VI DAMENGGUN PÅSGUAN RESUREKSION

701 0

FINE’NA NA TINAITAI                                                                                 Acts 8, 5-8. 14-17

Un tinaitai ginin i Bidan i Manapostulis

Put ihemplu humånåo si Felipe påpa’ para Samåria na songsung ya ha anunsia guihi i Misihas. Interu i linahyan ni humunguk si Felipe yan lumi’i’ i milågru ni ha cho’gui, magef ékkunguk håfa para u sångan. Guaha meggai ni mangái ispiritu ni manaplacha’, ni manhuyung mane’essalåo a’gagang. Meggai lokkui’ siha ni mamparalitiku yan maninutit mana’fanhomlu’. I silebrasion gi sengsung ma’åomenta ya mås bibu.

Anai mahunguk ni Manapostulis giya Hirusalen na ma’aksepta i finu’ Yu’us giya Samåria, mana’hånåo si Pedro yan si Juan guatu giya siha. Humånåo i dos påpa’ para esti siha na tåotåo ya manåyuyut para u marisibi i Espiritu Såntu. Trabiha ti tumutunuk i Espiritu Såntu gi hilu’-ñiha, sa’ på’gu ha’ manmatakpåpangi siha gi na’an i Saina as Jesus. Anai måttu i dos mapo’lu i kannai-ñiha gi hilu’-ñiha ya insigidas marisibi i Espiritu Såntu.

I finu’ i Saina.

INEPPIN I SÅTMU                                                                 Ps 66, 1-3. 4-5, 6-7, 16. 20

  1. (1) PO’LU YA U ESSALÅO I TANU’ GI MINAGUF PARA SI YU’US.

Fanessalåo kun minaguf para si Yu’us, todu hamyu ni manggaigi gi tanu’;

kantåyi tinina para i glorian i na’ån-ña;

pruklåma i takkilu’ na matunå-ña.

Sangåni si Yu’us: “Manna’manman siha i bidå-mu!”

INEPPI …..

 

“Po’lu ya todu i manggaigi gi tanu’ un ma’adora yan u fangånta tinina para Hågu,

ya u makånta tinina para i na’ån-mu!”

Fanmamaila’ ya en li’i’ i che’chu’ Yu’us,

i manna’manman na che’cho’-ña gi entalu’ i taotåo siha.

INEPPI…..

 

Ha tulaika i tasi para un ånglu’ na tånu’;

manmamokkat siha gi entalu’ i sadduk.

Pues maila’ ya ta fanmaguf giya Guiya,

manggubebetna ni minetgot-ña para todu i tiempu.

INEPPI…..

 

Fanékkunguk, todu hamyu ni manma’å’ñåo as Yu’us,

mientras hu diklålara håfa bidå-ña nu guåhu.

U matuna si Yu’us, ni Ha nåna’i yu’ ni malago’-hu

i mina’åsi’ ni hu gågagåo gi tináyuyut.

INEPPI…..

 

SIGUNDU NA TINAITAI                                                                               1 Pt 3, 15-18

Un tinaitai ginin i fine’na na Kattan San Pedro

Mangginefli’e’-hu:

Ribirensia i Kristo gi kurason-miyu, yan tuna Gui’ kumu Saina. Na’fanlistu hamyu todu i tiempu umoppi maseha håyi ni fumaisen hamyu para en isplika i inangokku ni gaigi giya hamyu, låo che’gui esti kun kariñu yan rispetu. Na’fanggåsgas kunsensian-miyu, kosaki yanggin manma’insutta hamyu, atyu siha i sumångan i tailayi pat i maolik na konduktan-miyu kumu mandisipulun i Kristo u fanmamåhlåo ni sinangan-ñiha. Måolekña mamadesi put i machocho’gui i maolik, yanggin esti i minalagu’ Yu’us, ki macho’gui i tailayi. I Kristo måtai put isao un biåhi para todu, un måolik na tåotåo put i mani’isåo, put i para en fangkinenni’ guatu gi as Yu’us. Mapunu’ Gui’ gi tataotåo, låo mana’lå’la’ gi espirituhåt.

I finu’ i Saina.

 

IBANGHELIU                                                                                     Jn 14, 15-21

ÅLELUIA   Jn 14, 23

  1. Åleluia. YANGGIN HÅYI GUMUFLI’I’ YU’, PUES SIEMPRI HA KUKUMPLI I FINO’-HU,

ILEK-ÑA I SAINA,

YA SIEMPRI U GINEFLI’I’ AS TATÅ-HU, YA BAI IN FATTU GUATU GIYA GUIYA.

  1. Åleluia.

+ Un tinaitai ginin i såntu Ibangheliu sigun gi tinigi’ San Juan

Ilek-ña si Jesus ni mandisipulu-ña:

Yanggin en gefli’i’ Yu’, ya en kikimpli i tinago’-hu siha, bai Hu faisin si Tåta, ya Guiya en fannina’hanågui ottru na Paraklitu—para en fanhahamyu todu i tiempu: i Espiritun minagåhit, ni ti siña rinisibi Gui’ ni tanu’, sa’ ti siña lini’i’ Gui’ yan ti siña tiningu’ Gui’ låo hamyu en tingu’ Gui’ sa’ sumåsaga Gui’ giya hamyu yan siempri gaigi gi sanhalum-miyu. Ti bai Hu dingu hamyu kalang i manaisaina; siempri tumata’lu Yu’ mågi giya hamyu. Un råtu ta’lu ya siempri i tanu’ ti u li’i’ Yu’; låo hamyu en lili’i’ ha’ Yu’ kumu unu ni gai lina’la’, ya siempri manggai lina’la’ hamyu. Guennåo na ha’åni siempri en tingu’ na gaigi Yu’ gi as Tatå-hu, ya hamyu manggaigi giya Guåhu, ya Guåhu gaigi Yu’ giya hamyu. Atyu i umo’osgi i tinago’-hu guiya ennåo i gumufli’i’ Yu’; ya atyu i gumufli’i’ Yu’ siempri ginefli’i’ as Tatå-hu.

Guåhu lokkui’ bai Hu gufli’i’ gui’ ya bai na’tungu’ gui’ nu Guåhu.”

I Ibangheliun i Saina.

Related Post

III DAMENGGUN ADBIENTU

Posted by - December 15, 2019 0
FINE’NA NA TINAITAI                                                                               Is 35, 1-6. 10  Un tinaitai ginin i Lepblun i Prufeta as Isaias        I…

IMACULADA CONCEPCION

Posted by - December 8, 2018 0
FINE’NA NA TINAITAI                                                                   Gn 3, 9-15. 20   Un tinaitai ginin i Lepblun Genesis   Dispues di ha…

TULOS SÅNTUS

Posted by - October 28, 2022 0
FINENE’NA NA TINAITAI                                                              Rv 7, 2-4. 9-14  Un tinaitai ginin i Lepblun Ribelasion       Guåhu, si Juan, hu li’i’ kokokolu’…

XXIX DAMENGGU GI UTDINÅRIU NA TIEMPU

Posted by - October 21, 2018 0
FINE’NA NA TINAITAI                                                                               Is 53, 10-11 Un tinaitai ginin i Lepblun i Prufeta as Isaiah Låo nina’maguf i Saina…