FINENE’NA NA TINAITAI Is 62, 1-5
Un tinaitai ginin i Lepblun i Prufeta as Isaiah
Put iya Sion ti bai hu silensiu,
put iya Hirusalen ti bai hu famatkilu,
Asta ki muma’lak kalang chatanmak i mina’lak-ña
yan i satbasion-ña kalang i mañiñila’ na hatchon.
I nasion siha u mali’i’ i mina’lak-ña
yan todu i manrai siha i gloriå-mu;
Siempri un ma’ågang ni nuebu na nå’an
ni ha prununsia i pachut i Saina.
Siempri un fama’un gloriosu na kurona gi kannai i Saina,
un kuronan rai ni ginege’ti ni Yi’os-mu.
Ti un ma’ågang ta’lu ni taotåo siha na “Hågu i Mayuti’,”
pat u ma’åluk na “Kansådu” i tanu’-miyu,
Låo inlugåt siempri un ma’ågang “I Muna’mamaguf yu’,”
ya i tano’-mu “Asaguå-hu.”
Sa’ maguf i Saina giya hågu,
ya ha fa’asaguå-ña i tano’-mu.
Taimanu ha’ na i sutteru ha asasagua i bithen,
i Fuma’tinas håo un inasagua;
Taimanu ha’ i nobiu ni mamaguf ni nobia,
taiguennao ha’ lokkui’ na umaguf si Yu’us giya hågu.
I finu’ i Saina.
INEPPIN I SÅTMU Ps 89, 4-5, 16-17, 27, 29
R. (2) BAI HU KÅNTA I MINAOLIK I SAINA TODU I TIEMPU.
Mama’tinas yu’ kuntråta yan i maninatyek-ku na tåotåo;
Esta manhula yu’ gi as David i tentago’-hu:
Bai hu na’tatchu tinattem-mu para todu i tiempu
yan bai hu istapblesi i tronu-mu para todu i hinerasion siha.”
INEPPI…..
Manmaguf i taotåo ni umadodora Håo, Asaina,
ni manlåla’la’ ma’lak gi me’nå-mu.
Manmaguf makantåyi i na’ån-mu todu i diha;
manessalåo kantan guput anai manggånna Håo.
INEPPI…..
Siempri ha ågang Yu’, ‘Hågu Tatå-hu,
i Yi’os-su, i Atcho’-hu, ni muna’fanggånna yu’!
Bai Hu guiaya gui’ todu i tiempu;
ya i kuntratå-hu yan guiya u tatchu fitmi.
INEPPI…..
SIGUNDU NA TINAITAI Acts 13, 16-17, 22-25
Un tinaitai ginin i Bidan i ManApostolis
Anai måttu guatu si Pablo Antioch giya Pisidia humålum gi templu, ya intonsis, kahulu’, ha señas siha para u fanmamatkilu, ya ha tutuhun, “Manachataotåo-hu ManIsrailitas, yan hamyu ni en e’enra i Yi’us-måmi, ékkunguk håfa para bai hu sångan! Gi un tiempu i Yi’us i taotåo Israhet Ha atyik i tatan-måmi. Ha na’fanmetgut esti siha na tåotåo durånti anai mañåsaga gi tanu’ Ihipto, ya mangkinenni’ siha huyung ginin ennao ni istirånti na kannai-ña. Dispues Ha na’suha si Saul ya Ha kåhat hulu’ si David kumu rai; ya put guiya na manhula si Yu’us; ‘Hu sodda’ na si David, i lahin Jesse, guiya i malago’-hu na klåsi ni para u chine’gui todu i malago’-hu na para u cho’gui.’ “Sigun gi prumeså-ña esta si Yu’us Ha na’fåttu si Jesus i satbadot Israhet ginin i disindensian esti na låhi. Åntis di u tutuhun si Jesus i che’cho’-ña, ha setmuni si Juan todu i taotåo Israhet na debi di u mabira siha ginin i isao-ñiha ya u fanmatakpångi. Anai esta hihihut i uttimun i che’cho’-ña si Juan, ha såsangan, ‘Håyi hinassun-mimiyu yu’? Ti guåhu atyu i en nanangga. Låo ispiha atyu i para u fåttu dispues di guåhu. Ti diknu yu’ para bai hu pula’ i sandålias gi addeng-ña.’ “
I finu’ i Saina
IBANGHELIU Mt 1, 1-25
ÅLELUIA
R. Åleluia. AGUPA’ U FANMADISTROSA I MANAILAYI GI TANU’:
I SATBADOT I TANU’ U GUBETNA HIT TODUS.
