XXXIII DAMENGGU GI UTDINÅRIU NA TIEMPU

508 0

FINE’NA NA TINAITAI                                                       Dn 12, 1-3

Un tinaitai ginin i Lepblun i Prufeta as Daniel 

Guåhu si Daniel, hu hunguk esti na finu’ i Saina, gi atyu na tiempu:

“Atyu na tiempu para u kahulu’

si Miguel, i ma’gas na prinsipi,

i guåtdian i taotåo-mu siha;

Un tiempu esti i tåya’ parehuña para trinisti,

desdi ki matutuhun i nasion siha asta atyu na tiempu.

Atyu na tiempu u faniskåpa i taotåo-mu,

todu atyu siha i manmatugi’ na’an-ñiha gi lepblu.

 

Meggai gi entalu’ atyu siha i manmamaigu’

gi halum potbus gi tanu’ u fanmakmåta;

Guaha siha para u fanlå’la’ para todu i tiempu,

ottru siha u fanggaigi gi taihinekkuk na linihan yan disgråsia.

 

Låo i manomtum u fansen ma’lak

kalang i mina’lak i mapagåhis,

Ya atyu siha i kumundusi i linahyan para i hustisia

u fanmama’istreyas para todu i tiempu.”

 

I finu’ i Saina.

 

INEPPIN I SÅTMU                                                     Ps 16, 5. 8. 9-10. 11

  1. HÅGU I IRENSIÅK-KU, O ASAINA

Asaina, Hågu i pattek-ku yan i taså-hu,

Hågu gumogo’ti fitmi i pattek-ku.

Todu i tiempu gagaigi i Saina gi me’nå-hu;

yanggin gaigi Gui’ gi fi’on-hu ti bai hu ma’atburota.

INEPPI…..

 

Put esti na trangkilu i kurason-hu ya maguf i anti-hu;

kuntodu i tataotåo-hu gai kumfiånsa;

Sa’ ti para Un abandona i anti-hu para i sampapa’ na tånu’,

yan ti para Un sedi i mamfiet na para u fanlamas.

INEPPI…..

 

Hågu para Un fa’nu’i yu’ ni chalan i lina’la’,

kabålis na minaguf gi me’nå-mu,

ya para todu i tiempu i minaguf gi agapa’-mu.

INEPPI…..

 

 

SIGUNDU NA TINAITAI                                                    Heb 10, 11-14. 18

Un tinaitai ginin i Katta para i ManHibrehu  

Hafañe’lus:

Kada påli’ Hudihos ha chocho’gui i sitbision-ña kada diha ya ha ufreresi kada biåhi mamparehu ha’ na sakrifisiu; låo esti siha na sakrifisiu ti siña manmamunas isao.   Låo i Kristo unu ha’ na sakrifisiu Ha cho’gui put i isao siha, un inifresi ni ifektibu para todu i tiempu, ya dispues matå’chung gi agapa’ na bånda gi as Yu’us.  Guennåo nai Ha nanangga i Kristo si Yu’us para u po’lu i inimigu-ña siha kumu oddas i addeng-ña.  Intonsis, ginin i unu ha’ na sakrifisiu esta Ha gånna para todu i tiempu atyu siha i mana’fanggåsgas ginin i isao.

Intonsis, dispues di manma’asi’i esti siha, ti prisisu esta na u guaha inifresi para åpas isao.

 

I finu’ i Saina.

IBANGHELIU                                                                     Mk 13, 24-32

ÅLELUIA     Lk 21, 36

  1. Åleluia. FANMAKMÅTA, YA SIGI HA’ MANMANÅYUYUT,

KOSAKI SIÑA HAMYU MANDIKNU MANOHGI GI

ME’NAN I LAHIN I TAOTÅO.

  1. Åleluia.

+  Un tinaitai ginin i såntu Ibangheliu sigun i tinigi’ San Marcos

Ilek-ña si Jesus nu i mandisipulu-ña:

“Duråntin atyu na tiempu dispues di todu klåsin pinadesi u homhum i atdao, ti u fanina i pilan, ya u famoddung i puti’un siha ginin i langit, ya i nina’siñan i langit u mayengyung.  Pues siempri u mali’i’ ni taotåo siha i Lahin i Taotåo mamamaila’ gi mapagåhis yan dångkulun fuetsa yan gloria. Siempri Ha na’fanhånåo i tentago’-ña manånghit para u mana’fanetnun i inayek-ña siha ginin i kuåttru na direksion, ginin i mås chågu’ na bånda gi tanu’ yan gi langit.

“Fanmañuli’ liksion ginin i trongkun figus. Yanggin esta misin i trongku chigo’-ña ya ha tutuhun mambinga, pues en tingu’ na esta hihihut i tiempun maipi.  Taiguennåo ha’ lokkui’, yanggin en li’i’ esti siha na manmåsusesedi, en tingu’ na hihihut Gui’, listu Gui esta.  Åmen, bai Hu asigura hamyu, na ti u faloffan esti na hinerasion astaki manmåsusedi esti siha. I langit yan i tanu’ u fanhokkuk, låo i palabrås-su ni nungka.

“Tåya’ ni unu tumungu’ put i eksåktu na ha’åni pat ora, ni i manånghit gi langit pat i Lahi-ña, låo solu i Tata ha’.

I Ibangheliun i Saina.

Related Post

SULEMNIN SÅNTA MARIA, I NANAN YU’US

Posted by - December 31, 2019 0
FINE’NA NA TINAITAI                                                                  Nm 6, 22-27  Un tinaitai ginin i Lepblun Numiru  Ilek-ña i Saina as Moises:  “Kuentusi si Aaron…

XXXI DAMENGGU GI UTDINÅRIU NA TIEMPU

Posted by - November 4, 2017 0
FINE’NA NA TINAITAI                                                                  Mal 1, 14b-2. 2b. 8-10   Un tinaitai ginin i Lepblun i Prufeta as ‘Malachi’  …

III DAMENGGU GI UTDINÅRIU NA TIEMPU

Posted by - January 21, 2022 0
FINENE’NA NA TINAITAI                                                              Neh 8, 2-4a. 5-6. 8-10  Un tinaitai ginin i Lepblun Nehemiah  I pali’ as Ezra ha…

II DAMENGGU GI UTDINÅRIU NA TIEMPU

Posted by - January 17, 2021 0
FINENE’NA NA TINAITAI                                                                  I Sam 3, 3b-10, 19  Un tinaitai ginin i primet na Lepblun Samuel       Mamaigu’ si Samuel…