XXXII DAMENGGU GI UTDINÅRIU NA TIEMPU

641 0

FINE’NA NA TINAITAI                                                       1 Kgs 17, 10-16

Un tinaitai ginin i fine’na na Lepblun i Manrai 

I prufeta as Elijah humånåo para Zarephath.  Anai måttu gui’ gi intrådan i siudå, iståba guennao un bi’uda ni ngumangayu; ya ha ågang gui’, “Put fabot chuli’i’ yu’ mågi un pusuelun hånum para bai hu gimin.”  Humånåo i palåo’an para u chuli’, ya inessalågui gui’, “Put fabot fañuli’ mågi dididi’ pån.”  Manoppi i palåo’an, “Kumu låla’la’ i Saina, i Yi’os-mu, trabiha ti mama’titinas yu’ pån; ennåo ha’ i un puñu na arina tetehnan gi tåru yan dididi’ låña gi buteya.  Ti åpmam ha’ na ngumangayu yu’ ya para bai hu hålum ya bai hu fama’tinas para guåhu yan i lahi-hu; ya yanggin munhåyan ham chumotchu para bai in matai.”  Ilek-ña si Elijah,

“Cha’-mu ma’å’añåo.”  “Hånåo ya un cho’gui håfa gaigi gi intension-mu.  Låo fama’tinas finene’na dikiki’ na brohas ya un chuli’i’ yu’ mågi.  Dispues nai un fama’tinas para hågu yan i lahi-mu.  Sa’ i Saina, i Yi’us Israhet, ilek-ña, “Ti u hokkuk i tårun arina, yan ti u ånglu’ i buteyan låña, asta atyu na ha’åni anai para u na’uchan i Saina.”  Pues må’pus gui’ ya ha cho’gui taimanu ha’ ilek-ña si Elijah.  Sumiña gui’ chumotchu yan i lahi-ña yan si Elijah un åñu; ti humokkuk i tårun arina, yan ti umånglu’ i buteyan låña, taimanu ha’ i ilek-ña i Saina ginin as Elijah.

 

I finu’ i Saina.

 

INEPPIN I SÅTMU                                                     Ps 146, 7. 8-9. 9-10

  1. ANTI-HU, TUNA I SAINA!

Osino

 

ÅLELUIA.

 

I Saina as Yu’us fi’et para todu i tiempu,

Ha nåna’i hustisia i manmapetsisigi,

yan nengkannu’ para i manñålang.

I Saina Ha sosotta i manmapreresu.

INEPPI……

I Saina muna’fanmanlili’i’ i mambåtchit;

i Saina Ha håhatsa hulu’ atyu siha i manetekkun påpa’.

I Saina Ha guaiya i manunas;

I Saina Ha prutetehi i manistrangheru.

INEPPI…..

 

Ha sustetieni i manai saina yan i mambi’uda,

låo Ha kokontra i kinalamtin i manailayi.

I Saina u fanggubetna para todu i tiempu,

i Yi’os-mu, O Sion, para todu i hinerasion.  Åleluia!

INEPPI…..

 

SIGUNDU NA TINAITAI                                                    Heb 9, 24-28

Un tinaitai ginin i Katta para i ManHibrehu 

Ti humålum i Kristo gi fina’tinas tåotåo na Sagrådu na Lugåt, ni atyu i makopia ginin i magåhit.  Humålum Gui’ gi langit mismu, anai gaigi Gui’ a’annuk put hita gi me’nan Yu’us.  I Mås Må’gas Påli’ i ManHudihos humåhalum kada såkkan gi Mås Sagrådu na Lugåt ha chuchuli’ i haga’ gå’ga’.  Låo i Kristo ti humåhalum para u ufresin maisa Gui’ meggai na biåhi, sa’ siempri kumeke’ilek-ña na debidi u famadesi meggai na biåhi desdi i tutuhun i tanu’.  Inlugåt, på’gu anai esta kumeke hokkuk i tiempu, umannuk Gui’ un biåhi ha’, para u funas i isao ginin i sakrifision-ña mismu.  Interu i taotåo debidi u fanmåtai un biåhi, ya dispues di ennåo debidi u fanmahusga as Yu’us.  Gi taiguini na manera i Kristo lokkui’ ma’ufresi Gui’ un biåhi kumu sakrifisiu para u funas i isao i linahyan.  Siempri umannuk Gui’ sigundu biåhi, åhi’ ti para u famunas isao, låo para u såtba atyu siha i numanangga Gui’.

