II DAMENGGU GI UTDINÅRIU NA TIEMPU

712 0

FINE’NA NA TINAITAI                                                                     I Sam 3, 3b-10, 19

Un tinaitai ginin i primet na Lepblun Samuel

Mamaigu’ si Samuel gi templun i Saina anai gaigi i Åtkan Yu’us. I Saina Ha ågang si Samuel ya manoppi, “Estegui’ yu'”. Malågu gui’ guatu as Eli, ya ilek-ña “Estegui’ yu’. Un ågang yu’.” Ilek-ña si Eli, “Ti hu ågang håo. Hånåo tåtti ya un maigu’.” Pues humånåo gui’ tåtti ya maigu’. Ta’lu i Saina Ha ågang si Samuel ya kumahulu’ ya humånåo guatu gi as Eli. Ilek-ña, “Estegui’ yu’. Un ågang yu’.” Låo manoppi si Eli, “Ti hu ågang håo, lahi-hu. Hånåo tåtti ya un maigu’.”

Atyu na tiempu ti ha payuyuni si Samuel i Saina, sa’ i Saina ti Ha na’tutungu’ gui’ ni håfa trabiha. I Saina Ha ågang ta’lu si Samuel, i mina’tres biåhi. Kumahulu’ gui’ ya humånåo guatu gi as Eli, ilek-ña “Estegui’ yu’. Un ågang yu’.” Atyu na si Eli ha kumprendi na i Saina umå’agang i hobinsitu. Pues ilek-ña as Samuel, “Hånåo ya un maigu’, ya yanggin ma’ågang håo, fanoppi, ‘Kuentus, Asaina, sa’ ume’ekkunguk i setbintem-mu.’ ” Anai humånåo si Samuel guatu gi sagå-ña ya maigu’ gui’, måttu i Saina, ya Ha na’matungu’ maisa Gui’, ya umågang parehu yan åntis, “Samuel, Samuel!” Manoppi si Samuel, “Kuentus, sa’ ume’ekkunguk i setbintem-mu.”

Dumångkulu si Samuel ya i Saina gaigi giya guiya, ya ti Ha sedi ni håfafa gi palabrås-ña para u tai bali.

I finu’ i Saina.

 

INEPPIN I SÅTMU                                                                 Ps 40, 2. 4. 7-8. 8-9. 10

  1. ESTEGUI’ YU’, ASAINA; MÅTTU YU’ PARA BAI HU CHO’GUI I

MINALAGO’-MU.

Hagas ha’ mannangga yu’, mannangga yu’ nu i Saina

ya tumekkun Gui’ påpa’ para guåhu ya Ha ekkunguk i inagång-hu.

Ya Ha po’luyi un nuebu na kånta gi pachot-tu,

un himnu para i Yi’os-ta.

INEPPI…..

 

Ti Un diseseha inifresi yan sakrifisiu;

låo talanga ni manmababa para manmanosgi Un nå’i yu’.

Inifresin gå’ga’ pat inifresi para isåo ti Un ispipiha;

pues ilek-ku, “Atan sa’ måttu yu’.”

INEPPI…..

 

I tinago’-mu nu guåhu manmatugi’ gi royun påppit.

Para bai hu cho’gui i pinto’-mu ennåo minagof-fu;

Yu’os-su, i tinago’-mu gaigi gi halum kurason-hu.!”

INEPPI …..

Hu anunsia i bidå-mu gi dangkulu na inetnun tåotåo

Ti hu suheta i labios-su; Hågu, O Asaina, tistigu-hu.

INEPPI…..

 

 

SIGUNDU NA TINAITAI                                                                   1 Cor 6, 13c-15a. 17-20

Un tinaitai ginin i fine’na na Kattan San Pablo para i taotåo ‘Corinth’

Hafañe’lus:

Ti para u ma’usa i tataotåo para che’chu’ disunestu, låo para u ma’usa para u masetbi i Saina; ya i Saina siempri Ha asisti i tataotåo. Esta si Yu’us Ha na’lå’la’ i Saina ginin i finatai, ya siempri Ha na’fanlå’la’ hit lokkui’ ginin i fuetsån-ña.

