån-ña, ni matåga’ ginin i atchu’. Ya ha na’apu’ guatu dångkulu na åtchu’ gi pettån-ña, dispues humånåo. Låo si Maria Magdalena yan i ottru Maria matå’chung guennåo mafåfana’ i naftan.
Gi sigenti diha, atyu na ha’åni i tumattitiyi i Ha’ånin Priparasion, i manmå’gas mamåli’ yan i MamFarisehu manmalak i gima’ Pilato. Ilik-ñiha, “Siñot, pa’gu in hahassu na esti na kriminåt ilek-ña anai låla’la’ ha’ Gui’ na, ‘Bai Hu kahulu’ ta’lu gi mina’tres dihas.’ Debi di un fanotdin na u maguåtdia i naftan asta i mina’tres dihas. Sa’ atyu i u fanmåttu i mandisipulu-ña ya u masåkki i tataotåo-ña ya u fanmasangåni i taotåo siha, ‘Mana’lå’la’ Gui’ ta’lu ginin i finatai!’ Esti i uttimu na dinagi siempri mås båba ki i fine’na.”
Mansinangåni siha as Pilato, “Guåha ha’ guatdian-miyu, fanhånåo ya en asigura måolik i naftan.”
Pues manhånåo ya maguåtdia i naftan ya manå’yi seyu i atchu’!
I Ibangheliun i Saina.
