FINE’NA NA TINAITAI Ex 17, 3-7
Un tinaitai ginin i Lepblun Exodus
Gi mina’hun-ñiha, manggonggung i taotåo siha kontra as Moises, ilik-ñiñiha, “Håfa mina’ un konni’ ham huyung ginin iya Ihiptu? Kåo put i para un na’fanmåtai må’hu ham guini yan i famagu’un-måmi yan i ga’-måmi gå’ga’ siha?” Intonsis, si Moises ha essalågui i Saina, “Håfa para bai hu cho’gui ni esti siha na tåotåo? Dididi’ ha’ ta’lu teniki ma’åtchu’ yu’!” Ineppi si Moises ni Saina, “Hånåo guatu gi me’nan i taotåo siha, fanhamyu yan unus kuåntu na manåmku’ na Israelitas siha, ya mientras manhåhanåo hamyu guatu gogo’ti gi kannai-mu atyu na båstun i un usa anai un panak i sadduk. Siempri tumotohgi yu’ guihi gi me’nå-mu gi hilu’ i atchu’ giya Horeb. Atcha i atchu’, ya siempri milak huyung hånum ginin ennåo para u fanggimin i taotåo.” Ha cho’gui esti si Moises gi me’nan i manåmku’ na Israelitas. Ma’å’agang esti na lugåt ‘Massah’ yan ‘Meribah’, sa’ put i manatgumentu guennåo i Israelitas, ya guennåo nai machagi i Saina, ilik-ñiñiha, “Kåo magåhit na gaigi i Saina gi entalo’-ta pat åhi’?”
I finu’ i Saina.
INEPPIN I SÅTMU Ps 95, 1-2. 6-7. 8-9
R. (8) YANGGIN EN HINGUK I BOS-ÑA PÅ’GU NA HA’ÅNI,
CHA’-MIYU MUNA’FANMAHEHETUK I KURASON-MIYU.
Fanmamaila’, nihi ya ta fanmaguf kumantåyi i Saina;
nihi ya ta onra i atchu’ i satbasion-ta.
Maila’ ya ta taggam Gui’ ni kantan minaguf,
nihi ya ta fanmaguf mangånta såtmu para Guiya.
INEPPI…..
Fanhålum ya ta fanmañaluda ya ta fanmanadora;
maila’ ya ta fandimu gi me’nan i Saina ni fuma’tinas hit.
Sa’ Guiya i Yi’os-ta, ya hita i taotåo-ña
ni Ha påpastu, i inetnun ni Ha gigiha.
INEPPI…..
Ai, ya på’gu na ha’åni nai en hinguk i bos-ña:
“Cha’-miyu muna’fanmahehetuk i kurason-miyu
taiguihi anai maniståba hamyu giya Meribah,
taiguihi i tiempun Massah gi disiettu.
Guihi anai matenta yu’ ni mañainan-miyu;
machagi yu’ achukka’ esta mali’i’ i che’cho’-hu siha”.
INEPPI…..
SIGUNDU NA TINAITAI Rom 5, 1-2. 5-8
Un tinaitai ginin i Kattan San Pablo para i taotåo Roma
Hafañe’lus: På’gu ni esta mana’fanunas hit gi me’nan Yu’us ginin i hinenggi, manggaigi hit gi pås yan Yu’us ginin i Saina-ta as Jesukristo. Guiya si Jesukristo kumonni’ hit ginin i hinenggi para i ekspirensiån-ña ni gråsian Yu’us, anai manlåla’la’ hit på’gu. Put esti na mambanidosu hit ni atyu i ta nanangga na para ta fañåonåo gi glorian Yu’us!
Esti na ninangga ti u na’fandisganåo hit, sa’ esta Ha chuda’ huyung si Yu’us i ginefli’e’-ña para hålum gi kurason-ta ginin i Espiritu Såntu, ni manmanå’i hit kumu rigålun Yu’us para hita.
Gi ma’apunta na tiempu, anai maniståtaba ha’ hit manai nina’siña, måtai i Kristo put hita ni manai yi’us na tåotåo.Håssan na guaha tåotåo ha na’enñaihun i ha’ani-ña put un tunas na tåotåo, låo put un tunas na tåotåo guaha ha’ siña umatotga måtai.
