XXIV DAMENGGU GI UTDINÅRIU NA TIEMPU

FINE’NA NA TINAITAI                                                                              Sir 27, 30-28, 7

Un tinaitai ginin i Lepblun Sirach

I binibu yan i linalålu’ chatli’i’un na kosas

låo i i’isao na tåotåo ha gogoftoktuk esti siha.

I mambebengga siempri ha padesi i benggånsan i Saina,

sa’ ha hahassu kabålis i isao-ñiha.

Asi’i i linachin i prohimu-mu;

ya taiguennåo na yanggin manaitai håo, u fanma’asi’i i isåo-mu siha.

Kåo yanggin i taotåo ha poksai i binibu gi kurason-ña kontra i prohimu-ña,

kåo para u angokku na u nina’homlu’ ni Saina?

Kåo para u rinunsia i taotåo umasi’i i prohimu-ña,

ya para u fangågåo inasi’i put i isåo-ña?

Yanggin guiya ni sensin ha’ gui’ ha guaiya i binibu,

håyi para u inasi’i nu i isåo-ña?

Hassu i uttimu na ha’ani-mu, ya un po’lu gi un bånda i chinatli’i’;

hassu i finatai yan i linamas i tataotåo, ya båsta umisao!

Hassu i tinagu’ Yu’us cha’-mu chatli’li’i’ i prohimu-mu;

hassu i kuntråtan i Mås Takkilu’, yan kadu’ ti un li’i’ i linachi siha.

I finu’ i Saina.

 

INEPPIN I SÅTMU                                                              Ps 103, 1-2. 3-4. 9-10. 11-12

 

  1. (8) I SAINA KARIÑOSU YAN YO’ASI’;

ÑATING LALÅLU’, YAN MISIN MINA’ÅSI’.

 

Anti-hu, tuna i Saina;

interu i tataotåo-hu, bendisi i santus na na’ån-ña.

Anti-hu, tuna i Saina,

cha’-mu maleleffa ni todu i minaolek-ña.

INEPPI…..

 

Ha asisi’i todu i isao-mu,

Ha na’hohomlu’ todu i chetnot-mu.

Ha na’lilibri i lina’lå’-mu ginin i naftan,

Ha bendidisi håo ni fiet na guinaiya yan mina’åsi’.

INEPPI…..

 

Ti todu i tiempu lalålalu’ ha’ si Yu’us,

ti mambebengga i lalalo’-ña,

Ti Ha dimåmanda håfa ha miresi i isåo-ta,

patsino Ha kokopbla håfa apås-ña i bidå-ta.

INEPPI…..

 

Sa’ taimanu ha’ na takkilu’ i langit gi hilu’ i tanu’,

taiguennåo ha’ na takkilu’ i kariñu-ña para i mamfiet.

Taimanu ha’ chinago’ña desdi i sanhaya asta i sanlagu,

taiguennåo ha’ chinago’ña nai Ha popo’lu i isåo-ta.

INEPPI…..

 

SIGUNDU NA TINAITAI                                                                           Rom 14, 7-9

 

Un tinaitai ginin i Kattan San Pablo para i taotåo Roma

Hafañe’lus:

Ni unu giya hita lumåla’la’ para guiya ha’ na maisa, yan ni unu giya hita måmatai para guiya ha’ na maisa. Yanggin manlå’la’ hit, pues put i Saina na manlå’la’ hit, ya yanggin manmåtai hit, pues put i Saina na manmåtai hit. Intonsis maseha manlå’la’ pat manmåtai hit, iyun i Saina hit.

I Kristo måtai yan lå’la’ ta’lu kosaki Guiya Sainan i manlåla’la’ yan i manmåtai.

 

I finu’ i Saina.

 

IBANGHELIU                                                                                               Mt 18, 21-35

 

ÅLELUIA     Jn 13, 34

 

  1. Åleluia. BAI HU NÅ’I HAMYU UN NUEBU NA TINAGU’ ILEK-ÑA I SAINA:  FANAGOFLI’I’ UNU YAN OTTRU TAIMANU HA’ I GINIFLI’E’-HU NU HAMYU.
  2. Åleluia.

 

+ Un tinaitai ginin i såntu Ibangheliu sigun gi tinigi’ San Mateo

 Pues måttu si Pedro ya ha faisin si Jesus, “Asaina, kuåntu biåhi para u isagui yu’ i che’lu-hu ya debidi bai hu asi’i gui’? Sietti biåhi?” Manoppi si Jesus, “Åhi’, ti sietti biåhi, sinoki sitenta biåhi mamotteplika yan sietti. Sa’ i rainun i langit siña ma’akumpåra yan i rai ni malagu’ lumi’i’ i dibin i tentago’-ña siha. På’gu ha’ para u tutuhun manrikunosi, makonni’i’ gui’ unu ni dumidibi gui’ miyon pesus. Put i ti nahung para apås-ña ni dibi-ña, manågu’ i ma’gås-ña na u mabendi gui’, i asaguå-ña, yan i famagu’on-ña kumu isklåbu yan kuntodu i guinaha-ña kosaki siña u apåsi i dibi-ña. Dumimu påpa’ i tentågu’ gi me’nan i ma’gås-ña. Ya ilek-ña put fabot, ‘Gai pinasensia dididi’ nu guåhu, ya bai hu apåsi håo kabålis!’ Muma’-åsi’ i rai nu guiya ya dinispensa gui’ ni todu i dibi-ña ya sinetta. “Gi kinekiyong-ña esti na tentågu’ umasudda’ yan ottru tentågu’ ni dumidibi gui’ unus kuåntus pesus. Gine’ti aga’gå’-ña ya tinituhuni gui’ niñikut, ilelek-ña, ‘Apåsi yu’ ni dibi-mu!’ Dumimu påpa’ i ga’chong-ña ya ilek-ña put fabot, ‘Gai pinasensia dididi’ nu guåhu, ya bai hu apåsi håo kabålis!’ Låo ti malagu’ inasi’i’ gui’; ya inlugåt di u inasi’i nina’mapresu gui’ astaki empas i dibi-ña. Anai mali’i’ ni ottru tentågu’ håfa masusedi, nina’fanggof piniti, ya manhånåo guatu gi rai-ñiha ya makihåyi gui’. Pues inagang hålum ni rai esti na tentågu’. Ilek-ña nu guiya, ‘Tai bali håo na isklåbu! Hu dispensa håo ni dibi-mu nu guåhu sa’ put i un faisin yu’. Debi mohun di un gai ma’asi’ ni ga’chong-mu taiguihi i mina’ase’-hu nu hågu.’ Nina’gof lalålu’ i rai ni esti, ya ha na’makonni’ i tentågu’ guatu gi tribunåt para u makastiga astaki empas todu i dibi-ña.”

Putlus uttimu ilek-ña si Jesus, “Taiguennåo ha’ para tratå-ña si Tåta gi langit nu hamyu yanggin ti kada unu giya hamyu en asi’i i che’lun-miyu ginin i kurason-miyu.”

                        I Ibangheliun i Saina.

Related Post