DAMENGGU DISPUES DI PENTEKOSTES SANTISIMA TRINIDAD

198 0

A

FINENI’NA NA TINAITAI                                                                               Ex 34, 4-6. 8-9

Un tinaitai ginin i Lepblun Exodus 

Tåftaf gi egga’an humånåo si Moises hulu’ gi Sabånan Sinai sa’ tinagu’ gui’ ni Saina, ya ha chuchuli’ i dos na tapblon åtchu’. 

            Anai tumunuk påpa’ si Yu’us gi halum mapagåhis tumohgi guihi gi fi’un Moises ya Ha anunsia i na’ån-ña, “Saina.”  Pues maloffan si Yu’us gi me’nå-ña ya umessalåo, “I Saina, i Saina, un yo’asi’ yan na’maguf na Yu’us, ñating lalålu’ yan bula guinaiya yan fiet Gui’.”  Insigidas tumekkun påpa’ gi tanu’ si Moises ya manadora.  Pues ilek-ña, “Yanggin maguf Håo nu guåhu, O Asaina, maila’ ya ta fanhita.  Magåhit na manåguaguat esti siha na tåotåo; låo dispensa i baba na bidan-måmi yan i isao-måmi, ya risibi ham kumu iyom-mu.” 

                        I finu’ i Saina. 

INEPPIN I SÅTMU                                                                  Dn 3, 52. 53. 54. 55 

R.  (52)  GLORIA YAN TININA PARA TODU I MANAIHINEKKUK NA TIEMPU! 

U matuna Håo, O Asaina, i Yi’us i Tatan-måmi,

            tunåyun yan takkilo’ña ki håyi para todu i tiempu; 

Yan u matuna i santus yan gloriosu na na’ån-mu,

            tunåyun yan takkilo’ña ki håyi para todu i siklu siha. 

INEPPI…..

U matuna Håo gi halum i templu anai gaigi i santus na gloriå-mu,

            tunåyun yan gloriosu gi hilu’ todu para todu i tiempu. 

INEPPI…..

U matuna Håo gi tronun i rainom-mu,

            tunåyun yan takkilo’ña ki håyi para todu i tiempu. 

INEPPI…..

U matuna Håo ni uma’atan hålum i mås manåddung

            ginin i tronu-mu gi hilu’ i cherubim,

            tunåyun yan takkilo’ña ki håyi para todu i tiempu.

INEPPI…..

SIGUNDU NA TINAITAI                                                                    2 Cor 13, 11-13 

Un tinaitai ginin i sigundu na Kattan San Pablo para i taotåo Corinth

Håfañe’lus, fanmaguf.

     Che’gui kuåntu i siña para en fansen måolik; dalalaki atyu i hu fafaisin hamyu; fanakomfotma unu yan ottru; fanlå’la’ gi pås. Ya siempri i Yi’os guinaiya yan pås u såga giya hamyu.  Fanasáluda unu yan ottru ni chikun che’lu.  Todu i taotåo Yu’us siha mana’håhanåo i saludun-ñiha para hamyu.

     I grasian i Saina as Jesukristo, yan i guinaiyan Yu’us, yan i dinañña’ gi Espiritu Såntu u gaigi giya hamyu.

 I finu’ i Saina. 

IBANGHELIU                                                                                     Jn 3, 16-18 

ÅLELUIA       Rv 1,8

R.  Åleluia.  U MATUNA I TATA, I LAHI-ÑA YAN I ESPIRITU SÅNTU: 

                           SI YU’US NI GAGAIGI PÅ’GU, NI HAGAS HA’ GAIGI,

                                    YAN GUIYA NI PARA U FÅTTU. 

                                                                                                            R.  Åleluia. 

+  Un tinaitai ginin i såntu Ibangheliu sigun gi tinigi’ San Juan

Ilek-ña si Jesus as Nicodemus: 

     Sa’ put Ha sen guaiya si Yu’us i tanu’ na Ha intrega i uniku na Lahi-ña, kosa ki atyu i manhonggi giya Guiya ti u måtai, inlugåt para u lå’la’ taihinekkuk.  Ti Ha na’hånåo si Yu’us i Lahi-ña para i tanu’ para u kundena i tanu’, sino ki para u masåtba ginin Guiya. Maseha håyi ni manhonggi gi Lahi-ña ti u makundena, låo maseha håyi ni ti manhonggi pues esta gui’ munhåyan makundena, sa’ put i ti manhonggi gui’ gi uniku na Lahin Yu’us.

                        I Ibangheliun i Saina.

Related Post

XXV DAMENGGU GI UTDINÅRIU NA TIEMPU

Posted by - September 22, 2023 0
A FINENI’NA NA TINAITAI                                                                                Is 55, 6-9  Un tinaitai ginin i Lepblun i Prufeta as Isaias  Ispiha i Saina…

XVI DAMENGGU GI UTDINÅRIU NA TIEMPU

Posted by - July 17, 2021 0
FINENE’NA NA TINAITAI                                                                          Jer 23, 1-6  Un tinaitai ginin i Lepblun i Prufeta as Jeremiah       Ilek-ña i Saina,…

III DAMENGGUN KUARESMA

Posted by - March 10, 2023 0
A FINENE’NA NA TINAITAI                                                                          Ex 17, 3-7 Un tinaitai ginin i Lepblun Exodus Gi mina’hun-ñiha, manggonggung i taotåo siha kontra…

XII DAMENGGU GI UTDINÅRIU NA TIEMPU

Posted by - June 18, 2021 0
FINENE’NA NA TINAITAI                                                                          Jb 38, 1. 8-11 Un tinaitai ginin i Lepblun Job                                                                            I Saina Ha kuentusi…