En tingu’ ha’ na i tataotåo-miyu påtti gi tataotåo i Kristo. Låo atyu i muna’danña’ gui’ yan i Saina humuyung unu ha’ gui’ yan Guiya gi espirituhåt. Suhåyi i inapplacha’. Ottru isåo siha ti inifefekta i tataotåo; låo i taotåo ni ha kumeti i isåo imuralidåt umi’isåo kontra i tataotåo-ña mismu. Kåo ti en tingu’ na i tataotåo-miyu templun i Espiritu Såntu, ni sumåsaga giya hamyu ya si Yu’us numå’i hamyu? Ti iyun-miyu hamyu mismu sinoki iyun Yu’us hamyu; guaguan nai mamfinahan hamyu. Intonsis usa i tataotåo-miyu para i glorian Yu’us.

 

I finu’ i Saina.

 

IBANGHELIU                                                                                     Jn 1, 35-42

ÅLELUIA.

  1. Åleluia     ESTA IN SEDDA’ I MISIHAS:

SI JESUKRISTO, NI CHUMULILI’I HIT MINAGÅHIT YAN GRÅSIA.                                                                                                                                                 R. Åleluia.

+ Un tinaitai ginin i såntu Ibangheliu sigun i tinigi’ San Juan

Gi sigenti ha’åni iståba ta’lu si Juan giya Bitaniha yan dos na mandisipulu-ña. Mientras ha a’atan anai maloloffan si Jesus ilek-ña, “Atan ha’! Atyugui’ i Kinilun Yu’us!” I dos disipulu mahunguk håfa ilek-ña, ya matattiyi si Jesus. Anai Ha bira Gui’ si Jesus ya Ha ripåra na matattitiyi Gui’, Ha faisin siha, “Håfa en aliligåo?” Ilik-ñiha nu Guiya, “‘Rabbi’ (ni kumeke’ilekña Ma’estru), månu nai sumåsaga Håo?” Manoppi Gui’, “Maila’ ya en li’i’.” Pues manhånåo siha para u mali’i’ månu nai sumåsaga Gui’, ya mañåga siha yan Guiya guennåo na ha’åni. (Iståba kåsi alas kuåttru gi talu’åni.) Si Andres i che’lun Simon Pedro, unu gi dos ni humunguk si Juan, tumattiyi si Jesus. I fine’na bidå-ña tåya’ mås ki para u aligåo i che’lu-ña as Simon ya para u sangåni gui’, “Esta in sedda’ i Misihas!” (Esti na palåbra kumeke’ilekña i Ma’olius.) Ha konni’ gui’ guatu as Jesus, ni umatan gui’ ya ilek-ña, “Hågu si Simon, lahin Juan; i na’ån-mu desdi på’gu para mo’na si ‘Cephas’ (ni kumeke’ilekña Pedro).”

I Ibangheliun i Saina.

Related Post

IMACULADA CONCEPCION

Posted by - December 8, 2018 0
FINE’NA NA TINAITAI                                                                   Gn 3, 9-15. 20   Un tinaitai ginin i Lepblun Genesis   Dispues di ha…

I DAMENGGUN KUARESMA

Posted by - March 1, 2020 0
 FINE’NA NA TINAITAI                                                                  Gn 2, 7-9; 3, 1-7  Un tinaitai ginin i Lepblun Genesis Intonsis i Saina as Yu’us…

TRANSFIGURASION I SAINA

Posted by - August 5, 2023 0
FINENI’NA NA TINAITAI                                                                                       A Un tinaitai ginin i Lepblun i Prufeta as Daniel                                          Dn 7, 9-10, 13-14 Mientras si Daniel…