III DAMENGGUN ADBIENTU

604 0

FINE’NA NA TINAITAI                                                                      Zep 3, 14-18

Un tinaitai ginin i Lepblun i Prufeta as Zephaniah 

Fanéssalåo gi minaguf, O hagan Sion!

fanmaguf mangånta, O Israhet!

Fanmaguf yan todu i kurason-miyu,

ni hagan Hirusalen!

Esta Ha na’suha i Saina i kundenasion kontra hamyu,

Ha bira tåtti i inimigun-miyu;

I Rai Israhet, i Saina, gaigi gi entalu’-miyu,

cha’-miyu fanma’å’añao sa’ tåya’ esta disgråsia para

u fåttu giya hamyu.

Atyu na ha’åni, siempri u masångani iya Hirusalen:

Cha’-mu ma’å’añao, O Sion, cha’-mu diniskunsuesuela!

I Saina, i Yi’us-miyu, gaigi gi entalu’-miyu,

Guiya metgut na nana’libri;

Siempri mumaguf put hamyu,

ya en fanrininueba gi guinaiyan-ña.

Siempri kumånta maguguf put hamyu,

taiguihi i kumåkanta yanggin guput.

 

I finu’ i Saina.

 

INEPPIN I SÅTMU                                                                              Is 12, 2-3. 4. 5-6

  1. FANÉSSALÅO GI MINAGUF:

SA’ GAIGI  GI ENTALU’-MIYU I TAKKILU’ YAN SÅNTUS GIYA ISRAHET.

 

Hunggan magåhit na si Yu’us satbadot-tu;

gai kumfiånsa yu’ yan ti ma’åñao yu’.

I Saina i minetgot-tu yan i binatbarok-ku

ya esta satbadot-tu Gui’.

Gi minaguf siempri manlupuk håo hånum

gi be’bu’ i satbasion.

INEPPI…..

 

Nå’i gråsia i Saina, sanganñaihun i na’ån-ña;

na’matungu’ gi entalu’ i nasion siha i bidå-ña,

pruklåma na takkilu’ i na’ån-ña.

INEPPI…..

Fangånta tinina para i Saina put i mambunitu siha na fina’tinås-ña;

na’matungu’ esti siha gi todu i tanu’.

Fanéssalåo tinina siha, O siudå giya Sion,

sa’ må’gas i gaigi gi entalu’-miyu

Guiya atyu i Santus giya Israhet!

INEPPI…..

 

SIGUNDU NA TINAITAI                                                                                Phil 4, 4-7

Un tinaitai ginin i Kattan San Pablo para i taotåo Philippi 

Hafañe’lus:

Puedi todu i tiempu en fanmámaguf gi mandanña’-miyu yan i Saina.  Bai hu ripiti ha’ ta’lu: fanmaguf!  Fanu’i i taotåo siha na mangariñosu hamyu.  Ti åpmam måttu i Saina.  Cha’-miyu fanchachathinassu ni put håfa, låo gi todu i tinayuyut-miyu gågåo si Yu’us ni nisisidåt-miyu, todu i tiempu fanmanggågåo ginin i kurason-miyu ni bula agradesimentu.  Ya i pås Yu’us, ni takkilo’ña’ ki i kinimprendin tåotåo, u inadahi i kurason yan i hinassun-miyu ya cha’-ñiha fana’adispatta yan i Kristo Jesus.

 

I finu’ i Saina.

 

IBANGHELIU                                                                         Lk 3, 10-18

ÅLELUIA     Is 61, 1 (cited in Lk 4, 18)

  1. Åleluia. I ESPIRITUN I SAINA GAIGI GI HILO’-HU;

HA NA’HÅNÅO YU’ PARA BAI HU CHULI’I I MAMOPBLI

NI MAOLIK NA NUTISIA.

  1. Åleluia.

+  Un tinaitai ginin i såntu Ibangheliu sigun i tinigi’ San Lucas

Mafaisin si Juan ni linahyan tåotåo, “Håfa debidi in che’gui’?”

Gi inippen-ña ilek-ña, “I taotåo ni dos saku-ña u nå’i atyu i taya’.  I taotåo ni guaha na’-ña u cho’gui parehu.” I taotåo kuntribusion lokkui’ manmåttu para u fanmatakpångi, ya ilik-ñiha nu guiya, “Ma’estru håfa para bai in che’gui?” Manineppi siha, “Cha’-miyu kekepbla i taotåo måski i esta ma’apunta na kantidå.” I sindålu siha lokkui’ mafaisin gui’, “Ya hami?” Mansinangåni siha, “Cha’-miyu gutpepeha ni håyi.  Cha’-miyu fanmansiknanani ni mandagi. Na’fanguntentu hamyu ni suetdun-miyu.”

I taotåo siha mana’afaisin, manmamanman gi kurason-ñiha na siña ha’ na si Juan guiya i Misihas.  Manineppi siha todu as Juan anai ilek-ña, “Hu takpåpangi hamyu ni hanum, låo guaha para u fåttu ni mitgotña ki guåhu. Guåhu ti diknu yu’ para bai hu pula’ i geddin i sandaliås-ña. Guiya en fantinakpångi ni Espiritu Såntu yan i guafi.  Ha gogo’ti i beha gi kannai-ña, para u tåfyi i fa’i ya u na’etnun gi sagan pine’lu, ya u songgi i lassas siha gi guafi ni ti mámatai.”

Difirentis klåsi na akunsehu ha nå’i i taotåo siha mientras sumesetmun put i Maolik na Nutisia.

 

Ibangheliun i Saina.

Related Post

II DAMENGGU GI UTDINÅRIU NA TIEMPU

Posted by - January 12, 2024 0
B FINENI’NA NA TINAITAI                                                               I Sam 3, 3b-10, 19  Un tinaitai ginin i primet na Lepblun Samuel       Mamaigu’ si…

II DAMENGGU GI UTDINÅRIU NA TIEMPU

Posted by - January 18, 2020 0
FINE’NA NA TINAITAI                                                                              Is 49, 3. 5-6  Un tinaitai ginin i Lepblun i Prufeta as Isaias Ilek-ña i Saina…

DAMENGGUN PENTEKOSTES

Posted by - May 26, 2023 0
A B C FINENI’NA NA TINAITAI                                                                           Acts 2, 1-11  Un tinaitai ginin i Bidan i Manapostulis  Anai måttu i ha’ånin…

V DAMENGGU GI UTDINÅRIU NA TIEMPU

Posted by - February 2, 2024 0
B FINENI’NA NA TINAITAI                                                                            Jb 7, 1-4. 6-7  Un tinaitai ginin i Lepblun Job  Kumuentus si Job, ilelek-ña:  Na…