VIII DAMENGGU GI UTDINÅRIU NA TIEMPU

464 0

FINE’NA NA TINAITAI                                                                               Sir 27, 4-7                    

Un tinaitai ginin i Lepblun Sirach

Yanggin machalåochåo i para manåfyi, manannuk i lassas;

            taiguennåo ha’ lokkui’ yanggin kumuentus i taotåo manannuk i isåo-ña.

Taimanu ha’ na i hetnu dumitetmimina i hotman nå’yan

            taiguennåo ha’ na gi kumbetsasion-ña dumitetmimina i taotåo.

A’annuk gi frutas i atension ni manå’i i trongku;

            taiguennåo ha’ lokkui’ na a’annuk gi fino’-ña håfa gaigi gi hinasson-ña i taotåo.

Cha’-mu titina i taotåo åntis di u baba i pachot-ña,

            sa’ ennaogui’ nai mapepesa i taotåo siha.

                        I finu’ i Saina. 

INEPPIN I SÅTMU                                                               Ps 92, 2-3. 13-14. 15-16                                                                      

R.  (2)  ASAINA, MÅOLIK I PARA UN MANÅ’I AGRADESIMENTU. 

Måolik i para u manå’i agradesimentu i Saina,

            para u makånta i matunan i na’ån-mu, i Mås Takkilu’,

para u mapruklåma i mina’ase’-mu an chatanmak,

            yan tulanotchi put i fiet Håo.

INEPPI…..

I tinas na tåotåo siempri lå’la’ kalang i trongkun påtma,

            siempri lå’la’ kalang i trongkun ‘cedar’ giya Lebanon. 

Atyu siha i manmatåtmi gi gima’ i Saina

            u fanlå’la’ gi templun i Yi’os-ta.

INEPPI .….

Siempri manmanokcha’ frutas achukka’ gi inamku’-ñiha,

mambråbu yan manmetgut siha,

Mientras mapruklålama: “Tunas i Saina;

i atcho’-ta, tåya’ linachi giya Guiya.”   

INEPPI…..

SIGUNDU NA TINAITAI                                                                 1 Cor 15, 54-58                                  

Un tinaitai ginin i fine’na na Kattan San Pablo para i taotåo Corinth  

Hafañe’lus:

      Entonsis, yanggin masusedi esti, ya matulaika i mamatai na tåtaotåo para i ti mamatai, ennåo na siempri u makumpli i eskritura:

“Madistrosa i finatai; kumplidu i ginanna!”

            “Månggi, Finatai, i ginannåm-mu?

Månggi, Finatai, i fuetsåm-mu para numa’puti?”

Måfattu fuetsån-ña i finatai para numa’puti ginin i isao, ya måfattu fuetsån-ña i isao ginin i Lai. Låo gråsias a dios ni numå’i hit ginanna ginin i Saina-ta as Jesukristo!

Entonsis, mañe’lu-hu, fanohgi fitmi. Sigi ha’ manmacho’chu’ duru para i Saina sa’ en tingu’ ha’ na tåya’ che’chu’-miyu para i Saina u låstima.  

                        I finu’ i Saina. 

IBANGHELIU                                                                                   Lk 6, 39-45                              

ÅLELUIA      

R.  Åleluia.   FANMA’LAK KALANG KÅNDIT GI TANU’

                        MIENTRAS EN SUSTETENI HAMYU GI FINU’ I LINA’LA’.

                                                                                                                        R.  Åleluia.

+  Un tinaitai ginin i såntu Ibangheliu sigun i tinigi’ San Lucas

      Ha usa si Jesus fina’akumparasion gi mandisipulu-ña siha, “Kåo siña un båtchit ha isgaihun ottru båtchit? Kåo ti u chapoddung hålum gi hoyu? Ti takkilo’ña i estudiånti ki i ma’estron-ña; låo todu estudiånti yanggin ha na’funhåyan i estudiu-ña siempri parehu yan i ma’estron-ña.

”Håfa na un ispipiha i estiyas gi matan i che’lu-mu ya ti un lili’i’ i trosu gi matå-mu? Taimanu un åluk ni che’lu-mu, ‘Maila’ che’lu-hu ya bai hu na’suha i estiyas gi matå-mu’, ya hågu mismu ti un li’i’ i trosu ni chechettun gi matå-mu?  Hipokritu, na’suha finene’na i trosu ginin i matå-mu; ennåo nai siempri klåru i lini’e’-mu para un na’suha i estiyas ginin i matan i che’lu-mu.

      “I maolik na trongku ti manonokcha’ lamas ya i baba na trongku ti manonokcha’ måolik. Kada trongku matutungu’ ginin i tinekchå’-ña. Ti matitifi’ i figus ginin i trongkun tituka’, ni ti matitifi’ i ibas ginin i ramas kilitis. I maolik na tåotåo ha na’a’annuk manmåolik siha ginin i maolik kurason-ña; i baba na tåotåo ha na’a’annuk mambåba ginin i mambåba na bidå-ña. Kada tåotåo kumuekuentus håfa gaigi gi halum i kurason-ña.

I Ibangheliun i Saina.

Related Post

V DAMENGGUN KUARESMA

Posted by - March 24, 2023 0
A FINENE’NA NA TINAITAI                                                              Ez 37, 12-14  Un tinaitai ginin i Lepblun i Prufeta as Ezekiel  Ilek-ña si Yu’us…

EPIFANIA

Posted by - January 1, 2022 0
FINENE’NA NA TINAITAI Is 60, 1-6 Un tinaitai ginin i Lepblun i Prufeta as Isaias Kahulu’ gi mina’lak-mu, O Hirusalen! …

III DAMENGGUN ADBIENTU

Posted by - December 10, 2021 0
FINENE’NA NA TINAITAI Zep 3, 14-18   Un tinaitai ginin i Lepblun i Prufeta as Zephaniah   Fanéssalåo gi minaguf,…

IMACULADA CONCEPCION

Posted by - December 7, 2021 0
FINENE’NA NA TINAITAI Gn 3, 9-15. 20  Un tinaitai ginin i Lepblun Genesis       Dispues di ha kånnu’ si…