Ginin esti na asuntu na Ha prueba i ginefli’e’-ña si Yu’us nu hita–sa’ mientras maniståtaba ha’ hit gi isao måtai i Kristo put hita!
I finu’ i Saina.
IBANGHELIU Jn 4, 5-42
(Todus) U matuna Håo, Asaina Jesukristo, Rai i taihinekuk na gloria!
(Tetcha) Asaina, magåhit na Hågu i nana’librin i tanu’;
Nå’i yu’ ni lala’la’ na hånum, ya ni ngai’an nai hu må’hu ta’lu.
+ Un tinaitai ginin i såntu Ibangheliu sigun gi tinigi’ San Juan
Måttu Gui’ gi un Samaritånu na songsung ni mafa’nana’an ‘Sychar’ gi fi’un atyu na sulåt tånu’ ni ha nå’i si Jacob i lahi-ña as Jose. Iståba guennåo i tipu’ Jacob, ya put i nina’yayas si Jesus ni biahi-ña, matå’chung på’pa’ gi fi’un i tipu’.
Kåsi ennåo i alas dossi gi talu’åni.
Måttu guini un palåo’an Samaritånu para u fanlupuk hånum, ya ilek-ña si Jesus nu guiya, “Na’gimin Yu’ fan.” ( Esta manhånåo i mandisipulu-ña para i sengsung para u fanmamåhan mantension-ñiha.)
Manoppi i palåo’an Samaritånu, “Hågu Hudihos Håo, ya guåhu Samaritånu, håfa na para Un fafaisin yu’ para bai hu na’gimin Håo?” (Ha hassu na i ManHudihos masuhåhayi i Samaritånu.)
Manoppi si Jesus,
“I mohun ya un tungu’ håfa nina’i’i-ña si Yu’us,
yan håyi esti i fumafaisin håo para u gimin,
inlugåt di hågu siempri Guiya
numå’i håo ni lala’la’ na hånum.”
Manoppi i palåo’an,
“Siñot, ni båtdi Håo tåya’ ya tåddung esti na tupu’.
Månu nai para Un chuli’ esti i lala’la’ na hånum?
Siguru yu’ na ti Un popo’lu na takkilo’ña Håo ki i tatan-måmi as Jacob,
ni numa’i ham ni esti na tupu’, ya gumimin guini yan i famagu’on-ña yan i ga’-ñiha siha?”
Manoppi si Jesus:
“Todu i manggimin guini na hånum
u fanmå’hu ha’ ta’lu.
Låo todu i manggimin ni hanum ni para bai Hu nå’i ni ngai’an nai u fanmå’hu;
i hanum ni para bai Hu nå’i u fama’be’bu’ gi sanhalom-ña,
pepetchåo hulu’ para u fannå’i taihinekuk na lina’la’.”
Ilek-ña i palåo’an nu Guiya,
“Siñot, nå’i yu’ ni ennåo na hånum ya ti bai hu må’hu ta’lu,
ya båsta yu’ måttu guini para bai hu fanlupuk.”
Ilek-ña si Jesus nu guiya,
“Hånåo ya un ågang i asaguå-mu ya dispues nai un ta’lu mågi.”
Manoppi i palåo’an,
“Tåya’ asaguå-hu.”
Sinangåni as Jesus,
“Dinanchi sinangån-mu anai ilek-mu na tåya’ asaguå-mu. Låo gi magåhit, esta singku
asaguå-mu ya i taotåo ni ga’chochong-mu på’gu ti asaguå-mu. Dinanchi i ineppem-mu.”
Manoppi i palåo’an,
“Siñot, fa’na’an prufeta Håo. Estegui’ na oksu’ nai manmanadora as Yu’us i taotåo siha, låo
hamyu na taotågui ilik-mimiyu na iya Hirusalen nai debi i taotåo siha nai u ma’adora si Yu’us.”
