FINE’NA NA TINAITAI Prv 8, 22-31
Un tinaitai ginin i Lepblun Sinangan siha
Taiguini ilek-ña i Tinemtum Yu’us:
“I Saina fumañågu Yu’, i primirisa gi minalago’-ña,
i fumo’nanaigui i famagu’on-ña desdi i antigu na tiempu;
Desdi i antigu machuda’ñaihun Yu’ huyung,
fine’na, åntis di i tanu’.
Anai tåya’ iståba tåddung esta Yu’ mana’huyung,
anai trabiha tåya’ bo’bu’ hånum;
Åntis di u fanmapo’lu i sabåna siha gi sagan-ñiha,
åntis di i eksu’ siha, esta Yu’ mana’huyung;
Anai trabiha ti mafa’titinas i tanu’ yan i gualu’,
åntis di i primet fachi’ i tanu’.
“Anai i Saina, Ha iståpblesi i langit siha iståba’ Yu’ guihi,
anai Ha måtka i linderun i mattingan;
anai Ha na’fitmi i langit gi sanhilu’,
anai Ha tåtmi fitmi i haligin i tanu’;
Anai Ha råya para chi-ña i tasi,
ya mungnga na ti u fanosgi ni tinago’-ña;
Iståba Yu’ gi fi’on-ña kumu fafacho’chu’,
ya Guåhu i minagof-ña kada diha,
Humugågandu Yu’ gi me’nå-ña durånti esti siha,
humugågandu Yu’ gi sanhilu’ i tano’-ña;
ya Hu sodda’ minagof-fu gi famagu’un i taotåo.”
I finu’ i Saina.
INEPPIN I SÅTMU Ps 8, 4-5. 6-7. 8-9
R. O ASAINA, YU’US-MÅMI, GOF BUNITU I NA’ÅN-MU GI TODU I TANU’!
Anai hu atan i langet-mu, i fina’tinas i kannai-mu,
i pilan yan i puti’un ni Un plånta gi sagan-ñiha–
Håfa na Un atetendi i taotåo siha,
ni para u fanmåtai ha’, ya Un asisisti siha?
INEPPI…..
Låo Un fa’tinas siha dididi’ ha’ menus ki yu’us,
Un kurona siha mina’lak yan onru.
Un nå’i siha pudet para u magubetna i nina’huyong-mu,
Un po’lu todu i kosas gi adding-ñiha:
INEPPI…..
Todu i kinilu yan nubiyu,
kuntodu i ga’ga’ gi halum tånu’,
I paluma siha gi airi, i guihan gi tasi,
yan todu i mannanangu gi halum tåsi.
INEPPI…..
SIGUNDU NA TINAITAI Rom 5, 1-5
Un tinaitai ginin i Kattan San Pablo para i taotåo Roma
På’gu ni esta mana’fanunas hit gi me’nan Yu’us ginin i hinenggi, manggaigi hit gi pås yan Yu’us ginin i Saina-ta as Jesukristo. Guiya si Jesukristo kumonni’ hit ginin i hinenggi para i ekspirensiån-ña ni gråsian Yu’us, anai manlåla’la’ hit på’gu. Put esti na mambanidosu hit ni atyu i ta nanangga na para ta fañåonåo gi glorian Yu’us! Mambanidosu hit lokkui’ put i prublemå-ta, sa’ ta tungu’ na ha na’fanmemesngun hit i prublema siha ya i minesngun muna’fåfattu i apruebasion Yu’us, ya i apruebasion-ña muna’fåfattu i ninangga. Esti na ninangga ti u na’fandisganåo hit, sa’ esta Ha chuda’ huyung si Yu’us i ginifli’e’-ña para hålum gi kurason-ta ginin i Espiritu Såntu, ni manmanå’i hit kumu rigålun Yu’us para hita.
I finu’ i Saina.
IBANGHELIU Jn 16, 12-15
ÅLELUIA See Fv l, 8
R. Åleluia. U MATUNA I TATA, I LAHI-ÑA YAN I ESPIRITU SÅNTU:
PARA SI YU’US NI GAGAIGI, NI ISTÅTABA, YAN
PARA U FÅTTU. R. Åleluia.
+ Un tinaitai ginin i såntu Ibangheliu sigun i tinigi’ San Juan
Ilek-ña si Jesus ni mandisipulu-ña:
Guaha mås meggai para bai Hu sangåni hamyu, låo ti siña en singun på’gu.
Låo yanggin måttu Gui’,
sa’ put i Guiya i Espiritun minagåhit
Guiya en fangginiha para todu i minagåhit.
Ti ginin Guiya ha’ na maisa na para U kuentus,
låo para U sångan atyu ha’ siha i hiningok-ña,
ya Guiya siempri Ha anunsia giya hamyu håfa siha para u fanmasusedi.
Yanggin Ha cho’gui esti pues siempri Ha tuna Yu’,
sa’ Guiya siempri Ha risibi ginin Guahu
håfa para U anunsia giya hamyu.
Todu i guinahan i Tata iyok-ku.
Ennåo mina’ Hu sångan na atyu siha i para U anunsia giya hamyu
para U chuli’ ginin Guahu.
I Ibangheliun i Saina.
