FINE’NA NA TINAITAI Is 62, 1-5
Un tinaitai ginin i Lepblun i Prufeta as Isaias
Put iya Sion ti bai hu silensiu,
put iya Hirusalen ti bai hu famatkilu,
Astaki muma’lak kalang chatanmak i mina’lak-ña
yan i satbasion-ña kalang i mañiñila’ na hachon.
I nasion siha u mali’i’ i mina’lak-ña
yan todu i manrai siha i gloriå-mu;
Siempri un ma’ågang ni nuebu na nå’an
ni Ha prununsia i pachut i Saina.
Siempri un fama’un gloriosu na kurona gi kannai i Saina,
un kuronan rai ni ginege’ti ni Yi’os-mu.
Ti un ma’ågang ta’lu ni taotåo siha na “Hågu i Mayuti’,”
pat u ma’åluk na “Kansådu” i tanu’-miyu,
Låo inlugåt siempri un ma’ågang “I Muna’mamaguf yu’,”
ya i tano’-mu “Asaguå-hu.”
Sa’ maguf i Saina giya hågu,
ya Ha fa’asaguå-ña i tano’-mu.
Taimanu ha’ na i sutteru ha asasagua i bithen,
i Fuma’tinas håo un inasagua;
Taimanu ha’ i nobiu ni mamaguf ni nobia,
taiguennao ha’ lokkui’ na u maguf si Yu’us giya hågu.
I finu’ i Saina.
INEPPIN I SÅTMU Ps 96, 1-2. 2-3. 7-8. 9-10
R. PRUKLÅMA I MAMBUNITU NA CHE’CHO’-ÑA SIHA
GI TODU I NASION.
Kantåyi i Saina nuebu na kånta;
kantåyi i Saina, todus hamyu gi tanu’.
Kantåyi i Saina; bendisi i na’ån-ña.
INEPPI…..
Anunsia i satbasion-ña, kada diha.
Sångan i gloriå-ña gi entalu’ i nasion siha;
Gi entalu’ i taotåo siha, i manna’manman na fina’tinås-ña.
INEPPI…..
Nå’i i Saina hamyu ni familian nasion siha,
nå’i i Saina gloria yan tinina;
nå’i i Saina ni gloria ni Ha miresi i na’ån-ña!
INEPPI…..
Saluda i Saina, gåtbu i sinantos-ña.
Fanlåolåo gi me’nan Yu’us, todus hamyu ni manggaigi gi tanu’;
Sångan gi entri i nasion siha: I Saina rai Gui’.
Si Yu’us Ha gubebetna i taotåo, Ha trårata parehu.
INEPPI…..
SIGUNDU NA TINAITAI 1 Cor 12, 4-11
Un tinaitai ginin i fine’na na Kattan San Pablo para i taotåo Corinth
Hafañe’´lus:
Guaha difirentis klåsin esperituhåt na rigålu, låo Guiya ha’ atyu na Espiritu i mannåna’i. Guaha difirentis klåsin sitbisiu, låo etmismu Saina ha’ masesetbi. Guaha difirentis klåsin kapasidåt para u macho’gui i sitbisiu, låo etmismu Yu’us numåna’i kapasidåt todus para u macho’gui kada sitbisiu. Mana’a’annuk i gumaigin i Espiritu gi kada tåotåo para minaolik todus. I Espiritu Ha nåna’i un tåotåo un mensåhi ni bula tinemtum, mientras i etmismu Espiritu Ha nåna’i i ottru tåotåo un mensåhi ni bula tiningu’. I uniku yan i etmismu Espiritu Ha nåna’i un tåotåo hinenggi, mientras Ha nåna’i ottru tåotåo ni fuetsan numá’homlu’. I Espiritu Ha nåna’i un tåotåo ni fuetsa para u fama’tinas milågru; para i ottru, Ha nåna’i ni rigålu para u sångan i minsåhin Yu’us; ya i ottru ta’lu, Ha nåna’i ni kapasidåt para u distinggi i rigålu ni måfattu ginin i Espiritu osino ginin atyu i ti ginin i Espiritu. Ha nåna’i un tåotåo ni kapasidåt para u kuentus ni manná’manman na lingguåhi, ya i ottru Ha nåna’i ni kapasidåt para u isplika håfa masångan. Låo unu ha’ yan etmismu Espiritu chumotcho’gui esti siha’; Ha nåna’i sigun gi minalago’-ña kada tåotåo difirentis rigålu.
I finu’ i Saina.
IBANGHELIU Jn 2, 1-11
ÅLELUIA 2 Thes 2, 14
R. Åleluia. ESTA SI YU’US HA ÅGANG HIT GININ I IBANGHELIU;
PARA TA RISIBI I PATTET-TA NI GLORIAN I SAINA-TA AS JESUSKRISTO.
R. Åleluia.
+ Un tinaitai ginin i såntu Ibangheliu sigun i tinigi’ San Juan
Gumuaha fandånggu giya Cana giya Galileha, ya iståba guennåo i nanan Jesus. Si Jesus yan i mandisipulu-ña lokkui’ manmakumbida para i silebrasion. Durånti i giput humokkuk binu, ya sinangåni si Jesus as nanå-ña, “Hokkuk esta binun-ñiha.” Manoppi si Jesus, “Siñora, håfa na un na’såsaonåo Yu’ gi atburutu-mu? Ti mafåttu trabiha i orå-hu.” Si nanå-ña ha sangåni atyu siha i manmañeñetbi gi lamasa, “Che’gui håfa mansinangåni hamyu.” Sigun gi kustumbrin i ManHudihos siha ni para mafa’gåsi siha na sirimonias, iståba guennåo sais na tebbut hånum ni kada unu ha sasahguan ennåo i benti asta trenta galon. Manågu’ si Jesus, “Na’fambula i tebbut siha hånum,” pues mana’fambula i tebbut. Ilek-ña, “På’gu nai fanmañuhu dididi’ ya en chili’ guåtu gi mentu’.” Macho’gui taimanu ha’ i tinago’-ña. I mentu’ ha tañña’ i hanum ni mafa’binu, låo ti ha tungu’ ginin manu mågi ennåo; i manmañeñetbi ha’ gi lamasa tumungu’, sa’ siha sumuhu i hanum. Pues i mentu’ ha ågang i nobiu ya ilek-ña nu guiya: “I taotåo siha diputsi mana’fanggigimin i kumbiti ni maolik na binu finene’na; ya yanggin esta meggai ginimin-ñiha nai malalaknus atyu i labaratu. Låo hågu på’gu un lalaknus i mås måolik na binu.” Ha cho’gui si Jesus esti i finene’na na siñåt giya Cana giya Galileha. Taiguini na Ha na’matungu’ i gloriå-ña, ya manmanhonggi i mandisipulu-ña nu Guiya.
I Ibangheliun i Saina.