Sinangåni gui’ as Jesus,
“Palåo’an, honggi Yu’, na mamamaila’ i ora anai siempri en adora i Tata, ti guini na oksu’
osino iya Hirusalen. Manmanadodora hamyu una kosa ni ti en kemprendi,
låo hami in kemprendi håfa in adodora; sa’ ginin i ManHudihos nai para u fåttu i satbasion.
Ya mamamaila’ i ora, ni esta gaigi på’gu, anai atyu siha i manmanadodora ni dinanchi
u ma’adora i Tata gi Espiritu yan minagåhit. Intonsis, ennåo siha ni manmanadodora taiguini,
maninispipiha ni Tata. Si Yu’us Espiritu Gui’, ya atyu siha i umadodora Gui’
debidi u ma’adora Gui’, gi Espiritu yan gi minagåhit.”
Ilek-ña i palåo’an nu Guiya:
“Hu tungu’ na guaha mamamaila’ Misihas. (Esti na palåbra kumeke’ilek-ña Guiya ni
Ma’olius.) Yanggin måttu, Guiya u sangåni hit todu.”
Manoppi si Jesus,
“Guåhu ni kumuentutusi håo, Guåhu Gui’.”
Manmåttu i mandisipulu tåtti guini na mumentu, ya nina’fansen manman na kumuekuentus Gui’ yan palåo’an. Låo tåya’ mamaisin tåtkumu “Håfa malago’-mu as Jesus?” Pat, “Sa’ håfa na Un kuentutusi esti na palåo’an?”
Pues ha sotta ha’ i palåo’an guennåo i tebbut hånum ya humånåo para i sengsung.
Ilek-ña nu i taotåo siha,
“Fanmamaila’ ya en li’i’ un tåotåo ni sumangåni yu’ todu i håfa bidå-hu!
Kåo Guiya mohun esti i Misihas?”
Intonsis madingu i sengsung ya manhånåo para u mali’i’ Gui’.
Mientras tåntu, sigi ma’insisti Gui’ ni mandisipulu, “Ma’estru chotchu dididi’.”
Låo mansinangåni siha:
“Guaha na’-hu ni ti en tingu’.”
Pues esti nai matutuhun ni mandisipulu manáfaisin,
“Håfa mohun, buenti guaha esta chumuli’i’ Gui’ na’-ña?”
Maninisplikåyi siha as Jesus:
“Para bai Hu cho’gui i minalagu’ Atyu i muna’hånåo Yu’
yan para bai Hu na’funhåyan i che’cho’-ña, ennegui’ nengkano’-hu.
Na ti esti sinangan-mimiyu: ‘Kuåttru mesis tetehnan para ta fanmangusetcha!’?
Ekkunguk håfa para bai Hu sångan: Baba i matan-miyu ya en fanmanli’i’!
I gualu’ siha esta listu para u fanmako’ku’! Atyu i para u fango’ku’ esta ha risibi i suetdon-ña
ya numana’etnun kusetcha para i taihinekuk na lina’la’, kosaki i mañåtpi yan i mangusetcha u
chámmaguf i dos.
Estegui’ prueba para esti na sinangan:
‘Un tåotåo tumånum; ya i ottru kumo’ku’.’
Hu na’fanhånåo hamyu para en ke’ku’ atyu i ti finacho’chu’-miyu.
Ottru siha chumo’gui i che’chu’, ya mañåonåo hamyu manmapåtti gi kine’ku’.
Meggai na Samaritånu ginin atyu na songsung manmanhonggi nu Guiya ginin i testimoñun esti na palåo’an:
“Ha sangåni yu’ todu i hagas bidå-hu.”
Putlus uttimu, anai manmåttu i Samaritånu giya Guiya, mafaisin Gui’ para u lásaga un råtu giya siha. Pues sumåga guennåo dos dihas, ya ginin i fino’-ña meggai manmanhonggi.
Masangåni i palåo’an:
“I hinenggin-måmi esta ti ha dipependi gi istoriå-mu.
Hami mismu in hinguk, ya in tingu’ na Guiya magåhit esti i Satbadot i tanu’.”
I Ibangheliun i Saina.
