SAGRÅDA FAMILIA

574 0

FINE’NA NA TINAITAI                                                                  Sir 3, 2-6. 12-14

Un tinaitai ginin i Lepblun Sirach

Si Yu’us Ha na’ma’onra i tata entri i famagu’on-ña;

Ha aprueba i åoturidåt i nana gi entri i lalahi-ña siha.

Guiya ni umonra si tatå-ña ha apåsi i isåo-ña siha;

mamomo’lu guinahan riku guiya ni umo’onra si nanå-ña.

Guiya ni umonra si tatå-ña u nina’maguf ni famagu’un

ya yanggin manåyuyut siempri ma’ekkunguk.

Guiya ni umonra si tatå-ña u anåkku’ ha’ani-ña;

guiya ni muna’mamaguf si nanå-ña ha o’osgi si Yu’us.

 

Lahi-hu, fa’måolik si tatå-mu gi inamko’-ña;

mientras ha’ gagaigi mungnga mana’piniti.

Maseha esta ti manunungu’, na’gai kunsiderasion håo nu guiya;

mungnga madispresia gui’ gi brinabu-mu.

Sa’ i minesngun kontra i tata ti siña mamaleffanñaihun,

sa’ sumetbi kumu un inifresi para isao—ya u fanhåli’ åpmam.

 

I finu’ i Saina.

 

 

INEPPIN I SÅTMU                                                                          Ps 128, 1-2. 3. 4-5

  1. MANMAGUF ATYU SIHA I MANMA’ÅÑÅO NI SAINA,

YAN MANMAMOMOKKAT GI CHALÅN-ÑA SIHA.

Manmaguf atyu siha i umo’osgi i Saina,

i chumocho’gui i tinagu’ Yu’us.

Sa’ siempri un kånnu’ i kusetchan i fina’chu’cho’-mu;

maguf håo ya un gefsaga:

INEPPI…..

 

Kalang meppa’ na råmas ubas

i asaguå-mu palåo’an gi halum i gimå’-mu,

i famagu’on-mu kalang tinanum ubas

gi uriyan i lamasa-mu.

INEPPI….

.

Atan ha’, sa’ taiguini u fanmabendisi

i lalåhi ni manma’å’ñåo ni Saina.

Puedi i Saina un binendisi ginin Sion,

todu i ha’ånin i lina’lå’-mu

kosaki un såonåo gi minaguf Hirusalen.

INEPPI…..

 

SIGUNDU NA TINAITAI                                                                          Col 3, 12-21

Un tinaitai ginin i Kattan San Pablo para i taotåo Colossae

 Hafañe’lus:

Hamyu i taotåo Yu’us; mangginefli’i’ hamyu ya esta Ha atyik hamyu para iyon-ña. Pues put ennåo na debidi en fanminagågu ni mina’åsi’, i kariñu, hinumitdi, suåbi yan pinasensia. Fanasungun unu yan ottru yan fana’asi’i yanggin guaha umugung kontra ottru. Debidi en fana’asi’i unu yan ottru taimanu ha’ na esta maninasi’i hamyu ni Saina. Na’yiyi ni ginefli’i’ esti siha, sa’ i ginefli’i’ muna’fandadañña’ todu gi prifektu na dinañña’. I pås ni måfattu ginin i Kristo en fangginiha gi disision ni en fa’titinas; sa’ put esti na pås na maninagang hamyu as Yu’us para en fandañña’ kumu un tåtaotåo. Yan fanmannå’i agradesimentu. Debidi u gaigi gi kurason-miyu i minsåhin i Kristo yan todu i rikeså-ña. Fanáfa’na’gui unu yan ottru yan todu i tinemtum. Fangånta såtmu, himnu, yan mansagrådu na kånta; kantåyi si Yu’us kantan agradesimentu gi kurason-miyu. Put ennåo na maseha håfa i en che’gui pat en sangan, debidi en che’gui gi na’an i Saina as Jesus, mientras manmannåna’i hamyu gråsia ginin i Kristo para si Yu’us Tåta.

Famalåo’an, pe’lu hamyu gi papa’ i ginibetnan i asaguan-miyu, sa’ ennagui’ upbligasion-miyu gi Saina.

Lalåhi, guaiya i asaguan-miyu yan cha’-miyu fantataklalu’ kontra siha.

Famagu’un, upbligasion-miyu gi Saina para en esgi i mañainan-miyu todu i tiempu, sa’ esti muna’mamaguf si Yu’us.

Mañaina, cha’-miyu istototba i famagu’un-miyu, sa’ siempri malingu ånimun-ñiha.

