FINE’NA NA TINAITAI Dt 8, 2-3. 14b-16a
Un tinaitai ginin i Lepblun Deuteronomy
Ha kuentusi si Moises i taotåo siha ya ilek-ña: “Hassu håfa taimanu i esta maloffan na kuarenta åñus anai i Saina, i Yi’us-miyu, Ha ga’chungi hamyu gi todu i biahin-miyu gi disiettu, para en fanchinagi gi pinadesi yan para u tungu’ kåo gaigi gi intension-miyu na para en esgi i tinago’-ña siha. Pues put ennåo na Ha na’fanmamadesi hamyu gi niñalang ya dispues Ha na’fañotchu hamyu ni pån ginin i langit, era i manna, un nengkannu’ ni hamyu yan ni i tatan-miyu ti en tingu’, put para en fanfina’nu’i na åhi’ ti ginin i pån ha’ nai låla’la’ i taotåo, låo ginin kada palåbra ni humuhuyung gi pachut i Saina.
“Hassu, i Saina, i Yi’us-miyu, ni kumonni’ hamyu huyung ginin Ihipto, atyu i sagan isklåbu; i umisgaihun hamyu gi taddung yan båba na disiettu anai meggai kulepbla yan saligåo siha, i anglu’ yan taihanum na odda’; i muna’huyung hånum para hamyu ginin i atchu’ yan nina’fañotchu hamyu manna gi disiettu, un klåsin nengkannu’ ni ti matungu’ ni mañainan-miyu.”
I finu’ i Saina.
INEPPIN I SÅTMU Ps 147, 12-13. 14-15. 19-20
R. (12) HIRUSALEN, TUNA I SAINA.
Tuna i Saina, Hirusalen;
tuna i Yi’os-mu, Sion,
Sa’ Ha na’metgut i kandålun i trangkan-miyu,
esta Ha bendisi i famagu’un-miyu gi sanhalum-miyu.
INEPPI…..
Ha na’fåttu pås gi linderun-miyu,
yan Ha na’fañotchu hamyu nu i mås måolik na trigu.
I Saina Ha na’fåttu i tinago’-ña gi tanu’;
chaddik måttu i palabrås-ña!
INEPPI ….
I Saina Ha pruklåma i fino’-ña as Jacob,
i tinago’-ña yan i areklamenton-ña as Israhet.
Ti Ha cho’gui esti para ottru nasion siha;
ti Ha sangåni i ottru nasion nu i tinago’-ña siha.
Åleluia!
INEPPI…..
SIGUNDU NA TINAITAI 1 Cor 10, 16-17
Un tinaitai ginin i fine’na na Kattan San Pablo para i taotåo Corinth
Hafañe’lus:
I tasa ni ta u’usa gi Senan i Saina yan put ennåo na ta nåna’i gråsia si Yu’us: yanggin manggimin hit ginin ennao, mañåsaonåo hit manggimin gi haga’ i Kristo. Yan i pån ni ta i’ipi’; yanggin ta kånnu’ ennåo, mañåsaonåo hit mañotchu gi tataotåo i Kristo.
Gaigi guini unu na pidasun pån, ya todus hit, maseha manmeggai hit, unu ha’ hit na tataotåo, sa’ todus hit mañåsaonåo gi etmismu pidåsun pån.
I finu’ i Saina.
IBANGHELIU Jn 6, 51-58
ÅLELUIA Jn 6, 51-52
R. Åleluia, åleluia. ILEK-ÑA I SAINA, GUÅHU I LALA’LA’ NA PÅN GININ I LANGIT; HÅYI I KUMÅNNU’ ESTI NA PÅN U TAIHINEKKUK LINA’LÅ’-ÑA. R. Åleluia, åleluia
+ Un tinaitai ginin i såntu Ibangheliu sigun gi tinigi’ San Juan
Ilek-ña si Jesus ni linahyan ManHudihos:
Guåhu mismu i lala’la’ na pån ni måttu ginin i langit.
Håyi i kumånnu’ esti na pån u taihinekkuk lina’lå’-ña;
i pån ni para bai Hu na’enñaihun Guiya ennåo i sinsen-hu,
para i lina’la’ i tanu’.”
Anai mahunguk esti ni ManHudihos manatgumentu entri siha, ilik-ñiñiha, “Taimanu para na’i-ña ni sinsen-ña para ta kånnu’?” Put ennåo na ilekña si Jesus nu siha:
“Åmen, åmen, bai Hu asigura hamyu ni minagåhit, yanggin ti en kannu’ i sensin i Lahin i Taotåo ya ti en gimin i hagå’-ña, u tåya’ lina’la’-miyu.
Atyu i chumotchu ni sinsen-hu yan gumimin i hagå’-hu u lå’la’ para siempri, ya Guåhu bai Hu na’kahulu’ gui’ gi uttimu na ha’åni. I sinsen-hu magåhit na nengkannu’ yan i hagå’-hu magåhit na gimin. I taotåo ni chumotchu ni sinsen-hu yan gumimin ni hagå’-hu sumåsaga giya Guåhu, yan Guåhu giya guiya.
Taimanu ha’ si Tåta ni guaha lina’lå’-ña Ha na’hånåo Yu’ ya Guåhu guaha lina’lå’-hu sa’ put si Tåta, taiguennåo ha’ i taotåo ni chumotchu nu Guåhu
u gai lina’la’ gui’ sa’ put Guåhu. Estigui’ i pån ni måttu påpa’ ginin i langit.
Ti parehu yan i mañainan-miyu ni mañotchu låo manmåtai ha’, i taotåo ni chumotchu guini na pån u lå’la’ para todu i tiempu.”
I Ibangheliun i Saina.
