DAMENGGU DISPUES DI PENTEKOSTES SANTISIMA TRINIDÅD

1107 0

FINE’NA NA TINAITAI                                                                   Dt 4, 32-34. 39-40

Un tinaitai ginin i Lepblun ‘Deuteronomy’  

Ilek-ña si Moises nu i taotåo siha:  “Fanmamaisin på’gu taiguihi i antigu na tiempu, åntis di i tiempun-miyu, desdi atyu na tiempu anai ha na’huyung si Yu’us i taotåo gi hilu’ i tanu’; fanmamaisin desdi un puntan långit asta i ottru:  Kåo guaha nai masusedi mås dångkulu na sinisedi åntis na tiempu?  Kåo guaha nai mahunguk?  Kåo guaha nai mahunguk ni taotåo si Yu’us kumuentus ginin i halum guåfi, taimanu i hininguk-miyu, ya manlå’la’ ha’?  Kåo guaha nai guaha Yu’us humånåo para u konni’ un nasion ginin i entalu’ ottru nasion, mientras Ha chachagi siha, gi siñåt yan i manna’manman na fina’tinas siha, gi gera, yan gi metgut na kannai-ña ni Ha istira huyung, yan ginin i dangkulu na mina’åñåo, todu esti siha bidå-ña i Saina, i Yi’us-miyu para hamyu gi me’nan i matan-miyu mismu giya Ihipto?  Put esti na rason na debi hamyu di en tingu’ på’gu, ya en na’chettun gi kurason-miyu, na si Yu’us Saina Gui’ guihi hulu’ gi langit yan guini påpa’ gi tanu’, ya tåya’ ottru.  Debidi en kimpli i areklon-ña yan i tinago’-ña ni hu tåtagu’ hamyu på’gu, kosaki hamyu yan i famagu’un-miyu dispues di hamyu en fanggefsaga, yan en fananakku’ lina’la’-miyu gi tanu’ ni i Saina, i Yi’us-miyu, manninana’i hamyu para todu i tiempu.”

I finu’ i Saina.

 

INEPPIN I SÅTMU                                                   Ps 33, 4-5. 6. 9. 18-19. 20. 22

  1. (12) MANMAGUF I TAOTÅO NI MANINATYIK AS YU’US PARA IYOÑ-ÑA

 

Tunas i finu’ i Saina;

ya todu i che’cho’-ña siha angokkuyun.

I Saina Ha guaiya i hustisia yan tininas

yan Ha na’bula i tanu’ ni minaolek-ña.

INEPPI…..

 

Gi finu’ i Saina långit siha mafa’tinas;

gi guinaifin i pachot-ña manmafa’tinas i manånghit gi langit.

Sa’ kumuentus, ya manhuyung,

manotdin ya manannuk gi sagan-ñiha.

INEPPI…..

Atan ha’ sa’ gaigi i matan i Saina gi rumibirerensia Gui’,

hilu’ atyu siha i manmanangokku nu i yine’ase’-ña,

Para u nina’fanlibri siha ginin i finatai,

ya u famprinitehi siha achukka’ tiempun ha’ilas.

INEPPI…..

I anti-ta ha nanangga i Saina,

Guiya ni ayudantet-ta yan pruteksion-ta.

Puedi u gaigi giya hami i yine’ase’-mu, Asaina;

hami ni pumopo’lu i inangokkun-måmi giya Hågu.

INEPPI…..

 

SIGUNDU NA TINAITAI                                                                             Rom 8, 14-17

Un tinaitai ginin i Kattan San Pablo para i taotåo Roma 

Hafañe’lus:  Todu i mangginigiha ni Espiritun Yu’us famagu’un Yu’us siha. Ti para en fanmama’isklåbu na mannina’i hamyu as Yu’us ni Espiritu ya para en fanma’å’ñåo;  inlugåt di esti, i Espiritu muna’famfamagu’un Yu’us hamyu, ya ginin i nina’siñan i Espiritu na ta å’agang si Yu’us, “Tåta, Tatå-hu!” I Espiritun Yu’us Ha na’dañña’ yan Guiya i espiritu-ta para u diklåra na mamfamagu’un Yu’us hit. Ya put i famagu’on-ña hit, siempri manmanå’i hit ni bendision siha ni Ha na’sasahngi para i taotåo-ña, ya siempri lokkui’ manmanå’i hit yan i Kristo ni atyu i Ha na’sahngi si Yu’us para si Jesus; sa’ yanggin mañåonåo hit gi pinadesin i Kristo, siempri lokkui’ mañåonåo hit gi gloriå-ña.

I finu’ i Saina.

 

IBANGHELIU                                                                                               Mt 28, 16-20

ÅLELUIA

  1. Åleluia. U MATUNA I TATA, YAN I LAHI-ÑA YAN I ESPIRITU SÅNTU;

TAIGUIHI I TUTUHON-ÑA, PÅ’GU, YAN SIEMPRI

MANAIHINEKKUK NA HA’ÅNI.

  1. Åleluia.

 

+  Un tinaitai ginin i såntu Ibangheliu sigun i tinigi’ San Mateo

Manhånåo i onsi na mandisipulu para i eksu’ giya Galileha guatu guihi na lugåt anai mantinagu’ siha as Jesus. Anai ma li’i’ si Jesus ma’adora Gui’, achukka’ ha’ guaha giya siha manduda. Lumahihut si Jesus ya ilek-ña nu siha. “Esta manå’i Yu’ ni todu i aoturidåt gi tanu’ yan gi langit. Pues fanhånåo para todu i taotåo gi todu i lugåt ya en fa’disipulu-hu siha:  takpångi siha gi na’an i Tata, i Lahi-ña, yan i Espiritu Såntu, yan fa’nå’gui siha na u ma osgi todu i Hu tågu’ hamyu. Ya siempri todu i tiempu gagaigi Yu’ giya hamyu, asta i uttimun i tanu’.”

I Ibangheliun i Saina.

Related Post

II DAMENGGUN KUARESMA

Posted by - March 9, 2017 0
FINE’NA NA TINAITAI gn 12, 1-4a Un tinaitai ginin i Lepblun Genesis Ilek-ña i Saina as Abram: “Huyung ya un…

II DAMENGGU GI UTDINÅRIU NA TIEMPU

Posted by - January 13, 2022 0
FINENE’NA NA TINAITAI                                                                                Is 62, 1-5  Un tinaitai ginin i Lepblun i Prufeta as Isaias   Put iya Sion…

III DAMENGGUN PÅSGUAN RESUREKSION

Posted by - May 4, 2019 0
FINE’NA NA TINAITAI                                          Acts 5, 27-32. 40-41  Un tinaitai ginin i Bidan i Manapostulis       Anai manmakonni’ hålum ya mana’fanohgi…

XVI DAMENGGU GI UTDINÅRIU NA TIEMPU

Posted by - July 16, 2022 0
FINENE’NA NA TINAITAI                                                                             Gn 18, 1-10a  Un tinaitai ginin i Lepblun Genesis      Finatoigui si Abrahan nu i Saina…