FINE’NA NA TINAITAI Dt 4, 1-2. 6-8
Un tinaitai ginin i Lepblun Deuteronomy
Ilek-ña si Moises ni taotåo siha:
“Hamyu ni ManIsraelitas, på’gu nai en ékkunguk i tinagu’ yan i otdin siha ni hu fa’nå’gui hamyu para en kimpli, kosaki siña hamyu manlå’la’, yan en fanhålum ya en chili’ para iyun-miyu gi tanu’ ni manninana’i hamyu ni Saina, i Yi’us i mañainan-miyu. Mientras en kikimpli i tinagu’ i Saina, i Yi’us-miyu, ni hu faisin hamyu para en che’gui, cha’-miyu nana’yi mås pat muna’susuha palu. Gof adahi yan en kimpli kabålis, sa’ ginin esti nai umali’i’ ni nasion siha i tinemtum yan minalåti’-miyu, ya an mahunguk todu esti siha na tinagu’ umasångan, ‘Sen magahit na takkilu’ esti na nasion ya manomtum yan manmalåti’ na tåotåo.’ Sa’ håyi na takkilu’ na nasion gof hihut yan i yi’os-ña taiguini i Saina, i Yi’os-ta, hihut kontra hita yanggin ta ågang Gui’? Patsino, håyi na takkilu’ nasion manmanå’i manhustu na tinagu’ yan otdin ni hu plålanta gi me’nan-miyu på’gu na ha’åni?”
I finu’ i Saina.
INEPPIN I SÅTMU Ps 15, 2-3. 3-4. 4-5
- (1) ATYU I CHUMOCHO’GUI I TINAS U LÅ’LA’ GI ME’NAN I SAINA.
Atyu i mamomokkat sin isao yan ha cho’cho’gui i tininas;
ni sumåsangan i minagåhit gi kurason-ña
yan ti ha na’måmancha i ottru tåotåo siha ni hila’-ña.
INEPPI….
Ti ha na’lålamin i prohimu-ña,
ni ti ha sånganñañaihun siha;
Ginin guiya na manmachatlili’i’ i manailayi,
mientras ha o’onra atyu siha i manma’å’ñåo nu i Saina;
INEPPI….
Ha kukumpli i prumeså-ña achukka’ makkat,
ti mama’ganånansia ni salappe’-ña
ya ti manaksesepta salåppi’ kontra i manunas.
Atyu i chumocho’gui esti siha
ni ngai’an nai u ma’istotba.
INEPPI…..
SIGUNDU NA TINAITAI Jas 1, 17-18. 21b-22. 27
Un tinaitai ginin i Kattan Santiago
Hafañe’lus mangginifli’e’-hu Todu i manmåolik na rigålu yan todu i mås manmåolik na inifresi manmåfattu ginin i langit; måfattu påpa’ ginin as Yu’us, i muna’huyung i linangitan na inina, ni ti matulalaika osino ti nina’hohomhum ni matulaikan-ña. Ginin i minalago’-ña na Ha na’fanhuyung hit ginin i magåhit na finihu’, kosaki hita para u famfinene’na gi todu i nina’huyong-ña.
Pe’lu hamyu gi papa’ Yu’us yan risibi i finihu’ ni Ha tåtmi gi kurason-miyu, ni siña Ha na’fanlibri hamyu.
Cha’-miyu fa’baban mamaisa hamyu ya para en ékkunguk ha’ i fino’-ña; inlugåt, praktika.
Estigui’ si Yu’us Tåta Ha kunsidedera tai mancha yan magåhit na rilihon: para u fanmasetbi i manai saina yan i mambi’uda gi pinadesin-ñiha, yan para u adahin maisa gui’ putno u nina’tailayi ni tanu’.
I finu’ i Saina.
IBANGHELIU Mk 7, 1-8. 14-15. 21-23
ÅLELUIA
- Åleluia. I TATA MUNA’FANMAFAÑÅGU HIT GININ I MAGÅHIT
NA SINANGÅN-ÑA,
KOSAKI SIÑA HIT MANMAMA’ I PRIMET NA KUSETCHA
GI TODU SIHA I NINA’HUYONG-ÑA.
- Åleluia.
+ Un tinaitai ginin i såntu Ibangheliu sigun i tinigi’ San Marcos
I MamFarisehu yan unus kuåntus ni ma’estrun i Lai ni manmåttu ginin Hirusalen manetnun gi uriyan Jesus. Maripåra na guaha siha gi mandisipulun Jesus mañotchochu sin u mana’fanggåsgas siha–kumeke’ilekña, mafa’gåsi i kannai-ñiha taimanu ha’ i kustumbrin i ManHudihos siha.
I MamFarisehu, yan todu i ManHudihos siha, magogof kumpli i kustumbrin i manåmku’-ñiha ya tåya’ nai mañotchu’ sin u masen fa’gåsi i kannai-ñiha. Lusdimås, tåya’ nai makånnu’ finahan ginin i mitkåo sin u masåtpi hånum fine’na. Meggai siha ta’lu na kustumbri ni mapraktitika–put ihemplu, i mafa’gåsin i pusuelu, tåru, takuri yan kåma. Pues i MamFarisehu yan i maneskribas mafaisin si Jesus, “Sa’ put håfa na i mandisipulu-mu ti madalalalaki i kustumbrin i manamko’-ta, ya mañotchochu sin u mafa’gåsi i kannai-ñiha?”
Ilek-ña nu siha, “Gof dinanchi i prufeta as Isaias anai ha tugi’ påpa’ put hamyu ni manhipokritu,
‘Esti na tåotågui’ masesetbi Yu’ ni labius-ñiha, låo i kurason-ñiha chågu’ kontra Guåhu.
Tai bali i rispetun-ñiha nu Guåhu sa’ gi fina’nå’guin-ñiha mafa’fina’nå’guin Yuyu’us i tinagu’ tåotåo.’ Ti en atetendi i tinagu’ Yu’us låo en gegef kumpli i kustumbrin tåotåo.”
Ha na’fanetnun si Jesus i linahyan ta’lu ya Ha sangåni siha, “Ékkunguk Yu’, todu hamyu, ya chagi kumumprendi fan. Tåya’ siña humåtmi i taotåo ginin hiyung ni para u nina’applacha’; låo atyu i humuhuyung ginin i sanhalom-ña, ya ennåo ha’, siña muna’måncha gui’.
Ginin i yahålulum gi kurason nai manhuhuyung i manailayi na plånu siha tåtkumu: umabali’, mañåkki, mamunu’, che’chu’ adutterihas, hambenterihas, manailayi na disehu, fina’baba, applacha’ na hinassu, imbidiu, chatfinu’, banidå yan mambåba na disision. Todu esti siha na tinailayi manmåfattu ginin i sanhalum ya nina’a’applacha’ i taotåo.”
I Ibangheliun i Saina.
