FINENE’NA NA TINAITAI Gn 14, 18-20
Un tinaitai ginin i Lepblun Genesis
Si Melchizedek, i rai iya Salem, mañuli’ huyung pån yan binu, ya put i pali’ i Mås Takkilu’ na Yu’us gui’, ha bendisi si Abram ni esti siha na finihu’:
“Si Yu’us i Mås Takkilu’, ni muna’huyung i langit yan i tanu’,
U binendisi si Abram;
Ya u matuna si Yu’us i Mås Takkilu’,
Guiya ni Ha intrega gi kannai-mu i maninimigu-mu siha.”
Ya si Abram ha nå’i gui’ un-dies påtti ginin todu.
I finu’ i Saina.
INEPPIN I SÅTMU Ps 110, 1. 2. 3. 4
R. PÅLI’ HÅO PARA TODU I TIEMPU GI OTDIN MELCHIZEDEK.
Ilek-ña i Saina nu Hågu, Saina-hu: “Fatå’chung gi tronu-mu gi
agapa’-hu ya bai Hu fa’oddas i addeng-mu i maninimigu-mu.”
INEPPI….
I bastun må’gas na pudet-mu i Saina para u istira desdi iya Sion.
Ilek-ña i Saina: “Fanmånda gi hilu’ i maninimigu-mu.”
INEPPI…..
“Manå’i håo fuetsan prinsipi desdi i ha’ånin mafañagu-mu .
Gi sinantusan na mina’lak åntis di u dokku’ i puti’un i ha’åni,
kalang chi’up esta håo lumahi-hu.”
INEPPI…..
Esta manhula i Saina, ya ti para u tulaika i hinasson-ña:
“Kalang si Melchizedek påli’ Håo para todu i tiempu.”
INEPPI…..
SIGUNDU NA TINAITAI l Cor 11, 23-26
Un tinaitai ginin i fine’na na Kattan San Pablo para i taotåo Corinth
Hafañe’lus:
Hu risibi ginin i Saina i finanå’gui ni hu nåna’i hamyu: na i Saina as Jesus, gi puengi anai matraiduti Gui’, Ha chuli’ un pidåsun pån, Ha nå’i gråsia si Yu’us, Ha ipi’, ya ilek-ña, “Guiya esti i tataotåo-hu, ni para hamyu. Che’gui esti ya en hahassu Yu’.” Gi taiguini ha’ ta’lu na manera, dispues di i sena Ha chuli’ i kopa ya ilek-ña, “Guiya esti na kopa i nuebu na kuntråtan Yu’us, ni maseyu ni hagå’-hu. Gi kada en gimin esti, che’gui ya en hahassu Yu’.” Esti kumeke’ilekña na gi kada biåhi na en kannu’ esti na pån yan en gimin ginin esti na kopa en pruklålama i finatai i Saina asta ki måttu Gui’.
I finu’ i Saina.
IBANGHELIU Lk 9, 11b-17
ÅLELUIA John 6, 51-52
R. Åleluia. ILEK-ÑA I SAINA, GUÅHU I LALA’LA’ NA PÅN
NI GININ I LANGIT;
HÅYI KUMÅNNU’ ESTI NA PÅN SIEMPRI U LÅ’LA’
PARA TODU I TIEMPU.
R. Åleluia
+ Un tinaitai ginin i såntu Ibangheliu sigun i tinigi’ San Lucas
Si Jesus Ha kuentusi i linahyan tåotåo put i Rainun Yu’us, ya Ha na’fanhomlu’ todu i numisisita mana’fanhomlu’. Anai kumekematchum i atdao manmåttu i Dossi ya ilik-ñiha nu Guiya, “Na’fanhånåo i linahyan kosa ki siña manmalak i sengsung yan i lancherihas guini gi uriya ya u fanmanespiha sagan-ñiha para u fanmaigu’ yan para u fañotchu, sa’ gof cha’gu esti na lugåt nai manggaigi hit.” Manineppi siha, “Sa’ håfa na ti siña hamyu mismu numå’i siha na’-ñiha?” Manmanoppi, “Tåya’ guinaha-ta, ennåo ha’ i singku na pidåsun pån yan dos na guihan. Patsino po’lu ya hami bai in fanhånåo ya in fanmamåhan nengkannu’ para esti siha na tåotåo?” (Iståba guennåo kåsi ennåo i singku mit na lalåhi.) Ilek-ña si Jesus nu i mandisipulu-ña, “Na’fanetnun siha i taotåo singkuenta kada gurupu ya na’fanmatå’chung.” Ma dalalaki i tinago’-ña ya mana’fanmatå’chung siha. Dispues, Ha chuli’ i singku na pidåsun pån yan i dos na guihan, Ha na’talak hilu’ si Jesus i matå-ña gi langit, Ha sångan i bendision gi hilu’ i pån yan i guihan, Ha ipi’ esti siha, ya Ha nå’i i mandisipulu-ña para u ma påtti i linahyan tåotåo. Todu siha mañotchu asta ki mannahung. Atyu i sepblan-ñiha put todu, mana’bula dossi na kanåstra.
I Ibangheliun i Saina.
