A, B, C
FINENI’NA NA TINAITAI Acts 10, 34a. 37-43
Un tinaitai ginin i Bidan i ManApostulis
Ha tutuhun kumuentusi siha si Pedro i MamPagånu ni esti siha na palåbra: “Gi hinassok-ku na en tingu’ ha’ håfa masåsangan gi todu iya Hudeha put si Jesus i taotåo Nasaret, ni matutuhun giya Galileha put i båotismu ni ha setmunñaihun si Juan; håfa taimanu si Yu’us na Ha olius Gui’ ni Espiritu Såntu yan pudet. Lumålåoya Ha chocho’gui manmåolik na cho’chu’ yan Ha na’fanhohomlu’ todu atyu siha i manggaigi gi papa’ i nina’siñan i aniti, ya gaigi si Yu’us giya Guiya. Hami mantistigu ni todu siha i bidå-ña gi tanu’ i ManHudihos yan giya Hirusalen.
Put lusuttimu, mapunu’ Gui’, makana’ gi hilu’ un trongku, låo nina’lå’la’ Gui’ ta’lu as Yu’us gi mina’tres dihas ya Ha sedi na u mali’i’ Gui’, låo ti para todu u lini’i’ Gui’, solu atyu ha’ na tistigu siha i esta maninatyik as Yu’us kun tiempu–era hami ni mañotchu yan manggimin yan Guiya dispues di mana’lå’la’ Gui’ ginin i finatai. Guiya muna’fanhånåo ham para in setmuni i taotåo siha yan para in fantistigu na Guiya atyu i nina’sahngi as Yu’us kumu hues i manlåla’la’ yan i manmåtai. Todu i mamprufeta mantistigu put Guiya, ilik-ñiñiha na todu atyu siha i manmanhonggi manma’asi’i i isao-ñiha gi na’ån-ña.”
I finu’ i Saina.
INEPPIN I SÅTMU Ps 118, 1-2. 16-17. 22-23
R. (24) PÅ’GU I HA’ÅNI NI HA FA’TINAS I SAINA; NIHI TA FANMAGUF.
Nå’i gråsia i Saina, sa’ måolik Gui’
sa’ i mina’ase’-ña para todu i tiempu.
Po’lu i gima’ Israhet ya u åluk,
“I ginefli’i’ Yu’us dinidira todu i tiempu.”
INEPPI…..
“I agapa’ na kannai i Saina makåhat hulu’;
i agapa’ na kannai i Saina manyalibåo kun fuetsa.”
Ti bai hu måtai låo bai hu lå’la’
ya bai hu diklåra i che’chu’ i Saina.
INEPPI…..
I atchu’ ni marichåsa ni atyu siha i manmanhåhatsa
mama’un åtchu’ ni imputtånti gi gima’.
I Saina muna’macho’gui esti;
mambunitu esti siha gi matå-ta.
INEPPI…..
SIGUNDU NA TINAITAI Col 3, 1-4
Un tinaitai ginin i Kattan San Pablo para i taotåo Colossae
Hafañe’lus: Esta mana’fanlå’la’ hamyu yan i Kristo Jesus, pues båtga hamyu gi kosas långit, anai matåta’chung i Kristo gi tronu-ña gi agapa’ na båndan Yu’us. Cha’-miyu muna’susuha i hinassun-miyu gi kosas siha guihi, åhi’ ti i kosas esti na tånu’. Esta manmåtai hamyu, ya i lina’la’-miyu uma’attuk yan i Kristo gi as Yu’us. Gaigi gi Kristo i magåhit na lina’la’-miyu ya yanggin umannuk Gui’, siempri manannuk hamyu yan Guiya para en fañåonåo gi gloriå-ña!
I finu’ I Saina.
IBANGHELIU Jn 20, 1-9
R. Åleluia. SI JESUKRISTO HUMUYUNG MAMA’SAKRIFISIUN PÅSGUA;
NIHI TA FANGGUPUT KUN MINAGUF YAN I SAINA.
R. Åleluia.
+ Un tinaitai ginin i såntu Ibangheliu sigun gi tinigi’ San Juan
Tåftataf gi chatanmak gi primet ha’åni gi simåna, trabiha hohomhum ha’, måttu si Maria Magdalena gi naftan. Anai ha li’i’ na mana’suha i atchu’ gi sagå-ña malågu guatu gi as Simon Pedro yan i ottru na disipulu (atyu i ginefli’i’ as Jesus) ya ha sångani siha, “Makonni’ i Saina ginin i naftan! Ti in tingu’ månu nai mapo’lu Gui’!” Ennåo na si Pedro yan i ottru na disipulu humånåo guatu para i naftan. Umalapåpat i dos malågu, låo i ottru na disipulu ha ikak si Pedro ya guiya finene’na måttu gi naftan. Ti humålum gui’ låo tumekkun påpa’ ya umengelu’ hålum ya ha li’i’ i be’i gi hilu’ odda’. Guennåo mismu na mumentu måttu si Pedro ya humålum gi naftan. Ha ripåra i be’i gi hilu’ odda’ ya ha li’i’ i pidåsun magågu ni tumåtampi i ilu-ña na ti sumisiha yan i be’i na iståba mafalulun na maisa gi un bånda. Dispues di esti, humålum i disipulu ni finene’na måttu gi naftan. Ha li’i’ ya manhonggi. (Hahassu ha’ na trabiha ti makumprerendi i Eskritura na debidi u lå’la’ ta’lu si Jesus ginin i finatai.)
I Ibangheliun i Saina.
