B
FINENI’NA NA TINAITAI Ex 24, 3-8
Un tinaitai ginin i Lepblun Exodus
Humånåo si Moises ya ha sangåni i taotåo siha ni todu i tinagu’ Yu’us yan todu siha i areklamentu. Gi ineppin-ñiha todu i taotåo masångan gi un bos, “Bai in kimpli todu i tinagu’ ni Ha otdin i Saina.” Ha tugi’ påpa’ si Moises todu i tinagu’ i Saina, ya tåftaf gi sigenti ogga’an manhåtsa un åttat gi sampapa’ gi eksu, ha usa dossi na åtchu’ ni manotohgi para i dossi na rasan Israhet. Pues ha tågu’ unus kuåntus manhobin na ManIsrailitas para u fanmanufresi tureti para i Saina kuentan sakrifisiun kumuñon. Ha chuli’ si Moises lamitå gi haga’ ya ha po’lu gi palanggåna siha, i ottru lamitå ha såtpi guatu gi attat. Ya ha chuli’ i Lepblun i Kuntråta ya ha taitayi i mane’ekkunguk na tåotåo, ya ilik-ñiha, “Bai in kimpli todu i Ha otdin i Saina; bai in esgi.” Pues ha chuli’ si Moises i haga’ ya ha såtpi guatu i taotåo siha. Ilek-ña “Guiya esti i haga’ i Kuntråta ni Ha fa’tinas i Saina yan hamyu, gaigi guini todu esti siha na areklu.
I finu’ i Saina.
INEPPIN I SÅTMU Ps 116, 12-13. 15-16. 17-18
R. (13) BAI HU CHULI’ I KÅLIS I SATBASION,
YA BAI ÅGANG I NA’AN I SAINA.
Taimanu apås-su ni Saina
put todu i minaolek-ña nu guåhu?
Bai hu håtsa i kopan satbasion
ya bai hu ågang i na’an i Saina.
INEPPI…..
Guaguan gi me’nan i Saina
i finatai i mamfiet nu Guiya.
Asaina, guåhu i tentago’-mu, i patgun i tentago’-mu;
Hågu sumåtba yu’ ginin i finatai.
INEPPI…..
Bai hu fanufresi sakrifisiun agradesimentu,
ya bai hu ågang i na’an i Saina.
Bai hu apåsi i Saina ni prumeså-hu
gi me’nan todu i taotåo-ña.
INEPPI…..
SIGUNDU NA TINAITAI Heb 9, 11-15
Un tinaitai ginin i Katta para i ManHibrehu
Hafañe’lus:
Låo esta måttu i Kristo kumu i Takkilu’ na Påli’ i manmåolik siha na kosas ni esta manggaigi guini. I tento’ anai gaigi Gui’ mañeñetbi mås takkilu’ yan mås kabålis; åhi’ ti kannai tåotåo fuma’tinas, kumeke’ilekña na åhi’ ti såsaonåo gi kosas siha ni manmafa’tinas guini na tånu’. Anai humålum i Kristo gi tento’ ya måttu gi Mås Sagrådu na Lugat, åhi’ ti mañuli’ haga’ chiba osino haga’ nubiyu para u ufresi kumu sakrifisiu; inlugåt, Ha chuli’ i hagå’-ña mismu ya Ha gånna i taihinekkuk na satbasion para hita. I haga’ chiba yan nubiyu yan i apu ni ginin i ansonggin tatneru manmachuli’ ya manmasåtpi i taotåo siha ni ti manggåsgas sigun i ginagagåo ni sirimoñas, ya esti para u nina’fanggåsgas siha ginin i inapplacha’. Ya put i magåhit esti, kuåntu mås siña manmakumpli ginin i haga’ i Kristo! Ginin i taihinekkuk na Espiritu Ha ufresin maisa Gui’ as Yu’us kumu i mås kabålis na sakrifisiu. I hagå’-ña siempri para u nina’gåsgas i kunsensiåt-ta ginin i manai bali na sirimoñas, ya ennåo nai siña ta setbi i lala’la’ na Yu’us.
Put esti na rason na Guiya i Kristo prumipåpara i nuebu na kuntråta, kosa ki atyu siha i maninagang as Yu’us u fansiña rumisibi i taihinekkuk na bendision ni Ha prumeti si Yu’us. Sumiña esti masusedi sa’ guaha måtai ni Ha na’fanlibri i taotåo siha ginin i linachi ni makumeti anai ifektitibu ha’ i primet na kuntråta.
I finu’ i Saina.
IBANGHELIU Mk 14, 12-16. 22-26
ÅLELUIA
R. Åleluia. ILEK-ÑA I SAINA, GUÅHU I LALA’LA’ NA PÅN GININ I LANGIT;
HÅYI I KUMÅNNU’ ESTI NA PÅN U LÅ’LA’ TAIHINEKKUK.
R. Åleluia
+ Un tinaitai ginin i såntu Ibangheliu sigun i tinigi’ San Marcos
Gi fine’na na ha’ånin Pån Sin Libadura, sigun gi kustumbri anai para u masakrifika i kinilun Påsgua, ilik-ñiha i mandisipulu-ña nu Guiya, “Månu nai malagu’ Håo nai para in pripåra i senan Påsgua para Hågu?” Ha na’hånåo dos na disipulu-ña yan esti na tinago’-ña: “Hånåo hålum gi siudå ya siempri manasodda’ hamyu yan un tåotåo ni mangingilili tårun hånum. Dalalaki gui’. Maseha månu na guma’ ni humålum gui’, faisin i gai gima’, ‘Mamamaisin i Ma’estru, månggi i såla anai siña sumena Gui’ yan i mandisipulu-ña ni senan Påsgua?’ Intonsis siempri mamfina’nu’i hamyu un kuåttu gi sanhilu’, dångkulu, guaha tråstis, yan todu areklåo. Guiya esti na lugåt i para en na’listu para hita.” Humånåo i dos disipulu. Anai måttu gi siudå masodda’ todu taimanu ha’ i mansinangåni siha, ya mapripåra i senan Påsgua.
Durånti i sena mañuli’ pån, Ha bendisi yan Ha ipi’, ya Ha nå’i siha, ilek-ña, “Chili’ esti, Guiya esti i tataotåo-hu.” Taiguennåo ha’ ta’lu Ha chuli’ i kålis, mannå’i gråsia ya mannina’i siha, ya todu manggimin ginin ennåo. Ilek-ña nu siha, “Guiya esti i hagå’-hu, i haga’ i kuntråta, para u machuda’ñaihun put i linahyan. Åmen, sulemni bai Hu asigura hamyu, ti bai gimin ta’lu binu asta ki Hu gimin i nuebu gi rainun Yu’us!” Dispues di mangånta kantan tinina, manmamokkat guatu gi Eksu’ Ulibas.
I Ibangheliun i Saina.