 

I finu’ i Saina.

B

IBANGHELIU                                                                                                           Lk 2, 22-40

ÅLELUIA       Col 3, 15. 16

  1. Åleluia. PUEDI I PÅS I KRISTO U FANGGUBETNA GI KURASON-MIYU

YAN I KABÅLIS NA MENSAHI-ÑA U LÅ’LA’ GI SANHALUM-MIYU.

  1. Åleluia.

 

+ Un tinaitai ginin i såntu Ibangheliu sigun gi tinigi’ San Lucas

Måttu i tiempu anai si Jose yan si Maria debidi u makumpli i tinagu’ Moises na sirimonias ni para u mana’fanggåsgas siha. Put ennåo na makonni’ i patgun guatu giya Hirusalen para u maprisenta Gui’ gi Saina. Estegui’ matugi’ gi Lai i Saina: “Todu i primirisa na låhi debidi u makonsågra para i Saina.” Manhånåo lokkui’ put i para u ma’ufresi sakrifisiu sigun gi lai i Saina: “Un påt paluman åpu osino un petchun paluman nossa’.”

 

Iståba na sumåsaga giya Hirusalen un tåotåo ni na’ån-ña si Simeon. Måolik esti na tåotåo ya gai ma’a’ñåo as Yu’us, ya ha nanangga i mana’librin Israhet. Inina ni Espiritu Såntu ya sinangåni gui’ na ti u tañña’ i finatai astaki ha li’i’ i nina’hånåo i Saina na Misihas. Inina gui’ ta’lu ni Espiritu Såntu ya humånåo para i Templu. Anai måttu i patgun as Jesus gi Templu kinekenni’ ni mañaina-ña para u makumpli i tinagu’ i Lai, hineggui i patgun as Simeon, ya ha nå’i gråsia si Yu’us:

“O Asaina, på’gu sa’ esta Un kumpli i prumeså-mu,

siña Un konni’ måhgugung i tentago’-mu.

I matå-hu mismu lumi’i’ i nana’libri ginin Hagu,

ni Un pripåra gi me’nan todu i taotåo:

Un kåndit para u inina i chalån-mu para i MamPagånu

yan para u faninenra i taotåo-mu ManIsraelitas.”

Nina’manman i tatan i patgun yan si nanå-ña ni sinangan Simeon put i patgun. Mambinendisi as Simeon ya ilek-ña as Maria i nana, “Inatyik esti na påtgun as Yu’us para i pineddung yan kinahulu’ meggai giya Israhet; u fama’un siñåt Gui’ ginin as Yu’us ni meggai na tåotåo u kinentra, ya Guiya u nina’fanannuk todu i sikretu na hinassu. Ya i piniti-mu kalang un kalåktus na såpbli, u yinamak i kurason-mu.”

Iståba guennåo un prufeta ni na’ån-ña si Anna, hagan Phanuel, ni ginin i rasan Asher. Åmku’ esti na palåo’an. Dispues di sietti åñus na umasaguån-ña bumi’uda asta otchentaikuåttru åñus idåt-ña. Nungka nai ha dingu i templu; ha adodora si Yu’us ha’åni yan puengi, umayuyunat yan manånayuyut. Måttu guatu guennåo mismu na mumentu, ha nå’i gråsia si Yu’us ya kumuentus put i patgun para todu atyu siha i numanangga i mana’librin Hirusalen.

Anai munhåyan i dos makumpli todu siha i tinagu’ i Saina, mana’lu tåtti para Nasaret giya Galileha anai gaigi i gima’-ñiha. Dumångkulu yan mumetgut i patgun; tumomtum Gui’, ya binendisi Gui’ as Yu’us.

I Ibangheliun i Saina.

Related Post

MATAKPÅNGIN I SAINA-TA

Posted by - January 9, 2021 0
FINE’NA NA TINAITAI                                                                         Is 42, 1-4 . 6-7 Un tinaitai ginin i Lepblun i Prufeta as Isaias Taiguini ilek-ña…

XXXII DAMENGGU GI UTDINÅRIU NA TIEMPU

Posted by - November 10, 2018 0
FINE’NA NA TINAITAI                                                       1 Kgs 17, 10-16 Un tinaitai ginin i fine’na na Lepblun i Manrai  I prufeta as…

XVIII DAMENGGU GI UTDINÅRIU NA TIEMPU

Posted by - July 30, 2022 0
FINENE’NA NA TANAITAI                                                                        Eccl 1, 2; 2, 21-23  Un tinaitai ginin i Lepblun Ecclesiastes  Banidå gi entalu’ i…