EPIFANIA

1238 0

FINE’NA NA TINAITAI                                                                              Is 60, 1-6

Un tinaitai ginin i Lepblun i Prufeta as Isaias

Kahulu’ gi mina’lak-mu, O Hirusalen! Måttu esta i ininå-mu,

i glorian i Saina mani’ina giya hågu.

Atan sa’ i hinemhum ha tåmpi i tanu’

ya potput na mapagåhis tumåmpi i taotåo siha;

Låo giya hågu na mani’ina i Saina,

ya gi hilo’-mu na a’annuk i gloriå-ña.

I nasion siha u fanmamokkat gi ininå-mu

ya i manrai siha gi lamlam na mina’lak-mu.

Håtsa hulu’ i matan-miyu ya en fanmanatan gi uriyan-miyu;

todu manetnun yan manmåttu guatu giya hågu:

I lalåhin-miyu manmåttu ginin i chagu’,

ya i hagan-miyu gi kannai i imfitmeran-ñiha.

Pues en fanmaguf gi lini’i’-miyu

ya i kurason-miyu u fambongbung yan u fansen maguf,

Sa’ i guinahan i tasi u mabasiha gi me’nan-miyu,

ya i rikesan i nasion siha u machuli’ guatu giya hamyu.

I mangkinalelesan kameyu u fanmåttu yan u na’fambula i siudån-miyu,

kameyu siha u fanmåttu ginin Midian yan Ephah;

Todu ginin Sheba u fanmåttu

manmañuñuli’ insensiu yan oru

ya mapruklålama i matunan i Saina.

I finu’ i Saina.

 

INEPPIN I SÅTMU                                                  Ps 72, 2. 7-8. 10-11.12-13

  1. (11) ASAINA, UN MA’ADORA NI TODU I NASION SIHA GI TANU’.

O Yu’us, fa’nå’gui i rai manhusga taiguihi yanggin manhusga Håo;

yan i lahi-ña nå’i ni hustisia ginin Hagu;

kosaki u gubetna i taotåo-mu kun hustisia,

yan i manmamadedesi ni manunas na disision.

INEPPI…..

 

U måmta’ i rikesa gi tiempon-ña,

meggai na rikesa, astaki ti u fanina i pilan.

U fanggubetna desdi un tåsi asta ottru tåsi,

yan desdi i sadduk asta i puntan tånu’.

INEPPI…..

 

Puedi i manrai ginin Tarshish yan i isla siha u fanmañuli’ rigålu,

i manrai ginin Arabia yan Seba u ma’ufresi i nina’in-ñiha.

Puedi todu i manrai u fanmañaluda gi me’nå-ña,

i nasion siha u masetbi Gui’.

INEPPI…..

 

Sa’ Guiya u na’fanlibri i mamopbli yanggin mangåti,

i manmamadedesi ni tåya’ para u faninakudi siha.

Guiya u gai ma’asi’ ni manakpapa’ yan i mamopbli

ya Guiya u na’fanlibri i lina’la’ i manåya’.

INEPPI…..

 

SIGUNDU NA TINAITAI                                                               Eph 3, 2-3a. 5-6

Un tinaitai ginin i Kattan San Pablo para i taotåo Ephesus

Hafañe’lus:

Siguru na esta en hinguk na si Yu’us gi grasiå-ña Ha nå’i yu’ ni esti na cho’chu’ para bai hu cho’gui para i minaolik-miyu. Ha baba si Yu’us i sikretu na planu-ña ya Ha na’tungu’ yu’.

Gi manmaloffan siha na tiempu ti manmasangåni i taotåo siha put esti na sikretu, låo på’gu si Yu’us Ha na’matungu’ esti gi manapostulis yan gi mamprufeta ginin i Espiritu. I sikretu, era, na ginin i ibangheliu na manggái patti i MamPagånu yan i ManHudihos; gi bendision Yu’us; manmembru siha gi etmismu tataotåo yan mañåsåonåo siha gi prumesa ni Ha fa’tinas si Yu’us ginin i Kristo Jesus.

 

I finu’ i Saina.

 

BANGHELIU                                                                                                Mt 2, 1-12

ÅLELUIA   Mt 2, 2

  1. Åleluia. IN LI’I’ NA DOKKU’ I PUTI’ON-ÑA GI SANHAYA,

ENNÅO NA MANMÅTTU HAM PARA IN ADORA GUI’.

