A B C
FINENI’NA NA TINAITAI Acts 2, 1-11
Un tinaitai ginin i Bidan i Manapostulis
Anai måttu i ha’ånin Pentekostes, mansinedda’ i mandisipulu mane’etnun gi un lugåt. Gotpi ha’ måttu un dångkulu na buruka kalang mohun un metgut na månglu’ ginin hihilu’ gi mapagåhis ni mahunguk gi todu i halum guma’ anai manmatåta’chung siha. Kalang guåfi na hula’ manannuk ya dispues machalapun ya mañåga gi hilu’ kada unu giya siha. Todus mambula ni Espiritu Såntu. Matutuhun manguentus gi ottru lingguåhi yan manmananununsia manna’manman na sinangan mientras maninayuyuda ni Espiritu.
Maniståba giya Hirusalen guihi na tiempu mandibotu na ManHudihos siha ginin todu nasion. Mahunguk i buruka ya manetnun gi un dångkulu na gurupu. Maningkibukåo hinassun-ñiha sa’ kada unu giya siha mahunguk i lalåhi manguekuentus gi lingguåhin-ñiha mismu. Nina’fanmanman siha ni todu i masusedi. Manmamamaisin sa’ mansen manman, “Na ada ti todu ha’ esti siha na tåotågui i manguekuentus tåotåo Galileha? Håfa taimanu na kada unu giya hami in hihinguk siha gi lingguåhin-måmi. Puru ham tåotåo Parthian, tåotåo Medes, yan tåotåo Elamites. Mañåsaga ham giya Mesopotamia, Judea yan Cappadocia, Pontus, Asia, Phrygia yan Pamphylia, Ihipto, yan i uriyan Libya, fi’un Sirenehu. Guaha siha bisita ginin Roma, todu ManHudihos, Cretans yan Arabs lokkui’. Låo kada unu giya hami humunguk siha manguekuentus gi linggguåhin-måmi put i manna’manman na che’chu’ Yu’us.”
I finu’ i Saina.
INEPPIN I SÅTMU Ps 104, 1. 24. 29-30. 31. 34
R. (30) ASAINA, NA’FÅTTU I ESPIRITU-MU
YAN RINUEBA I HICHURAN I TANU’.
Anti-hu, tuna i Saina!
Asaina, Yu’os-su, magåhit na må’gas Håo!
Difirentis klåsi siha i fina’tinås-mu, Asaina!
bula i tanu’ ni fina’tinås-mu.
INEPPI …..
Puedi u tatachu ha’ todu i tiempu i glorian i Saina;
puedi u maguf i Saina ni fina’tinås-ña!
Puedi u nina’maguf si Yu’us ni kantåk-ku;
siempri bai hu maguf gi Saina.
INEPPI…..
Yanggin Un na’påra manhågung, siempri manmåtai
ya u fana’lu tåtti gi petbus ni ginin ennåo na manmafa’tinas siha.
Anai Un na’hånåo mo’na i hinagong-mu, manmafa’tinas siha,
ya Un rinueba i hichuran i tanu’.
INEPPI …..
SIGUNDU NA TINAITAI 1 Cor 12, 3b-7. 12-13
Un tinaitai ginin i fine’na na Kattan San Pablo para i taotåo Corinth
Hafane’lus:
Tåya’ siña kumomfisatñaihun na si “Jesus Saina Gui’,” solu dinidikta gui’ ni
Espiritu Såntu. Guaha difirentis klåsin esperituhåt na rigålu, låo Guiya ha’ atyu na Espiritu i mannåna’i. Guaha difirentis klåsin sitbisiu, låo etmismu Saina ha’ masesetbi. Guaha difirentis klåsin kapasidåt para u macho’gui i sitbisiu, låo etmismu Yu’us numåna’i kapasidåt todu para u macho’gui kada sitbisiu. Mana’a’ánnuk i gumaigin i Espiritu gi kada tåotåo para minaolik todu.
I Kristo kalang un tataotåo ni meggai na påtti; låo un tataotåo ha’, achukka’ manggaigi meggai difirentis na påtti. Gi etmismu manera, todu hit, maseha ManHudihos siha patsino MamPagånu, måseha manisklåbu patsino manlibri, manmatakpångi hit gi un tataotåo ginin i etmismu Espiritu, ya todu hit manmanå’i ni esti i uniku na Espiritu para ta gimin.
I finu’ i Saina.
“SEQUENCE”
Maila’, Espiritu Såntu, maila’!
Ya ginin i linangitan na gimå’-mu
Na’fanina i yiniusan na kåndit!
Maila’, Tatan i mamopbli!
Maila’, Hågu ni mannåna’i rigålu’!
Maila’, Hågu ni kandit i kurason tåotåo!
Hågu, i mås måolik mangunsuela;
Hågu, i mås amigun i anti;
Suåbi na diskånsu guini gi tanu’;
Gi che’chu’-måmi, mamis na diskånsu;
Ma’agradesi na frinesku gi minaipi;
Kunsuelu gi halum pininiti.
O matuna na Kåndit Yu’us,
Fanina guini gi kurason-mu,
Yan na’bula i sanhalum-måmi!
Yanggin taigui Håo, mantåya’ ham,
Tåya’ måolik cho’chu’ pat hinassu,
Tåya’ libri gi mancha pat båba.
Na’homlu i chetnut-måmi, na’fanmetgut ham ta’lu;
Gi inanglu’-måmi na’fåttu i sirenu;
Fa’gåsi i manchan i isao.
Na’maññaña’ i mahettuk na kurason;
Na’lagu’ i manenghing, na’maipi i figu;
Chachalåni i a’abak na ådding.
Gi mamfi’et, ni manmanadodora
Yan makomfisatñañaihun Håo kada diha
Na’fåttu i sietti na rigalu-mu;
Nå’i siha premiun bittut;
Nå’i siha ni satbasion-mu, O Asaina;
Nå’i siha taihinekkuk na minaguf. Åmen.
Åleluia.
IBANGHELIU Jn 20, 19-23
R. Åleluia. MAILA’, ESPIRITU SÅNTU, YA UN NA’FAMBULA I
KURASON I MAMFIET NU HÅGU;
YA NA’FAÑILA’ I GUAFIN I GINIFLI’E’-MU GIYA SIHA.
R. Åleluia.
+ Un tinaitai ginin i såntu Ibangheliu sigun gi tinigi’ San Juan
Gi pupuengin atyu i primet na ha’åni gi simåna, maseha manmakandålu ni mandisipulu i pettan atyu na lugåt anai maniståba siha, put i manma’å’ñao-ñiha ni ManHudihos, måttu si Jesus ya tumohgi gi me’nan-ñiha. Ilek-ña, “I pås u gaigi giya hamyu.” Anai munhåyan Ha sångan esti, mamfina’nu’i siha ni kanai-ña yan i kalaguåk-ña. Manmaguf i mandisipulu anai mali’i’ i Saina. Ilek-ña ta’lu, “I pås u gaigi giya hamyu. Taimanu ha’ na Ha na’hånåo Yu’ si Tåta, taiguennåo ha’ na Guåhu bai Hu na’fanhånåo hamyu.” Pues manhinagungi siha ya ilek-ña: “Risibi i Espiritu Såntu. Yanggin en asi’i i isao tåotåo, u fanma’asi’i siha; yanggin ti en asi’i, ti u fanma’asi’i siha.”
I Ibangheliun i Saina.