Åleluia.
+ Un tinaitai ginin i såntu Ibangheliu sigun i tinigi’ San Mateo
I lepblun i listan i guellun Jesukristo, disendensian David, lahin Abrahan.
Desdi as Abrahan asta i Rai as David, manmalista esti siha na disendensia: si Abrahan, si Isaac, si Jacob, si Judah yan i mañe’lu-ña lalåhi: dispues si Perez yan Zerah (i nanan-ñiha si Tamar), si Hezron, si Ram, si Amminadab, si Nahshon, si Salmon, si Boaz (i nanå-ña si Rahab), si Obed (i nanå-ña si Ruth), si Jesse, yan i Rai as David.
Desdi as David asta atyu na tiempu anai manmadistilådu i taotåo Israhet giya Babilonia, manmalista esti siha na disendensia: si David, si Solomon, (si nanå-ña atyu na palåo’an i ginin asaguan Uriah), si Rehoboam, si Abijah, si Asa, si Jehoshaphat, si Jehoram, si Uzziah, si Jotham, si Ahaz, si Hezekiah, si Manasseh, si Amon, si Josiah, yan si Jehoiachin yan i mañe’lu-ña lalåhi.
Dispues di i manmadistiladun-ñiha giya Babilonia asta i mafañågun Jesus, manmalista esti siha na mañaina: si Jehoiachin, si Shealtiel, si Zerubbabel, si Abiud, si Eliakim, si Azor, si Zadok, si Achim, si Eliud, si Eleazar, si Matthan, si Jacob yan si Jose i asaguan Maria. Ginin as Maria na mafañågu si Jesus ni ma’å’agang Misihas.
Intonsis put todu i hinerasion siha: desdi as Abrahan asta as David, katotsi na hinerasion; desdi as David asta i manmadistiladon-ñiha giya Babilonia, katotsi na hinerasion; desdi i manmadistiladon-ñiha Babilonia asta i Misihas, katotsi na hinerasion.
Taiguini mafañagu-ña si Jesukristo. Si nanå-ña as Maria kumuntråta esta na para u ássagua yan si Jose, låo åntis di u ássagua i dos ha tungu’ si Maria na para u gai patgun ginin i Espiritu Såntu. Si Jose, ni kuntratå-ña para asaguå-ña, todu i tiempu i maolik ha chocho’gui; låo ti malagu’ na u na’mamåhlåo si Maria gi me’nan tåotåo, pues ha disidi na u påra i dos sikretamenti. Mientras ha hahassu esti, finattoigui ni anghit i Saina gi guinifi-ña ya ilek-ña: “Jose lahin David, cha’-mu ma’å’a’ñao kumonni’ si Maria para asaguå-mu. Ginin i Espiritu Såntu na mumapotgi’ gui’. U gai lahi ya u mafa’na’an Jesus sa’ Guiya para u na’fansåfu’ i taotåo-ña siha ginin i isao-ñiha.” Manmasusedi esti siha intonsis, put i para u makumpli i finu’ i Saina ni sinangan i prufeta: “Un bithen u mapotgi’ ya u gai lahi, ya u ma’ågang Emmanuel” (ni kumeke’ilekña, “Manhihita yan si Yu’us”). Pues anai makmåta si Jose ha cho’gui håfa tinago’-ña i anghit ya ha asagua si Maria. Ti dumañña’ i dos maigu’ åntis di u mafañågu i patgun. Si Jose ha fa’na’an i patgun Jesus.
I Ibangheliun i Saina