  1. Åleluia.

+ Un tinaitai ginin i såntu Ibangheliu sigun gi tinigi’ San Mateo

Mafañågu si Jesus giya Bilen, un songsung giya Hudeha, guihi na tiempu anai iståba rai si Hirodes. Ti åpmam na tiempu dispues manmåttu giya Hirusalen lalåhi siha ginin i sanhaya ni umistutudia i kinalamtin i puti’un ya manmamaisin: “Månu nai gaigi i nuebu na finañågu na rai i ManHudihos? In li’i’ na dokku’ i puti’on-ña gi sanhaya ennåo na manmåttu ham para in adora Gui’.” Nina’atburutåo si Rai Hirodes yan todu siha i taotåo Hirusalen anai mahunguk esti. Ha na’fandañña’ todu i manmå’gas mamåli’ yan i ma’estrun i Lai ya ha faisin siha, “Månu nai para u mafañågu i Misihas?”

Manmanoppi, “Iya Bilen na songsung, giya Hudeha. Estegui’ tinige’-ña i prufeta:

‘Hågu Bilen, ni gaigi gi tanu’ Huda,

Ti hågu mås takpapa’ gi entri i siudå siha giya Huda;

sa’ ginin hagu nai u fåttu un må’gas

ni para u dinirihi i taotåo-hu ManIsraelitas.’ ”

Pues ha ågang si Hirodes i bisita siha ni mangginin sanhaya ya manhunta sikretu ya ginin esti na ha tungu’ i fetcha anai umannuk i puti’un. Dispues ha na’fanhånåo siha para Bilen ya ha ingkåtga siha nu esti: “Fanhånåo ya en gef ispiha i patgun, ya yanggin en sedda’ na’tungu’ yu’, ya guåhu lokkui’ bai hu hånåo ya bai hu adora Gui’.”

Pues manmå’pus, ya mientras manhåhanåo siha mali’i’ i puti’un, i mismu na puti’un ni mali’i’ gi sanhaya ya mamfine’nanaigui siha ya anai måttu gi hilu’ atyu na lugåt anai iståba i patgun, pumåra. Nina’fan sen maguf siha anai mali’i’ i puti’un! Manhålum siha gi gima’ ya anai mali’i’ i patgun yan si Maria i nanå-ña, mandimu siha påpa’ ya ma’adora Gui’. Pues mababa i balutan-ñiha ya manå’i i patgun rigålun: oru, insensiu yan påopåo, ni mafa’nana’an mira.

Mansinangåni siha as Yu’us gi guinifin-ñiha na cha’-ñiha fanata’lu tåtti as Hirodes; pues matulaika i chalan-ñiha tåtti para i tanu’-ñiha.

 

I Ibangheliun i Saina.

Related Post

XV DAMENGGU GI UTDINÅRIU NA TIEMPU

Posted by - July 15, 2023 0
A FINENI’NA NA TINAITAI                                                                           Is 55, l0-ll Un tinaitai ginin i Lepblun i Prufeta as Isaias Intonsis ilek-ña i…

X DAMENGGU GI UTDINÅRIU NA TIEMPU

Posted by - June 8, 2018 0
FINE’NA NA TINAITAI                                                                             Gn 3, 9-15 Un tinaitai ginin i Lepblun Genesis Dispues di ha kånnu’ si Adan i…

MISA DURÅNTI I HA’ÅNI

Posted by - December 24, 2020 0
FINE’NA NA TINAITAI                                                                               Is 52, 7-10  Un tinaitai ginin i Lepblun i Prufeta as Isaias  I na buninitu gi hilu’…

DAMENGGU DISPUES DI PENTEKOSTES SANTISIMA TRINIDAD

Posted by - June 1, 2023 0
A FINENI’NA NA TINAITAI                                                                               Ex 34, 4-6. 8-9 Un tinaitai ginin i Lepblun Exodus  Tåftaf gi egga’an humånåo si…

EPIFANIA

Posted by - January 5, 2024 0
A B C FINENI’NA NA TINAITAI                                                                           Is 60, 1-6  Un tinaitai ginin i Lepblun i Prufeta as Isaias  Kahulu’…