I finu’ i Saina.

 

IBANGHELIU                                                                     Mk 12, 38-44

ÅLELUIA    Mt 5, 3

  1. Åleluia. MANMAGUF I MAMOPBLIN HINALUM:

SA’ U IYUN-ÑIHA I RAINUN I LANGIT.

  1. Åleluia.

 

+  Un tinaitai ginin i såntu Ibangheliu sigun i tinigi’ San Marcos

Anai mamfina’nåna’gui siha ilek-ña, “Gof adahi hamyu ni atyu siha i iskribas, yan-ñiha manlåoya yan i anåkku’ na magagun-ñiha ya manmasaluluda kun rispetu gi pupbliku; ma’a’ayik i ispesiåt na tå’chung gi halum i sinagoga yan i mås måolik na tå’chung gi giput. Mafa’bababa i mambi’uda siha yan masakkekenguan ni gima’-ñiha, ya dispues mana’a’annuk na anåkku’ tinayuyut-ñiñiha!  I kastigun-ñiha siempri taiguennåo ha’ inatdet-ña!”

Anai matå’chung si Jesus påpa’ gi un bånda ya iståba i kahun limosna gi ottru bånda, Ha ripåra i linahyan ni manmamomo’lu limosna hålum gi kahun.  Meggai na manriku manmamo’lu hålum dångkulu na kantidå; låo un popbli na bi’uda måttu ya mamo’lu hålum dos dikiki’ na salåppi’ ni balin un sentimu.   Ha ågang guatu i mandisipulu-ña ya ilek-ña nu siha,  “Åmen, malagu’ Yu’ na en ripåra na meggaiña limosnån-ña esti i pepbli na bi’uda ki todu atyu siha i esta manmanlimosna.   Siha manmannå’i ginin i meggai na sepblan-ñiha, låo esti na bi’uda mannå’i ginin i pinepblen-ña, todu i mantension-ña para lumå’la’.”

 

I Ibangheliun i Saina.

Related Post

III DAMENGGU GI UTDINÅRIU NA TIEMPU

Posted by - January 26, 2020 0
FINE’NA NA TINAITAI                                                                               Is 8, 23-9, 3  Un tinaitai ginin i Lepblun i Prufeta as Isaias  Fine’na i Saina Ha…

XXXIII DAMENGGU GI UTDINÅRIU NA TIEMPU

Posted by - November 10, 2022 0
FINENE’NA NA TINAITAI                                                                          Mal 3, 19-20a  Un tinaitai ginin i Lepblun i Prufeta as ‘Malachi’        Atan ha’, sa’…

SAGRÅDA FAMILIA

Posted by - December 29, 2023 0
A B C FINENI’NA NA TINAITAI                                                               Sir 3, 2-6. 12-14  Un tinaitai ginin i Lepblun Sirach  Si Yu’us Ha…

DAMENGGU DISPUES DI PENTEKOSTES SANTISIMA TRINIDAD

Posted by - June 7, 2020 0
FINE’NA NA TINAITAI                                                                                  Ex 34, 4-6. 8-9 Un tinaitai ginin i Lepblun Exodus  Tåftaf gi egga’an humånåo si…

MISAN CHATANMAK

Posted by - December 22, 2023 0
A B C FINENI’NA NA TINAITAI                                                                           Is 62, 11-12  Un tinaitai ginin i Lepblun i Prufeta as Isaias Atan ha’…